Login

Vavau a Samoa

O LE POGAI NA IFO AI LE ASO O LE MALIETOA

Ua iloa e le auuso tama o le la uso laititi lea o loo i tai i le va'a, ona la aumaia lea o ia i uta i le maota o le ali'i. Fai mai na alu atu lava Pule nofo i le pepe o le maota o le ali'i, aua sa saunoa atu le ali'i i le auuso, pe a la lea matai, ma e i ai le talitonuga o Safotulafai o iinei lea na maua tonu ai lava le upu, "o le faapito augafa", peitai sa tali mai tama, "e leai, e le o se matai, ua na o si tama'i Pule a", peitai na toe saunoa mai le ali'i, "e na ona Pule lava ae iite," o iinei na maua atoa ai loa le igoa o le tama o "Puleleiite." Fai mai ua faaauau le feiloaiga, ona fesili lea o Malietoa ia Pule, pe aisea na sau ai fua i le malaga, na tali Pule, "na ou sau faapitoa e faaauau le gafa o o'u uso ne'i uma pe a tali ai lau sua." Fai mai ua mae'a atu le tala lea a Pule, ona fai atu lea o le ali'i e tatala le fili launiu, ma le tatala atu, ae nofo a'e i luga le tama o Polu lon atali'i, ma e i ai le talitonuga o iinei tonu lava na maua ai le upu a le atunuu, "ua tatala le fili ali'i," aua o le taimi lea na ifo ai loa ma le aso o le ali'i.

Fai mai le taofi faa Tuisamau ma Auimatagi, o le taimi lea ina ua iloa e le ali'i o lona atali'i lea na fili i le launiu, e le'i i ai ma se tagata na toe nofo i totonu o le fale, se'i vagana ai lava Puleleiite sa i totonu ma le Malietoa, ona alaga leo tele lea o le ali'i ma faapea atu i lona atali'i, "sole, e lou manatu ea e lua ni atua e tapua'i i ai tagata Samoa,?" ma fai mai le mau o iinei na maua ai le upu, "Luatua," peitai sa tali mai le tama o Polu i lona tama, "e leai." Ua toe fesili atu le ali'i i lona atali'i, "ete fia Malietoa,?" sa tali mai fo'i le tama, "e leai," ona toe fesili fo'i lea o le Malietoa, "ae aisea ua e faia ai lenei mea ia te a'u,?" sa toe tali mai le tama, "ona o le a uma tagata ona e tili i lou laualo," fai mai o iinei na maua ai le upu, "Tilialo." Fai mai ona malele ai lea o le Malietoa ma ta'utino ia Samoa atoa, ua ifo lona aso, ona ia faapea atu lea i lona atali'i, ua lelei, ua ifo lo'u aso, ae sau o le a e alu ma lou "Luatua lea ma lau Gautaala lea" ete avamua fo'i i le Tuamasaga.

Fai mai le mau ua mae'a, ona aami loa lea o le 'ava lea e faapea le tala sa tu i tuavao o le Tuamasaga se'i fai ai le 'ava o lea ua ifo le aso o le Malietoa, ua taunuu le 'ava, ona alu ane lea o Puleleiite ua folafola le 'ava ma e faapea le folafolaina o le 'ava. "O le 'ava sa tu i tumutumu mauga, ae suatia ona a'a i le auvae mauga, ua togiola ai Poluleigaga ia Pa'iatea ma Pa'ialala, ae tu'u ai sole Malietoa lou ai tagata." Fai mai le mau o le 'ava lea e taua o le " 'ava mu'amu'a na iloa e Puleleiite." Fai mai ua mae'a le 'ava, ona avane ai loa lea o taumafa ua tali ai le sua a le ali'i, ae o le a toe faaauau atu i le vaiaso fou le soso'oina o le tatou polokalame lenei. Faafetai.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.