Login

Vaiaso mo Tautua Lautele a Falema’i Fa’aitumalo

reporters@samoanews.com

Na amatalia le vaiaso o tautua lautele a Falema’i Fa’aitumalo a le tatou malo i le Aso Sa i le sauniga lotu na fa’atautaia lea i le Malumalu EFKAS i Amouli, i le itula e 3:00 i le afiafi.O lea sauniga lotu sa ta’ita’ia lea e le susuga le Faife’au Toeaina, Sui Taita’ifono o le fonotele a le EFKAS - Leaitulagi T. Fa’alevao ma sa matagofie fo’i lea faiga, aua ua mae’a tima’ia le aufaigaluega galulue i lea matata, ina ia faia tiute ma le fa’amaoni ae maise ma le alofa i tagata.

Ina ua mae’a lea sa fa’asolo loa le polokalama fa’ataoto e afua mai le aso Gafua, e fa’atino ai le auaunaga a le Matagaluega o le Soifua Maloloina mai o latou Falema’i e tolu, Amouli Dispensary, Leone Dispensary  ma le Tafuna Heath Center.

O latou auaunaga masani e aofia ai le Primary Care i Talavai mo le Fanauiti, Talavai mo tama’ita’i ua ma’itaga, Fale Fa’inifo. Ua va’aia lava le aoga tele o lenei fo’i fa’atulagaga, ua ‘ave’esea mai ai le vasega o Talavai masani mo siakiga o le soifua maloloina o tagata, mai le vasega o gasegase o lo ua mo’omia vave lava le o’o ane mo ni togafitiga a foma’i, lea e aoga tele i ai le ER ma isi potu talavai ua fa’atulaga i le tatou Falema’i tele i Faga’alu.

O talavai masani e le o taofia lava, ua aoga fo’i le asiasi tonu ane i Falema’i nei e tolu mo a latou siakiga, i le vaiaso fa’apitoa lenei ua atili ona fa’afiafiaina ai i latou e to’aga e avane fanau mo a latou talavai, ia le misia, ina ia mautinoa, ua faigofie fo’i ona ulufale i a’oga pe a o’o ina atoa tausaga e amatalia ai i a’oga ECE ma Elementary.

O le isi aoga, e mafai ai ona agava’a i latou i fesoasoani tau le WIC, aua a le asia le fanau i o latou soifua maloloina, e le mafai fo’i talia i na fa’amanuiaga. Ua fa’ailoa mai, o Falema’i  fa’aitumalo i Leone ma Amouli, ua mafai nei ona faia ai su’ega mo Penefiti a le WIC, ae o le Falema’i i Tafuna, o lo ua toeititi lava tatala loa lea auaunaga fo’i e faia ai. “I le taimi nei, o lo’o tapena le nofoaga e fa’atautaia ai lea tulaga i Tafuna Health Center.” O se fa’amatalaga lea a le tama’ita’i Silika Young.

Ua fa’alauiloa mai auaunaga e mafai ona fa’atino i nei Falema’i Fa’aitumalo ina ia mautinoa e tagata e mafai ona aga’i ane i ai, pe afai e tulata i o outou aiga, mo talavai masani, peita’i, pe afai fo’i e matauina ua i ai se mea e le gafatia ona fa’atino ai le auaunaga i nisi i nei lava falema’i, ona fa’ato’a fa’atulaga ai lea o lou asia o le falema’i tele mo togafitiga.

O nei ituaiga o tautua e masani ona mo’omia tele ai Fa’ata o le tino i so’o se itutino, o galuega su’esu’e mai Fale Tuitoto, ma nisi o sailiga i itu tino e aofia ai mata, taliga, ua ma le isu po’o le Talavai ENT.

Ona e i ai lava foma’i fa’apitoa mo ia itutino i Faga’alu, o lea e fa’ato’a fa’atulaga lava se talavai ma i latou pe afai o ni afaina ua le mafai ona soloia pe maua se vaifofo mai foma’i i Tafuna Health Center, Amouli ma Leone.

“Ona o le vaiaso lenei ua fa’apito augafa i auaunaga ua ofoina mai i nei falema’i fa’aitumalo, o lea ua fa’ailoa uma atu ai, ina ia le mao alu i le mamao i Faga’alu ae o se talavai lava e mafai ona faia i Tafuna.”

“Ua i ai fo’i le fale Fa’inifo i Tafuna, e mafai ona tautuaina ai oe pe afai o se fa’atumu, fuaina o ni tainifo, pe se’ia fo’i sou oloa! O nisi fo’i e mafai ona fufulu ai o latou oloa i Tafuna lava!”

I itula fa’atulaga ua mafai ona ofoina ai nei auaunaga i le mamalu lautele. Mo nei talavai uma e ao ina faia i le afa o le fitu i taeao ta’itasi mai le aso Gafua se’ia o’o i le aso Faraile ae tapunia i le afiafi i le itula e 4:30.

Peita’i, ua i ai isi talavai ua fa’atulaga mo itula afiafi e pei o aso Gafua ma Aso Lulu, ua faia ai talavai mo le “Well Baby Clinic” mai le itula e 4pm se’ia o’o i le 6pm. O aso To’ona’i o vaiaso lava na e fa’atulaga e tatala ai mo matua ua le atoatoa tui o latou fanau, o le taimi lea e avatu ai fanau nei e toe faia latou tui na misi, ia mafai fo’i ona a’e i a’oga. E tatala lea tautua i aso To’ona’i mai le itula e 8:00 i le 12:00 i le aoauli.

O afiafi o aso Faraile ua fa’atulaga ai su’esu’ega ma talavai mo le Prenatal po’o tina ma’itaga fa’apea ai ma sailiga o tina pe ua maua i Kanesa o le Susu ma le Fa’a’autama. O nei su’esu’ega e faia e aunoa ma se totogi, ma ua tima’ia tina ina ia auai mai mo lea tautua ma le auaunaga sili ona alolofa ia te outou, ia vave iloa Kanesa ma ia fa’aumatia le kanesa. O le itula e 4 se’ia o’o i le 7:30 i le afiafi o aso Faraile e fa’atino ai e tama’ita’i foma’i ia su’esu’ega taua mo so’o se tina ma tama’ita’i.

O le aufaigaluega atoa mo falema’i fa’aitumalo nei e tolu ua aofia ai le to’a onosefulu o ali’i foma’i, tausima’i ma fa’atonu o itu ‘ese’ese o le galuega. O le tama’ita’i ua avea ma Pule o le Community Health Center o Ofeira Nu’usolia, Pule o le Ofisa o le tama’ita’i o Silika Young, ma le susuga Pago Vagaia ua avea ma Pule o le nofoaga i Tafuna. E to’atolu foma’i ua i ai fa’atasi ai ma le aufaigaluega totofi i ona matata eseese e tautuaina le lautele e to’a 60 atoa lava!

Ua afua ona faia lenei vaiaso fa’apitoa, ina ia malamalama tagata uma i auaunaga e mafai ona tautuaina ai i latou mai nei falema’i fa’aitumalo, ma ua fa’ailoa fo’i, e tatou te fa’atauaina ai le latou fo’i matafaioi mo le mamalu lautele o le atunu’u. Fa’afetai tautua, fa’afetai galulue!



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.