Login

Silia 70 tamaiti mama’i asia Foma’i ...

ausage@samoanews.com
Le afioga i le ali’i Senatoa ia Fuata Dr. I’atala (ata AF)

Faapitoa Tamaiti mai Oregon

E silia i le to’a 70 alo ma fanau a le atunu’u o lo o a’afia i le gasegase o le fatu, na mafai ona asia e se aumalaga o foma’i faapitoa mo tamaiti i le masina na te’a nei.

O lea aumalaga e to’alima foma’i na malaga mai ai, o i latou nei o foma’i mo le gasegase o le fatu mo tamaiti mai le Iunivesite o le Soifua Maloloina i le aai o Portland, Oregon, ma o latou faatinoina ai se auaunaga ofo fua e aunoa ma se totogi, e ala lea i le siakiina o fanau o lo o aafia i le gasegase o le fatu i le falemai o le LBJ i Fagaalu.

Na taua e le afioga i le alii Senatoa ia Fuata Dr. I’atala, o ia fo’i o se foma’i faapitoa mo fanau, o lenei auaunaga ofo fua mo fanau a le atunuu, ua mafai ai ona siaki fua fanau ma tuuina atu talavai faapitoa mo latou gasegase.

“O nisi o fanau sa mafai ona siakiina ua tulaga manuia i latou, ae o isi fanau ua auina atu i fafo mo togafitiga, i lalo o le fesoasoani a le aumalaga lenei e aunoa ma se totogi,” o le saunoaga lea a le alii Senatoa ia Fuata ina ua tula’i e faatu se mau e pasia ai le Iugafono Malilie faatasi a le Senate, e momoli ai le agaga faafetai i fomai faapitoa na malaga mai, e tusa ai o le latou galuega fesoasoani sa ofoina atu mo fanau a le atunuu.

O le aumalaga e aofia ai le Faatonu o le polokalame ia Laurie Armsby, faatasi ai ma fomai fesoasoani e pei o Rachel Sunstrom, Jennifer Huan, Christopher Marcella ma Ashley Armsby

I se vaega o le iugafono o loo taua ai e faapea, e le tau toe faailoaina tulaga o foma’i e a’oa’oina i totonu o le malo tele o Amerika, i le maoa’e o le latou tomai i le faatinoina o latou tiute i soo se tautua e aoaoina ai i latou, aemaise lava i le tausiga o le soifua maloloina o tagata.

“O le mea moni, e le gafatia e Amerika Samoa ona totogi ma faa faigaluega foma’i faapitoa faapenei, ae o le asiasiga a foma’i faapitoa nei o loo i ai le tomai faapolofesa, ua alaga tatau ai ona o tatou faafetaia la latou galuega fesoasoani sa ofoina mai, ina ua mafai ona o latou faasaoina nisi o ola o tatou fanau,” o se vaega lea o le iugafono a le Senate.

I faamaumauga tusitusiga mai le falemai o loo taua ai, o le 44% o fanau e fananau mai i Amerika Samoa, e aafia i latou i gasegase matuia e aofia ai ma le fatu, ma o nisi lava o i latou nei e i’u lava ina maliliu a’o tau togafitiina pea i latou.

Fai mai le iugafono, o nisi o taimi, e faafuasei ai ona asia Amerika Samoa e ni aumalaga faapitoa faapenei, mo le ofoina mai o se tautua o loo moomia e aunoa ma lo latou faailoaina mai.

E ui i se tulaga faanoanoa i le puupuu o le taimi na faatinoina ai lenei asiasiga, peitai ua tele se sao mo le faasaoina o soifua o nisi fanau, ina ua mafai ona siaki ma vaaia fanau e toa 75 i le tolu aso, tusa lea e tai 25 na vaai ma siaki i le aso e tasi.

E talitonu le Fono, e ui i le tulaga motu ese ai o Amerika Samoa mai lona tulaga i faafanua o isi setete ma teritori o le malo tele o Amerika, ae ua filifilia lava e lenei aumalaga Amerika Samoa e aumai i ai la latou faamuamua, e pei ona o latou asia ai tatou ia Novema o le tausaga 2011, lea foi ua latou toe asia tatou i le masina o Iulai o le tausaga nei ma le faamoemoe, e toe malaga mai foi i le tausaga fou.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.