Login

Tala otooto mai le Fono Faitulafono

ausage@samoanews.com

FESILIGIA LE MAOTA FOU O LO O FAUSIA A LE FONO

Na fesiligia e le afioga i le alii Senatoa ia Lualemaga Faoa i le taeao ananafi le tulaga ua i ai le fale fou lea o lo o fausia a le Fono Faitulafono, po o afea e mae’a ai le galuega.

Saunoa le alii Senatoa, o lenei galuega ua tele masina ma aso o fausia mai, peitai e foliga mai e i’u ina mae’a le tauaofiaga mulimuli a le fono lea ua nofoia nei, ae le’i mae’a lava  lenei galuega.

“Ou te manatu e tatau ona umusa le galuega lea a’o le’i tapunia le tauaofiaga lenei a le fono,” o le saunoaga lea a Lualemaga i luma o le maota maualuga i le taeao ananafi.

Na saunoa le sui peresetene o le Senate, ia Tulifua Tini Lam Yuen, e le o lava sona silafia i le galuega ua fesiligia, ae mafai ona toe maua mai se isi faamatalaga i se taimi o i luma pe a taunuu mai le alii peresetene, lea o lo o i atunuu i fafo.

Na fesiligia e le Samoa News se tasi o alii kamuta o lo o galue ai i le konekarate o lo o faatinoina le galuega fou a le Fono, ma ia taua ai e faapea, o le konekarate a le Paramount Constructions o lo o latou fausiaina le galuega i le taimi nei.

O le galuega fou a le fono ua fesiligia, o le maota lea ua faapitoa mo Fesootaiga a le Fono, lea na fausia mai i se vaega tupe na maua mai i Tupe na tuuina mai e toe faaleleia ai le Tamaoaiga o le atunuu, ina ua tuana’i le galulolo ia Setema 2009.

FA’ATULAGA LE ISI ILOILOGA KOMITI SU’ESU’E SENATE

O le Aso Tofi nei ua faamoemoe e faia ai le isi iloiloga a le Komiti Suesue a le Senate, mo le talanoaina o nisi o mataupu ua oo i ai la latou suesuega.

Na taua e le taitaifono o le komiti ia Lualemaga Faoa e faapea, o le iloiloga i le vaiaso nei ua maea ona faatulaga, ma ua uma foi ona tuuina atu tusi valaau mo molimau e ao ona oo mai e molimau.

O le vaiaso na te’a nei na fesiligia ai e le komiti suesue le mataupu e uiga i le Vaega Tosova’a, ae o le vaiaso nei ua faamoemoe e fesiligia ai nisi o mataupu o loo fia malamalama ai le maota i le Matagaluega o Aoga.

FESILIGIA SENATOA TULAGA UA I AI FALEAOGA MA AOGA

O le iloiloga a le Komiti o le Faagaioiga o le Malo i le taeao o le Aso Tofi o le vaiaso nei, o le a fesiligia ai e le komiti tulaga ua i ai sauniuniga a le Matagaluega o Aoga mo le toe a’e o fanau aoga i le vaiaso fou.

Na saunoa le taitaifono o le komiti, le susuga Velega Savali Jr, o le agaga o lenei iloiloga, ona o lo o toatele Senatoa o lo o fia malamalama i le tulaga ua i ai tapenaga a le matagaluega, aemaise ai foi o lo o faasea ni isi o Senatoa i le tulaga faaletonu o lo o i ai faleaoga ma aoga a latou itumalo.

O se tasi o mataupu na laga i luma o le maota, o le tulaga o lo o i ai le aoga i le motu o Aunuu, ma le tulaga o le suavai taumafa e pei ona saunoa i ai le alii Senatoa ia Fuata Dr. I’atala.

Saunoa Fuata, o le faafitauli o lo o tulai mai i le aoga i Aunuu, o lo o la’u atu i uta i Auasi le suavai mo fanau aoga, ae a faaletonu loa le tau ma leai ni va’a e feoa’i, ona pagatia loa lea o le aoga i le leai o se suavai.

O lo o talosagaina e le alii Senatoa le tatau ona i ai se tane vai mo Aunuu, e tatau foi ona fesiligia le Polokalame o lo o Faatupeina Galuega tetele (CIP) a le malo, po o i ai se vaega tupe o i ai e ono maua ai se fesoasoani mo Aunuu.

Na faamanino e Velega e faapea, o le molimaua a le Ofisa o loo vaavaaia le polokalame a le CIP, o loo i ai tupe o loo avanoa mo galuega fesoasoani pe a manaomia, peitai e le o faailoaina e le Matagaluega o Aoga i aoga taitasi, e mafai ona latou talosaga i le CIP mo se tupe pe afai e manaomia se fesoasoani.

O le iloiloga i le vaiaso nei o le a manino ai tulaga e pei ona fia malamalama i ai nisi o Senatoa.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.