Login

Tala otooto mai le Fono Faitulafono

ausage@samoanews.com
SN File Photo

MALIU LE FALETUA O SENATOA GALEA’I TUUFULI

O le taeao ananafi na taia ai i le faafofoga a le maota maualuga se tala faanoanoa i le maliu o le faletua o le afioga i le alii Senatoa ia Galea’i Tuufuli, le faletua ia Dr. Adele Satele-Galea’i, e pei ona sa fa’alauiloa e le peresetene o le maota ia Gaoteote Palaie Tofau.

“O le taeao nei na ou mauaina ai se tala faanoanoa e faatatau i le maliu o le faletua o se tasi o tatou uso a Senatoa, le afioga ia Galea’i, o le mea lea ou te tatalo atu ai ia outou afioga, ina ia tatou manatua lo tatou uso Senatoa i talosaga i lenei taeao,” o le saunoaga lea a le alii peresetene.

O Dr. Adele sa galue i le kolisi tuufaatasi a le atunuu mo le tele o tausaga o lana auaunaga i le malo o Amerika Samoa, sa avea foi o ia ma Faatonu o le Matagaluega o Tagata Faigaluega a le malo i tausaga ua mavae, i taimi o le nofoaiga a Kovana Lutali.

Ina ua fesiligia e le Samoa News le afioga Galeai e uiga i lona faletua sa ia taua ai e faapea, o Adele na maliu filemu i le fale o ona matua i Kalefonia i Amerika i le Aso Toonai na te’a nei.

Saunoa le alii Senatoa, e tele itu taua na te manatuaina ai si ona faletua i le la mafutaga.

O le a toe maua atu i se taimi o i luma nisi o ripoti e uiga i toe sauniga ma fuafuaga a le aiga e uiga i le maliu o le faletua o le alii Senatoa. Ia faamaise le Agaga o le Atua i le aiga faanoanoa.

E ONO TAPA VELEGA FESOASOANI FBI

Atonu e faaataata lafoga le saunoaga a le taitaifono o le Komiti o le Faagaioiga o le malo a le Senate, e uiga i le le auai o molimau sa valaauina mo le latou iloiloga i le vaiaso na te’a nei, peitai na taua e Senatoa Velega, na pau le mea ua oo atu i lona mafaufau, o lona tapa lea o se fesoasoani a le FBI e saili mai ai molimau a le malo pe afai ua le mafai ona oo atu e molimau i luma o le komiti.

O le afioga i le Faatonu o Uafu ma Taulaga ia Matagi R. McMoore ma lona sui lagolago ia Chris King na poloaina e oo atu i le iloiloga i le vaiaso na te’a nei, peitai ina ua valaauina le ilioiloga, sa na o le sui taitaifono o le Vaega Tosovaa na oo atu, le susuga ia David Robinson

FESILIGIA LUMANAI FEMALAGAAIGA MO MANU’A

O le maea ai o le iloiloga lea na faatautaia e le komiti o le Faagaioiga o le malo a le maota maualuga i le vaiaso na te’a nei, na tulai mai ai loa se faailoga fesilitele mo le lumanai o femalagaaiga i Manu’a, ina ua mautinoa e foliga mai o le a faaauau pea ona i ai faaletonu i le vaa o le MV Sili, ona ua tuai ma afu lana tautua.

Saunoa Velega e faapea, e tusa ai ma le molimau a le susuga Robinson, e ui e laiti vaega o le vaa na mafua ai toso i luga o le Vaega Tosovaa i le masina na te’a nei, peitai ina ua taunuu atu ma amata galuega, sa iloa ai le tele o galuega e manaomia le toe faaleleia.

Saunoa Velega, e tusa ai o le molimau a Robinson, e ui o lea ua maea ona toe faaleleia le MV Sili, peitai e i ai lona talitonuga o le a faaauau pea ona i ai faaletonu i lona tino i se taimi o i luma, ona o le vaa ua umi ma tuai.

I le tulaga o le vaa o le Foisia lea na faatau mai e le malo i se vaega tupe mai le nonogatupe e $20 miliona a le malo, ua faamaonia e Robinson i luma o le komiti le le toe i ai o se faamoemoega o le vaa lea mo Manu’a, ona ua faaletonu se vaega o ona afi ma ua mautinoa ua sao i ai le sami.

Pau popolega o le alii o Velega, o le sui Senatoa foi lea mai Ofu ma Olosega, ina ne’i toe tulai mai se faafitauli i le MV Sili i le lumana’i, ona toe pagatia foi lea o le itumalo i le leai oni vaa e faatino ai femalagaaiga i le va ma Tutuila.

Saunoa Velega, o le Foisia na faaaoga e fela’ua’i ai turisi i fafo, o le mafuaaga foi lena e le’i pasiaina ai e le Coast Guard ina ua aumai iinei e la’u ai i ni tagata, ona e le o mautinoa lona saogalemu.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.