Login

Pasia Faga’itua mo leisi 6 Tausaga

reporters@samoanews.com

Ua matua fa’afiafiaina lava le vasega o Faia’oga aemaise le taupulega a le A’oga Maualuga i Faga’itua ina ua maua mai le tala fa’afiafia loto, ua toe pasia le agava’a o lenei a’oga mo le isi ono tausaga, e le Asosi o A’oga ma Kolisi mai i Amerika (Western Association of Schools & Colleges-WASC).

“O le fa’afetai e matua fa’ao’o atu o le Komiti Ta’iala ma isi soakomiti uma lava na fa’atulagaina ia fa’atautaia ai galuega fa’atino ia mautinoa ua sauni Fagaitua mo le asiasiga a le WASC ia Mati 2012. Ae fa’asilisili le fa’afetai i tamaiti aoga uma o Fagaitua, aua ana le tou sapaia ma tula’i mai e lagolagosua i galuega fa’atino a komiti uma nei, e tatou te le a’e manumalo,” O se tala fiafia lea a sui o le Komiti Ta’iala a Fagaitua na mafai ona maua se feso’ota’iga ma le tatou nusipepa.

Ua iloga mai, e le faigofie, aua sa tele fo’i galuega e toe faia e nai faia’oga ma pule a’oga i le tu’ua ai o a’oga i aso taitasi, ina ia mautinoa lava, ua tulaga tonu mea uma e tapena mo le asiasiga.

“Afai ae le vave tapena nei mea e tele, e faigata lava ona faia mulimuli ma e oso ai fo’i i’ina le augata latou e toe tausaili, o lea sa tima’i ai lava e le Komiti Ta’iala matou soakomiti i vaega ta’itasi, ina ia taumafai ona fa’tino lava tiute ae maise o fa’amaumauga uma, ia fa’afaigofie ona tu’ufa’atasia lipoti o le aotelega o mea uma e mo’omia mo le Komiti Asiasi mai a le WASC.”

Ua fa’ailoa e sui nei sa latou taumafai e tu’ufa’atasia uma tapenaga mai isi soakomiti ta’itasi, “E le o se galuega faigofie pe afai o le a vave faia i vaiaso ta’itasi, masalo fo’i o le ala tofia lea o i matou e le Pule Aoga, Samasoni Asaeli, ona e matou te laiti ai lava i faia’oga uma, ma e tatau lava ona fa’atonu ma nofo loa i lalo ma fa’atino mea ua fa’atonu mai e fai!” O se latou tala fiafia lea, aua ua talimana’o le fa’ai’uga ua taulimaina i a latou galuega fita sa faia maumaua’i, ia maua ai lea sini.

O le tala mai, e i ai asiasiga e o’o mai i le afa tonu lava o le 6 tusaga, ina ia taumafai ona fa’aitiitia sailiga e faia e le Komiti a le WASC i le toe taliu mai pe a o’o ina mae’a le isi 6 tausaga. O le asiga lea sa asia mai ai i latou i le 2009, ma sa i ai ni mea patino sa fa’atulaa e ao ina fa’aleleia atili, a’o le’i taliu mai le Komiti Su’esu’e a le WASC  i le  2012.

“O se faiga lelei lea o le asi mai i le ta’itolu tausaga, ia mautinoa fo’i o lava le taimi e tapena ai nisi o mea e ao ina fa’aleleia, ma ua vave ai fo’i ona fa’atulaga suiga uma sa mo’omia ma ua vave lava le sailiiliga a le WASC ia Mati 2012, ona ua  mae’a fautuaina i matou i mea e ao ina fa’aleleia atili i le 2009.”

O se isi mea mata’ina, ua iloga ona fiafia i ai le WASC o le fa’atulagaga o le A’oga atoa, e afua mai i le Pulega, Asosi Fesoasoani a le PTA ma isi polokalama fa’atautaia i totonu o le a’oga, se’ia o’o lava i le aufaigaluega atoa ma le fanau a’oga loa. O nisi o mea e mautinoa o lelei lea itu, e fesiligia sa’o lava e le komiti lenei le fanau a’oga i le taimi o le latou asiasiga.

O se mea lea sa fiafia ai tele sui o le Komiti Ta’iala, ona ua iloga le atoatoa o le vaega fo’i a le fanau a’oga, ua mafai e i latou ona talia uma fa’afesili a le Komiti i le vitaimi na asia ai i latou, ma ua faailoa atu ai i le Komiti, ua aluga lelei mea uma i le fa’atulagaga o Faga’itua High.

Ua taua’aoina nei i Fagaitua le latou Fa’ailoga ina ia fa’amauina i lipoti ma tusi pasi o le fanau a’oga e papasi mai Fagaitua High mo le isi ono tausaga. Ua fa’ailoa mai fo’i ia i latou ua mafai nei ona latou sisia le fu’a a le WASC i autafa o le latou agiagia i Fagaitua High e fa’ailo ai, o lo ua pasia lelei i latou mo le aoaoina o fanau i a’oa’oga fa’a-a’oga maualuga ma maua ai fa’ailoga Tipiloma o le fanau, e taulia fo’i nei tusipasi i so’o se Iunivesite lava i le WASC i Amerika atoa.

I le masina o Mati sa asia ai a’oga e tolu i le vaiaso lava e tasi, ae eseese fo’i komiti sa filifili mai mo ia a’oga. Tafuna, Leone ma Manu’a, peita’i, e le’i o’o mai se tala pe o pasia uma nei a’oga e tolu, fa’atasi ai ma Samoana High i Utulei.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.