Login

TEU FA’A A’OA’O TALA’I LE ALII TALEPE FALE TOE GAOI

O le alii lea ua masalomia sa ia talepeina le fale a se tasi o aiga i Aua i le lua vaiaso talu ai, ae gaoi le tele o meafale aoga sa i totonu e aofia ai telefoni feavea’i, o lavalava ma seevae, DVD player, CD ma se tupe, na alu atu muamua o se alii tala’i, peitai na toe emo ane le ata, o le sifi o gaoi.

Na taua e le alii o Reupena Tanuvasa, ua maea ona faaulu le la tagi ma lona toalua i le ofisa o leoleo faasaga i le alii lenei, ona o mea aoga a lona aiga ua toesea mai totonu o le fale.

Na taua e le molimau, o ia sa faigaluega ae na o lona to’alua, o lana fanau ma si ona tina matua le fale, ae o le tele lava o aso e manava mai ai, e faamatala atu ai lava e lona toalua a latou suesuega faatusi paia ma le alii a’oa’o lea, ua fiafia fo’i e asiasi atu ia te i latou ma le olomatua.

Na taua e le molimau lona le manatu mamafa i tala a lona toalua e faatatau i le alii a’oa’o, ona o lea e talitonu lona loto soo se tagata lava e alu e tala’i le finagalo o le Ali’i, e le toe i ai lava nisi faaosoosoga e oo i ai.

Fai mai le molimau, e tasi lava le aoauli na alu ai i le fale e momoli le meaai a lona tina, ae fetaui loa fo’i ma le alu atu o le ali’i tala’i lea i le fale, ma maua ai le avanoa la te feiloa’i ma ia vaai i ai i ona foliga, peitai na toe vave alu ese mai ma le fale ona o loo pisi lava i le galuega.

O le lua vaiaso talu ai ona osofaia ai loa e se tagata le fale o le aiga lenei, peitai na maua ai i totonu o le fale le ato lea e masani ona alu atu ma le alii tala’i i soo se taimi o ana talaiga.

Na taua e le molimau e faapea, o le taeao i le te’a o le 11 na taunuu atu ai le alii tala’i i le latou fale ma faataunuu a latou suesuega masani, ae o le aoauli pe tusa o le te’a o le 1:00 na osofaia ai e se tagata le latou fale, ina ua o lona toalua, o lana fanau ma si ona tina e piki mai fualaau a le olomatua i le falema’i, ae fo’i mai ai ua osofai e le tagata le fale.

E le o manatua e le aiga pe sa loka le fale pe leai foi, e leai foi ni foliga vaaia na iloa ai sa i ai se faitotoa o le fale na talepe, pau le mea na vaaia, ua i ai mea aoga ua aveesea faatasi ai ma le ato a le alii tala’i na maua i tua o le umukuka o le fale.

Fai mai le molimau, e faalua ona alu atu le alii tala’i lenei i le latou fale i le vaiaso mo ana talaiga, peitai talu ona tupu le faalavelave na osofaia ai lo latou fale, e le’i toe oo atu lava le ula lea e tala’i.

Pau le itu e atamai ai le alii tala’i, e leai ma ni faamaumauga i totonu o lana ato lea e masani ona fealua’i ma ia e ono faamaonia ai poo ai o ia.

E talitonu le molimau, e foliga mai e le o se alii tala’i le ula lea, ae o lana mea lava lea o loo fai ina ia faigofie ai ona ia faia isi gaioiga faasolitulafono.



Related



Comment Here