Login

FA’ASALA FA’AMASINOGA REV. FILOIALII I LE $1,000

ausage@samoanews.com

Ua faamalumalu e le faamasinoga maualuga lana faasalaga faafalepuipui e tasi le tausaga mo le alii faifeau o Rev. Aliioaiga Filoialii, ae ua faanofovaavaaia o ia mo le 24 tausaga i lalo o tuutuuga e ao ona ia usitai i ai, lea e aofia ai lona totogiina o le salatupe e $1,000.

O isi tuutuuga o le faanofovaavaaia a Re. Filoialii e aofia ai le avea o ia ma tagatanuu lelei, aua nei ona toe soliina se tulafono, faapea ai ma le se’iina lea o lona laisene ave taavale mo le umi e 6 masina.

O le faasalaga a le faamasinoga maualuga mo le ua molia na tuuina atu lea i le taeao ananafi, ina ua talia le maliliega sa sainia e le ua molia ma le malo, ma ua ia faaalia ai lona le tete’e i le moliaga o lona faafoeina lea o se taavale i se auala faatautala, lea na mafua ai ona oo manu’a i se isi tagata.

O Rev. Filoialii sa tuuaia e le malo i le moliaga o le ave taavale faatautala ua mafua ai ona oo le maliu i se isi tagata, ona o se faalavelave na tulai mai i le aso 19 Setema 2010, ina ua so’a e le ta’avale a le alii faifeau se teineititi sa savali i luga o la auala, ma taofia ai o ia i le falema’i ona o le tulaga tuga o manu’a na aafia ai o ia, mulimuli ane maliu ai lava i le falema’i.

Sa taua i faamaumauga a le faamasinoga le saoasaoa tele o le taavale a le alii faifeau, le ituaiga o le F-150 na malaga ai i le aso lea, ina ua ia alu i le saoasaoa e tusa ma le 25-35 maila.

A’o le’i tuuina mai le faasalaga a le faamasinoga, na finau le loia a le ua molia o Fiti Sunia i le faamasinoga, ina ia faasala Rev. Filoialii i le salatupe e $1,000, ae aua nei i ai se faasalaga faafalepuipui e tuuina atu ia te ia.

E tele ni itu lelei na faailoa e Sunia i le faamasinoga, e lagolagoina ai le soifuaga auauna o le ua molia.

Sa ia taua foi e faapea, ua maea ona talia e le aiga o le teineititi na maliu le ifoga sa faia e le ua molia ma lona aiga.

Na lagolagoina e le loia a le malo o Cabel Poag le faafinauga a Sunia faatasi ai ma le fautuaga a le Ofisa Faanofovaavaaia, ina ia faanofovaavaaia le ua molia, ae aua nei tuuina atu ia i se faasalaga faafalepuipui.

I le maea ai ona iloilo e le faamasino sili ma faamasino lagolago o le ripoti a le Ofisa Faanofovaavaaia, atoa ai ma faafinauga a loia, na saunoa ai le alii faamasino sili ia Michael Kruse e faapea, e ui o loo tele manatu i le mea tonu sa tupu peitai fai mai nisi o molimau, e foliga mai sa savali le teineitiiti na lavea i luga o le auala ma mafua ai loa ona aafia o ia, ae fai mai foi isi molimau, sa alu le taavale a le ua molia i se saoasaoa e sili atu ma le maualuga o loo faatulafonoina i lea vaega o le alatele.

Sa taua foi e le faamasinoga se vaega o le ripoti a le ofisa faanofovaavaaia, e uiga i le taimi na taunuu atu ai i le falemai le teineititi na aafia ma faia i ai togafitiga, mulimuli ane ina ua taofia o ia, na toe iloa mulimuli ane ai e fai lava si matuia o manu’a sa aafia ai o ia.

Saunoa foi Kruse, e ui o loo i ai nisi o mataupu o loo taua i le ripoti a le ofisa faanofovaavaaia, ua tulai mai ai ni faailoga fesili i le silasila a le faamasinoga, peitai e talitonu le faamasinoga, ua lava mau ua i ona luma e faamaonia ai le solitulafono sa faia e le ua molia.

E tasi le tausaga na manatu le faamasinoga e faasala ai Rev. Filoialii i le toese i Tafuna, peitai ua faamalumalu le faataunuuina o lea faasalaga, ae ua faanofovaavaaia o ia mo masina e 24 i lalo o poloaiga e ao ona ia usitai i ai.

O nisi o ia poloaiga e aofia ai lona totogiina lea o le salatupe e $1,000, aua nei ona toe soliina se tulafono, atoa ai ma le se’iina lea o lana laisene mo le umi e 6 masina.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.