Tala Mai Samoa

O le au fili lakapi taitoafitu a Amerika Samoa, le Talavalu ma le alii faiaoga o Leota Setefano Fata (tupito agavale) ma le tamaitai trainer/physio (tupito taumatau) o Monique Solofa i le nofoaga mo koleniga faapitoa a le Iuni Lakapi a Samoa i Tuanaimato. [ata: Naenae Productions]

KOLENI LE TALAVALU NOFOAGA IUNI LAKAPI A SAMOA I TUANAIMATO

O le vaiaso atoa lenei sa faagasolo ai koleniga faapitoa a le au fili lakapi taitoafitu a Amerika Samoa lea ua faaigoaina o le Talavalu, i le nofoaga mo koleniga faapitoa a le iuni Lakapi a Samoa i Tuanaimato, le High Performance Unit Program. Na faaalia e le taitaimalaga, o ia foi o se sui o le komiti faafoe o le Iuni Lakapi a Amerika Samoa, le susuga Peseta Sa Mavaega e faapea, ua tele se aoga o lenei vaiaso i a latou tapenapenaga.

Na ia faaalia foi lona agaga faafetai i le taitaifono ma le laulauafono o le iuni lakapi a le Teritori, lea o lo o taitaifono ai le afioga Kovana Togiola Tulafono mo le sailia o lenei avanoa atoa ai ma le faatupeina o le malaga mai o le au. Na ia faafetaia foi le taitaifono ma le laulauafono o le iuni lakapi a Samoa mo le talisapaia ma le saunia o koleniga faapitoa mo le au a le Teritori.

Na saunoa le alii faiaoga, le susuga Leota Setefano Fata, ua matua tele le aoga o koleniga faapitoa ua maua e le au i lenei vaiaso aua le sauniuni atu i le taamilosaga taitoafitu o le Oceania i Ausetalia i le faaiuga o le masina nei. Na faaalia e Leota, e le gata i koleniga tuufaatasi a le au sa faatautaia e sui eseese o le iuni lakapi a Samoa e pei o le susuga Stephen Betham, Faamaoni Lalomilo, Lilomaiava Taufusi Salesa, Fepuleai Selefuti Patu, Paepae Stan Toomalatai ma Tuala Matthew Vaea. Fai mai a ia, eseese uma lava itu sa taulai i ai ia koleniga, ma sa faatautaia foi e le alii o lo o gafa ma koleniga faapitoa a le iuni lakapi a Samoa, le susuga Michael Deasy ia ni feiloaiga ma sui taitoatasi o le au e faatalanoa ai o latou malosiaga ma vaivaiga. E pei ona silafia, o le susuga Leota Setefano Fata nao le pau lea o se sui mai Amerika Samoa sa filifilia i le Manu Samoa i le 1994, ma sa ia faaalia lona agaga faafetai ma le maofa i lenei avanoa ua maua e le au taitoafitu a le Teritori e maua ai lea malamalama faaopopo i le faatinoina o le taaloga. Fai mai a ia, o le tulaga ua faaleleia atili i le latou tapenapenaga, o le itu tau puipui poo le defense.

O le aso Sa e toe taliu ai le Talavalu mo Amerika Samoa, ae malaga mo Hawaii i le po o le aso Gafua o le vaiaso fou e auai i se taamilosaga taitoafitu i Hawaii e atili faasauni ai mo le Oceania Sevens i Ausetalia i le faaiuga o le masina nei.

LATA MAI LE TUUESEESEINA O LEOLEO MA LE FALEPUIPUI

O se taimi e le o toe mamao o le a molimauina ai loa le tuueseeseina o le pulega mo le falepuipui mai le matagaluega o leoleo, e pei ona o lo o i ai nei. O se tasi lenei mataupu ua leva ona soalaupuleina e le malo amata mai i le ono tausaga talu ai, ma na faaalia e le sooupu a le matagaluega, le komesina lagolago ia Leaupepe Fatu Pula e faapea, o se fuafuaga ua taulai i ai le silasila a le malo ina ia atili faaleleia ai le tautua a ia vaega eseese a le malo. E le gata i lea, ina ia foia ai le tele o faasea ua alia’e mai i le nei vaitau i le faatautaia e le pulega o le falepuipui o le vaaiga o i latou o lo o taofia ai.

Na saunoa le alii palemia, le susuga Tuilaepa Sailele Malielegaoi, o le faamatuu atu o ia vaega eseese e lua e pulea e ni pulega se lua, o le a tupu ai o se lagona sogasoga i ia pulega ina ia siitia le tulaga o a latou tautua. Fai mai a ia, e pei foi ona tuueseese le pulega o le vaega o le Tinei Mu mai le matagaluega o leoleo, lea ua le toe lipoti ai le vaega o le Tinei Mu i le komesina o leoleo a ua faatino lava a latou galuega i lalo o le latou pulega. “O i tonu lava la e iloa ai le poo lelei ona faatino galuega a nei vaega eseese, aua na ona faaletonu lava tau ai ma le tuma i le ulu,” o a Tuilaepa lea. “Ae a lelei, ave le taui ua tatau ai i le tagata sa faatino ma le amiotonu lana matafaioi.”

FUAFUA FAUSIA SE TAULAGA LONA LUA ALEIPATA

O lo o i ai se fuafuaga a le malo o le a avea ai le Mata Aleipata o se tasi o taulaga tele e pei o le taulaga o lo o i Apia nei. O fuafuaga ia ua faailoa e le alii palemia, le susuga Tuilaepa Sailele Malielegaoi, e pei ona lipotia i le nusipepa a le malo, le Savali. O le taimi nei o lo o i ai le uafu faavaomalo i Aleipata, ae o lo o i ai le fuafuaga, o le a fausia ai foi ma se malae vaalele. E le o mailoa la i le taimi nei po a afea o le faataunuuina ai lea fuafuaga. Pau le tulaga ua faamautinoaina mai, o le Mata Aleipata, o le a avea lea ma se tasi o taulaga tele i totonu o le atunuu i se taimi o le lumanai.

O le taimi nei, e faalagolago ia fuafuaga i se paketi mo lenei faamoemoe, ao le tulaga lava ia i le matagofie o le Mata Aleipata e pei ona molimauina i le tele o mataaga matagofie o lo o faapea ona tulitasi e turisi faapea tagata Samoa mo tafaoga, o se tasi lea o mafuaaga e talitonu ai le alii palemia, ua talafeagai ai le Mata Aleipata ma se tasi o taulaga. E talitonu foi le alii palemia, o le a matua faafaigofie ai foi faigamalaga i le va o Amerika Samoa ma Samoa nei.

FALEPUIPUI I LE ONO TAUSAGA I LE GAOI     

E 39 tausaga o se tama mai le afioaga o Letogo ma Falefa, o Malaki Tasi, ua faasalaina nei i le falepuipui mo le ono tausaga ina ua faamaonia moliaga o le gaoi. Na faaalia i faamaumauga a le faamasinoga e faapea, na ave faagaoi e lea alii ni afi vaa e silia i le $10,000 i le afi e tasi, ma e fa moliaga faapea na molia ai o ia. O isi moliaga e fa, e mafua mai lea i lona faamamateina o ni manu papalagi se fitu. E tusa ai ma faamaumauga a le itu a leoleo, e faafa ona osofai e le ua molia se papovi ma ave ai ni povi se fa, ao le isi osofaiga mulimuli na ia faamamateina ai ni manu papalagi se fa.

O le tau o le povi e tasi e tusa ai ma faamaumauga a le itu a leoleo, e silia ma le $1,000. Na maua e le faamasinoga e faapea, e le o se taimi muamua lea ua faia ai e lea alii lea solitulafono o le gaoi. E iva tausaga na talosagaina e le itu a leoleo e nofosala ai o ia i le falepuipui. Peitai na toesea e le alii faamasino, le afioga Alo Vaepule Vaemoa Vaai ia tausaga e tolu ona o lona vave ioeina o nei moliaga e valu faasaga ia te ia, ae totoe ai tausaga e ono lea o le a nofosala ai o ia i le toese i Tafaigata.

SAINI LE KONEKARATE A TIM CAHILL E TAALO AI MO LE RED BULL A NIU IOKA

Ua sainia nei e se tasi o alo o Samoa ua lauiloa i le lalolagi i le taaloga o le soka, le susuga Tim Cahill, se konekarate e taalo ai i le kalapu soka o le Red Bull mai Niu Ioka i Amerika. O lenei alii o Tim Cahill o se palagi Ausetalia lona tama ao le Samoa lona tina ma sa soifua mai o ia i Ausetalia. Na lipotia mai le le mananao o le pulega ma sui o lana kalapu tuai o Everton i Ausetalia e motusia le latou mafutaga ma lea alii, peitai na faaalia e Cahill, ua ia malie i lea konekarate ma le kalapu a le Red Bull i Niu Ioka ina ia saili ai se manuia o ia ma lona aiga.

E $1.5 miliona tala Ausetalia le konekarate ua taalo ai nei Cahill mo lea kalapu i Amerika, ma ua faaalia le agaga faafetai o le faiaoga a lea kalapu ina ua talia e Cahill le latou ofa e taalo ai mo le latou kalapu. Na lipotia mai i upega tafailagi le fiafia o Cahill i lea kalapu aemaise le tupe tele ua taalo ai i lea kalapu i Amerika. Fai mai a ia, e talitonu ua ia faia le faaiuga sao aua le atinaeina o lana taalo aemaise se lumanai manuia o ia ma lona aiga.

O Tim Cahill na amata taalo i le taaloga o le soka i Samoa nei ma muamua foi taalo i taaloga soka faavaomalo i le aufili a Samoa, o se tulaga na umi se taimi o talosagaina ai e le asosi soka a Ausetalia le pulega o le taaloga i le lalolagi, le FIFA, ina ia faatagaina lea alii e taalo mo le au fili a Ausetalia. Sa taalo foi o ia i le au a Ausetalia lea sa tausinio i taaloga o le Olemipeka i le 2008.