Login

FAGOGO: O OE NA FILIFILIA E O’U MATUA

[E toe faatalofa atu i uo ma paaga masani a  le tatou polokalame i lenei vaiaso, ae alo maia o le toe faaauauina lenei o le tatou polokalame mai le vaiaso na te’a nei, lea na gata mai i le taimi lea ua faailoa atu ai e Lineta i ona matua lona le toe fia nofo i lona to’alua sa laua filifilia.]

“E a lau kala siaula Ligeka, e faafefea oga e lafo mai lega faamakalaga ia maua, eke iloaiga le kigaiga o le kakou aiga i lau faaipoipoga oga o le ma gaugau ia avea oe ma falekua o le a’oa’o, ae o le a legei mea ua e kalagoa mai ai,?” o le ote lea a le olomatua ae o le toeaina i le taimi lea, ua na o le punou i lalo e le fia tautala i lona afafine ona o lana faamatalaga lea ua fai atu ia te i laua. A’o vavao le ulugalii ona o le la le fiafia i le la tama, na faafuase’i ona toe faapea atu Lineta i ona matua, “ma’imau pe ana lua lagona lo’u pologa i aso uma ou te ola ai ona o uiga faaalia o le tamaloa na lua filifilia, e le gata ua aliali uma ona uiga i totonu o le nuu, ae ua tuli ese fo’i o ia ma le aoga faa faifeau, e le o toe avea fo’i o ia o se a’oa’o, lona uiga fo’i, ua leai se lumana’i o totoe mo a’u i lena tagata,” e fai atu lava tala ia a le teine ae na o le punonou lava o ona matua i lalo ua le maugagana ona o lea ua amata ona manino le faafitauli o loo mafua ai ona musu le la tama e toe nofo pea i le tagata lenei.

O le vaiaso lona lua a Lineta i lona aiga na faatoa alu ane ai Pegi e asi ma se’i fai se latou tala pe aisea ua nofo umi ai i lona aiga. O le vaa o le aoauli na malaga ai le tamaloa i Savaii, ma ia maua atu ai tupulaga o le nuu o Lineta e masani ai, ma mulimuli atu ai lava i taiga a le au ula lea, o Filiki ma Lomi, o sifi ia o gaoi ma’umaga ma amio valea i totonu o le nuu, lea o loo faauo i ai Pegi. E malu ane loa le afiafi o le aso lea, ae taunuu loa le taavale a le aualii ia i le pitonuu muamua lava o Amouta, ma toe faaauau ai loa le latou inugapia o loo faia. E maea loa le lotu afiafi a Lineta ma ona matua ae latou vaaia loa se taavale o afe atu i luma o le latou fale. “Siaula Ligeka, se’i vaai aku lava poo le kaavale lega a ai e afe mai i kokogu,?” o le fesili lea a le olomatua ao pisi lava i le tau tapenaina o le taumafataga o le afiafi. “O le taavale a Filiki,” o le tali atu lea a Lineta i lona tina ma savali aga’i atu i le faitoto’a o le fale, ona tu lea ma valaau atu i le ave taavale, “malo Frits, malolo mai se’i fai le meaai o le afiafi,” ae na tali mai le ali o Filiki, “se aua eke popole oe le falekua o le alii a’oa’o, ma makou o mai e momoli mai lou alii ge’i ke’i ua fasi e se kagaka i le auala,” e fai lava tala ia a Filiki ma ata, ae vaaia loa e Lineta lona toalua o Pegi ua oso mai i fafo ma le ta’avale ma tau pi’ipi’i i le afi o le ta’avale, o lona ofuvae pupu’u o loo fai, o loo faasausau ae fusi lona ulu i le mitiafu. O le faitatala tele o taliga o le olomatua na ia lagona atu ai le tala a Filiki, ma mafua ai loa ona ia tu i luga ma savali agai atu i le faitotoa o le fale ma fesili, “O ai ga sa momoli mai e le kaavale,?” e fetaui lava le uma atu o le fesili a le olomatua ae ona vaaia loa Pegi o loo tu mai i fafo o le faitoto’a ma lona ulu o loo fusi mai i le mitiafu, o lea na ia tago atu ai ma toso mai le lima o Lineta i totonu o le fale ae tapuni le faitoto’a.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.