Login

“TAPUA’IA OU FAIVA - TUSIUPU SAMOA”

reporters@samoanews.com
O se va’aiga i le tusitala o le Anava Fetalai, afioga Teleiai Fanaea Christian Ausage, lea ua saunia tusi na tufa fua, o faimeaalofa sili lea mai Le Lavea’i Foundation lea fo’i e avea ai le tusitala, ma ona ta’ita’ifono. [ata: Leua Aiono Frost]

Na fa’amamafa e le faletua o Sheryl Morales Polataivao le tapua’ia e lana taupulega o le Faletusi o Feleti Barstow i Utulei, o alo o Samoa a’o alofaiva e tusi ma fa’amaumau au lava measina. O se saunoaga fa’amalosi’au, ma o se lagona lotonu’u e fa’aofofia ai, e taumafai i tatou tagata Samoa, e avea i tatou ma puna’oa e saili mai ai  e tatou tupulaga o lumanai sosia o a tatou ‘Tu ma Agaifanua.’

I le tatalaga o fa’atauga o le Tusi o Lauga ‘ese’ese  “Anava Fetalai” na tusia e le afioga Teleiai Fanaea Chrsitian Ausage i le afiafi o le aso Lulu na te’a nei i le Faletalimalo o le Sadies by the Sea i Utulei, sa fa’afofoga ai e na auai, ae lalafo le tama’ita’i pule o le Faletusi I Utulei.

“O le fesili pe fia ni tusi ua fa’aaogaina nei i a’oa’oga a le fanau saili fa’ailoga i mataupu tau le Pasefika, Samoa ma Ana Aganu’u, le Atumotu ma ona Malo o aofia ai, ua tusia e tagata Samoa?”

O le tali, ua loa tausaga o tatou su’esu’e i nei mataupu, ae o tusi na tusia ma fa’amaumau e sui ma atunu’u mamao sa o mai aumau ma tusia o tatou tala’aga, lea ua tatou toe fa’aaogaina mo le sailiga o fa’ailoga maualuluga i o tatou lava laufanua!”

O se fesili fa’atupu manatu, ae ua tatou patipatia ai fo’i le galuega sa gapatia ai tusitala fou a Samoa, lea ua tutula’i mai, ma latou susu’e le falao’oto ma fa’amau ona matalalaga, ae a sailiga a fanau i le taimi nei ma le lumana’i.

O lenei tautalaga, ua faia e le faletua o Sheryl Polataivao, ua nofoleleia i le a’ai o finagalo na auai i lea po e tatala fa’atauga o le “Anava Fetalai” o se tusi aoga tele i le tofa saili fa’atulafale ia a’oina le mafaufau ma le fofoga fetalai aua o lana lea anava tausi i la ta aganu’u.

E lua upu Samoa sa fa’amatala ai lagona o le faletua i lana folasaga. ‘Tapua’i’ ma le ‘Agaga Faia’e’.

“O ia upu afai e te fa’aperetaniaina, e le faigofie ona fa’amatala i se upu e tasi,” e tusa ai ma lana folasaga. “Ae o le agaga tonu lea ua ia te a’u ina ua ou fa’alogo ma ua ou taulimaina le tusi o le Anava Fetalai”.

“Na ou tapua’ia ni faiva o alo Amerika, fa’afetai ua ou molimauina lenei afiafi, le sao ua tu’uina mai mo le Faletusi, o le Puna’oa o le atamai e tofasaili i ai le tofaloloto ma le tofamanino i alo o le atunu’u i so’o se vaitau. Ina ua ou umia le tusi lenei i o’u lima, ona ‘fiafia faia’e’ lea o lo’u loto![From the bottom of my heart].”

“Na amata fo’i le Tusi Pa’ia i tusi o le Penitatuka, o tusi na tusia e Mose le Perofeta, e tusa ai o le musumusuina mai o ia e le Agaga Pa’ia o le Atua. E o’o lava fo’i i le feagaiga fou o lo ua fa’amaumauina ai e le au fai Evagelia e to’afa o galuega, fa’ata’oto ma lauga a Iesu na faia a’o soifua fa’atasi o ia ma tagata i lenei lalolagi.”

Ina ua tu’ua se avanoa matagofie i le tusitala, sa ia fa’amauina le afiafi mo lona sao i le anava fetalai i sana fa’aupuga fa’apea, “E mautinoa e le’i moemoenoa le susuga le tamaloa mai A’ana ona o lenei galuega sa ia moeonoono ai, ma sa ia tapa fo’i ana moefa’auo i taimi uma na utia ai, ina ia tatala ato vailiili o tofa sa moe manatunatu i ai!”

O le tusi ua maua nei i le Faletusi i Utulei, ma isi faletusi uma, e aoga tele mo folasaga eseese e a’otauina ai le fanau i le anava fetalai fa’atulafale.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.