Login

Tala o Faamasinoga

ausage@samoanews.com

FALEPUIPUI SE ALII MO ASO E IVA

O se alii e 19 tausaga le matua, lea ua ta’usala e le Faamasinoga Faaitumalo, i le moliaga o le inupia ae le’i atoa lona 21 tausaga, ua fa’asalaina mo aso e iva i le toese i Tafuna, o le isi lea tuutuuga o lana faanofovaavaaia e 24 masina le umi.

O lea ua toe faasala Bernard Himphill, ae o lo o nofo va’ava’aia foi o ia mo le 12 masina, i seisi foi solitulafono.  O le vaiaso na te’a na fa’a nofovaavaaia ai Himphill i le solitulafono o le faatupu vevesi i nofoaga faitele, peitai na faateia le faamasinoga ina ua toe tula’i lenei alii talavou i le vaiaso nei e tali i isi tuuaiga a le malo.

Na faailoa e le alii faamasino ia Elvis Patea e faapea, toe pau lea o le avanoa ua tuuina atu e le faamasinoga ia te ia, afai ae toe molia mai o ia i se isi solitulafono, o le a toe fa’aopoopo loa leisi ono masina o lo o fa’amalumalu.

TUUAIA GAOI O PUSA MEAAI MAI FALEOLOA E FAIGALUEGA AI

O se tasi o alii e faigaluega i le FLY Inc i Nuuuli, ua tuuaia nei i le moliaga o le gaoi ma le taumafai e talia ni oloa sa ave faagaoi.

O le alii o Joseph Iakopo lea o lo o taofia pea i le toese ina ua le mafai ona ia totogia le $10,000 sa faatulaga e le faamasinoga, ua faamoemoe e toe tulai i luma o le Faamasinoga Maualuga i le masina fou mo lana ulua’i iloiloga.

I faamaumauga a le faamasinoga o lo o taua ai e faapea, o le aso 28 o Iuni na faailoa ai e le pule o le faleoloa lenei mataupu i leoleo, ina ua ia masalomia Iakopo i lona gaoia o oloa mai le faleoloa.

E toatele tagata faigaluega a le faleoloa na fesiligia e leoleo e uiga i lenei mataupu, ma latou taua ai e faapea, o Iakpo e toatasi na gaoia oloa mai totonu o le pusa aisa a le faleoloa, a’o matala le faleoloa.

Na faailoa e le isi molimau i leoleo e faapea, i le 10:30 i po o le aso 27 o Iuni, na faateia ai o ia ina ua alu atu Iakopo i le latou fale, i se taxi, ma fesiligia o ia pe mana’o e faatau ni pusa meaai (short ribs, hamburger patties).  Ae ona o le leai o se tupe a le molimau, na ia le faatauina ai se pusa.

Na faailoa e le isi alii faigaluega i leoleo e faapea, na fai atu Iakopo ia te ia, e alu i totonu o le pusa aisa e gaoi mai ni pusa meaai o lo o i ai, peitai sa musu ina ne’i tuli o ia.

Na ta’ua foi e seisi alii faigaluega e nu’u faatasi ma Iakopo, lona maua o se ‘cooler’ i le fale o seisi aiga o le latou nu’u o lo o tumu i meaai na masalomia, na gaoia mai i le faleoloa ma ia fesiligia ai Iakopo pe aisea ua ia gaoia ai meaai mai i le faleoloa, ae tali Iakopo, e le fiafia i le pi’opi’o o le latou pule i le faiga o latou totogi.

Na toe faafoi e Iakopo le ‘cooler’ sa i ai oloa na gaoia, i le faleoloa. Ina ua fesiligia o ia e leoleo, sa ia ioeina ai lona gaoia o pusa meaai.

TETE’E LEMISIO TAETULI I ONA MOLIAGA

Na teena e le alii Lemisio John Taetuli tuuaiga a le malo faasaga ia te ia, ina ua tulai i luma o le Faamasinoga Maualuga i le taeao ananafi, ma ua faatulaga ai loa lana ulua’i iloiloga i le masina fou.

O Taetuli o lo o tuuaia i moliaga e aofia ai le faiaiga faamalosi, faia o uiga mataga i fanau laiti, faia o feusuaiga mataga, tagofia o itutinosa o se teineititi, faapea ai ma le faia o gaioiga e ono lamatia ai le ola o se fanau laititi.

O ia tuuaiga na afua mai i se faalavelave na tulai mai i le 2009 e pei ona taua i faamaumauga a le faamasinoga, ina ua ia faia ni uiga mataga i se teineititi e 12 tausaga i le taimi na tupu ai le faalavelave.

Na faailoa e le teineititi na aafia i leoleo, e faatele ona la faiaiga ma le ua molia, e aofia ai le isi taimi na ia tuuina atu ai le $20 ia te ia ina ua maea ona la faiaiga ma lana upu, e aua ne’i ona ta’uina i se isi le mea o loo tupu.

O lo o taofia pea Taetuli i le toese i Tafuna ina ua le mafai ona ia totogia le $50,000 na faatulaga e tatala ai o ia i tua.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.