Faavae suiga ofisa Leoleo i faaletonu tulai mai falepuipui

O nisi o suiga e pei ona toe faia i totonu o le Matagaluega o le Puipuiga o le Saogalemu Lotoifale, sa faavae mai ona o nisi o faaletonu o lo o tulai mai i le toese i Tafuna, tulaga le faamaoni o leoleo i le faatinoina o latou tiute, o amioga e le manatu mamafa ai i le faatinoga o tiute, aemaise ai o le masalomia o le aafia ai ma faiga faasolitulafono.

I se pepa o faamatalaga o lo o sainia ai le suafa o le  Komesina o Leoleo, le tofa Tuaolo M. Fruean, lea na tuuina atu i le aso 25 Iulai i vaega taitasi o le Matagaluega o Leoleo, o lo o ia faalauiloa atu ai suiga e pei ona fuafuaina.

Ua ta’ua e Tuaolo i le pepa o faamatalaga, “atonu ua faailoa atu e le Sui Komesina ia Leseiau Laumoli nisi o atugaluga o loo nofo ma a’u, i ni suiga faanatinati e fia faia ina ia foia ai le faafitauli o loo tulai mai i le toese i Tafuna.  Ma o ia faafitauli e aofia mataupu e pei o le le faamaoni o leoleo i ona tiute, o amio le kea o leoleo, aemaise ai o tuuaiga i le faia lea o ni amioga faasolitulafono o loo masalomia le aafia ai nisi o leoleo o le falepuipui”.

E lei fa’ama’oti mai e le alii komesina i totonu o lana tusi, faaletonu i le toese i Tafuna, peitai e talitonu le Samoa News, o suiga nei na afua mai ina ua maea se osofaiga sa faatautaia e le Vaega o Leoleo Suesue i le lua vaiaso talu ai i totonu o le toese, ina ua masalomia ni alii pagota o lo o tuli faasalaga, na talepeina le faletupe o Hawaii i Tafuna ma le Pizza Hut, ae maua ai i totonu o le potu o lo o loka ai alii pagota nei nisi o mea e le tatau ona i ai, e pei o ‘flat screen tv’, o ni mea faigaluega, telefoni feavea’i, atoa ai ma ni fagupia Vailima lapopo’a sa fa.

Na faamaonia mai e le Taitai o le Vaega o Leoleo Suesue i le Samoa News, o mea sa latou mauaina i le osofaiga, ua tulai mai ai ni masalosaloga e foliga mai e i ai leoleo o le toese o lo o aafia i gaioiga o lo o faia e pagota.

E le’i saunoa auiliili Comdr. Lavata’i Taase Sagapolutele e uiga i mea sa maua i totonu o le potu o lo o loka ai pagota, ona o lo o faaauau pea a latou suesuega.  Ae na ia saunoa, e le o se taimi muamua lea ua osofaia ai e leoleo le toese i Tafuna, ma latou maua i ai mea e le tatau ona i ai i totonu.  I nisi o osofaiga muamua, na maua i ai vaega o fualaau faasaina o mariuana.

O suiga la ua faia e aofia ai le tofia o Lt. Ioasa Pese lea o loo faauluulu i ai le polokalame a le MCASP Enforce Unit a le Ofisa o leoleo, ma Lt. Fasi Ta’ase Jr lea sa avea ma Taitai Uati o le vaega a le Patrol Division i le Ofisa Tutotonu a leoleo i Fagatogo, e galulue i le toese i Tafuna, i lalo o le vaavaaiga a le Pule o le Toese, le susuga Lumana’i Maifea.

Ua sui tulaga nei Lt. Fautua Maiava ia Lt. Pese, ae o Lt. Arieta Salanoa, lea na galue i le vaega su’esu’e a leoleo (CID), ua sui tulaga ia Lt. Taase Jr., mo se taimi le tumau.

O nisi o fesuiaiga e aofia ai le aveese mai o le alii leoleo o PSO Hesedth Sopoaga mai le vaega ti’eti’e pasika i le Traffic Division a leoleo, ae tofia e galue i lalo o le va’ava’aiga a Cmdr. Lavata’i Taase Sagapolutele, i le CID.

O le tamaitai leoleo ia Nancy Toloafa lea sa galue i le vaega o le Patrol Division, ua tofia e galue i le vaega a le Traffic Division mo se taimi le tumau.

Saunoa Tuaolo, ua atoatoa lona talitonuga, o suiga ua faia i totonu o le matagaluega atoa o le a fesoasoani ai i le foiaina o le faafitauli o lo o tulai mai i le toese, ma ia maua ai foi le tulaga maualuga o lo o manaomia e le toese i le faatumauina lea o le galulue fegalegalea’i mo le saogalemu o leoleo i le toese a’o maitauina ai le faatupulaia o le faitau aofa’i o pagota ua i ai.

Na faaiu lana tusi i lona faafetaia o le matagaluega atoa uma lava, i tiute o lo o latou faatinoina i aso uma aua le puipuiga o le saogalemu o le atunuu lautele.