Fa’atulaga iloiloga Senate pili tupe totogi ai Poloaiga Faamasinoga

O le aso Lulu nei lea ua faatulaga ai le iloiloga a le Komiti o le Paketi a le Maota Maualuga, e fesiligia ai molimau a le malo e uiga i pili tupe e lua na faaulu e le alii kovana i le tausaga na te’a nei, e faatupe ai poloaiga e lua a le faamasinoga maualuga ua maea ona tuuina mai, ona o nisi o mataupu sa faia faasaga i le malo.

Na saunoa le taitaifono o le komiti o le Paketi, le alii Senatoa Lemana Peleti Mauga, o pili tupe nei sa faaulu mai e le faigamalo i le tausaga na te’a nei ma le faamoemoe e faatupe mai i tupe e maua mai i lafoga toe faaopoopo i luga o oloa ma laisene pisinisi, ina ia totogi ai poloaiga a le faamasinoga maualuga, ua maea ona tuuina mai i le malo, peitai na faia le faaiuga a le maota maualuga, e lelei pe a toe faataatia pili tupe nei seia i ai se isi taimi e toe talanoaina ai.

Na fa’ailoa mai e Lemalu i le Samoa News, o nei poloaiga e aofia ai le mataupu  i le Pacific International Engineering. Ltd (PIE) ma le malo, atoa ai ma le mataupu i le va o Tavale ma le malo.

I le tausaga na tea nei, na tuuina atu ai e le alii kovana ni pili tupe se lua i luma o le fono faitulafono, e talosagaina ai le pasia o pili tupe e lua e aofia ai le $321,757 e totogi mo le PIE, ma le isi pili tupe e silia i le $32,000 mo le aiga o Tavale, ona o se alo na maliu i se faalavelave sa aafia ai se tagata faigaluega ma se taavale a le malo.

I le mataupu i le va o le malo ma le kamupani a le PIE, ua poloaina ai e le faamasinoga le malo ina ia latou totogiina atu le tuep e tusa ma le $321.757 i le PIE, ina ua latou faatamala e faatino aiaiga o se konekarate sa latou sainia ma le kamupani.

O le tupe o le a aofia ai ma le 6% e totogi atu i tausaga uma lava talu mai le taimi na tuuina mai ai le poloaiga a le faamasinoga, seia oo ina maea le totogiina atu o le tupe i le PIE.

O le kamupani a le PIE na manumalo i le fausiaina o se auala i Manu’a sa faatupe e le malo, peitai na i’u ina le maea le galuega e mafua mai i se faaletonu na afua atu i le malo, na talosagaina ai loa e le PIE le faamasinoga ina ia poloaina le malo na te totogiina atu i le silia i le $300,000 i le kamupani.

I le mataupu e uiga ia Tavale ma le malo, e $32,500 le aofai o se tupe ua poloaina e le faamasinoga maualuga le malo latou te totogi i le aiga o Tavale, ona o le faaiuga sa tuuina mai i le 2009, e mafua mai ona o le faalavelave na maliu ai lenei alii i le 2001 i le nuu o Pago Pago.

I le poloaiga na tuuina mai e le faamasinoga i le 2009, sa poloaina ai le totogi atu e le malo o le tupe e tusa ma le $35,000 ia Sarai Tavale, o ia lea tausia ma vaavaaia le alii o Vi’iga Tavale, 11 tausaga le matua lea na maliu ina ua manu’a i se faalavelave tau taavale i le 2001, i le taimi na tuua ai lana aoga i Pago Pago.

O le faalavelave na mafua ai ona maliu Viiga na tulai mai i le aso 28 Mati 2001, i le taimi na tuua ai le aoga, sa latou savavali faatasi atu ai ma isi tamaiti e aga’i atu i se faleoloa e le mamao ese mai ma le aoga, ae o le taimi lea o loo ave atu ai e Eugene Ieremia se van a le Ofisa o Aoga, ma o loo faaee atu le pu o le taavale ina ia faailoa atu ai i tamaiti e soso i tua.

E i le va o le 10-15 maila i le itula na alu ai le taavale a Ieremia, ae o le sone lea e 35 maila i le itula le maualuga faatulagaina o le saoasaoa o soo se taavale.

Fai mai le faamasinoga, ao alu alu lemu le taavale a Ieremia ma faaee le pu o le taavale, sa faafuasei ona fai mai tuliga a Viiga ma nisi o alii aoga matutua, ma mafua ai loa ona tamo’e mai Viiga e aga’i atu i luma o le auala, ae o le taimi foi lea na faasaga atu ai Ieremia ma talanoa atu i se tasi o le pasese o loo i totonu o le van, ae faafuase’i loa ona tamo’e ane Viiga ma taia i le taavale.

Na oso i fafo Ieremia ma fesoasoani ia Viiga, ma mafai ai loa ona auina atu o ia i le falema’i mo togafitiga.

O pili tupe nei e lua o loo fuafua le faigamalo e faatupe mai i isi pili tupe e lua o loo taoto ai pea i le fono e lei pasia, le pili tupe e sili ai totogi o laisene pisinisi, atoa ai ma le isi pili tupe e sii ai le lafoga o nisi o oloa mai fafo.

O le afioga i le alii faamasino sili lagolago ia Lyle L. Richmond na le afioga i le alii faamasino lagolago ia Mamea Sala Jr sa faafoeina taualumaga o lenei mataupu.

O molimau a le malo ua fuafua e fesiligia i lenei mataupu e aofia ai le Teutupe ia Magalei Logovii, atoa ai ma le Faatonusili o le Ofisa o le Paketi ia Malemo Tausaga.