Login

Tala o Faamasinoga

ausage@samoanews.com

LAMALA TUFELE

Ua i luma o le Fa’amasinoga Maualuga se talosaga a le tama’ita’i o Lamala Tufele, lea o lo o tuuaia i moliaga mamafa e lua o le gaoi, iina ia faatulaga se aso o lona fa’amasinoga autu.

Na tu’ua’ia Tufele i lona talaina o se tupe mai i se teugatupe a se tagata i totonu o le Faletupe o Hawaii (BOH), e ala i le fa’aaogaina o le ATM.

O le taeao ananafi na fuafua e faia ai lona ulua’i iloiloga, lea na fa’aulu ai lana talosga mo sona fa’amasinoga autu.

E tupu lenei fa’alavelave ua molia ai Tufele, ae o lo o galue i le faletupe i Fagatogo.  O se tagi na faaulu e Paul Ah Mu ma Enesi Enesi i le faletupe e tusa ai ma a la teugatupe o lo o masalomia, o lo o fa’aaoga e se tagata, na alia’e ai lenei mataupu.

Ina ua siaki e leoleo ia masini pu’eata a le BOH i Tafuna, na maua ai le ata o Tufele, a’o ia talaina se tupe mai i le ATM i le 5:42 i le afiafi o le aso 15 o Novema, 2011.  Ae o le aso 16 o Tesema, 2011 na toe maua ai lona ata i le masini pu’eata i le ATM i Laufou.  O aso ma taimi ia o lo o masalomia na to’esea mai ai tupe mai i teugatupe a i la’ua ua fa’aulu a la tagi.

O lo o tumau pea poloaiga o lo o tatala ai Tufele i tua mai le toese, e faatali ai le aso 22 Oketopa lea ua faatulaga e faataunuu ai lona faamasinoga, peitai afai e oo atu i le aso lea ua i ai se isi mataupu  e faataunuuina ai, ona toe faatulaga loa lea o lana faamasinoga e faia i le aso 7 Ianuari 2013.

SASA LE ULU O LE ISI TAMAITAI I LE FAGUPIA

O le tamaitai e 20 tausaga lea na tuuaia e le malo i lona faaaogaina o se fagupia e faaoo ai manu’a i seisi tamaitai, ua molia nei e le malo i le moliaga mamafa o le faaoolima i le tulaga lua,  moliaga mama e lua o lona tagofia o le ava malosi ae lei atoa le 21 tausaga, faapea ai ma le faatupu vevesi i nofoaga faitele.

O le tamaitai o Natasha P. Uia lea o lo o taofia i le toese, ua faamoemoe e toe tulai i luma o le faamasinoga i le Aso Tofi o le vaiaso nei, mo le faataunuuina o lana ulua’i iloiloga i luma o le faamasinoga.

I faamaumauga a le faamasinoga o lo o taua ai e faapea, o le aso 21 Iulai na tulai mai ai le faalavelave lenei i Pava’ia’i, ma auina atu ai loa le tamaitai na aafia i le falemai mo togafitiga. O se tamaitai foma’i na ia faafesootaia le ofisa o leoleo e uiga i le faalavelave.

Na ta’ua e le tama’ita’i na a’afia i le ali’i leoleo o William J. Mose, a’o savali atu i luga o le auala i totonu o Pava’ia’i, na faafuase’i ona valaau atu Uia.  Na fesiligia o ia e Uia, pe aisea na ia faia ai tala leaga e faatatau ia te ia, peitai na fai i ai le tamaitai na aafia, na te le’i faia ni tala leaga e faatatau ia te ia.

Na faateia le tamaitai na aafia ina ua ta e Uia i se fagupia ma ta’e ai lona ulu, ona ia ta tu’i lea o ona foliga.

Na faailoa e le isi molimau i leoleo lona vaaia o Uia o sasa le ulu o le na aafia i le fagupia, ae na taua e Uia ina ua fesiligia e leoleo, sa faatali lava se’i taunuu atu le na manu’a i ona luma, ona faatoa ia taina lea o lona ulu i le fagupia sa ia u’uina.

E $10,000 le tupe ua faatulaga e le faamasinoga e totogi ona faatoa mafai lea ona tatala Uia i tua, e faatali ai taualumaga o lana mataupu lea ua i luma o le faamasinoga faaitumalo, ae afai e mafai ona tatala o ia i tua, ua faasa ona ia toe taumafai e faafesootai le tamaitai lea na manu’a i lenei faalavelave.

TOLOPO ILOILOGA TAMA 93 TAUSAGA LE MATUA

Ua toe tolopo i le aso 10 o Aokuso le mataupu faasaga i le tama e 93 tausaga le matua lea o lo o tuuaia i lona faia o ni uiga mataga i se alualutoto e 4 tausaga, ina ia maua ai le avanoa o loia e vaavaai i nisi o faamaumauga o lo o umia e le malo e uiga i lenei mataupu.

E le o mafai ona faalauiloa e le Samoa News le suafa o le tama ua molia, ona o puipuiga i le ono mafai ai lea ona iloa le alualutoto o loo aafia i lenei mataupu.

O se talosaga na faaulu e le loia a le ua molia o Sharron Rancourt, e talosagaina ai le malo mo le tuuina atu o isi faamaumauga o loo latou umia e uiga i lenei mataupu, ae ina ua fesiligia e le faamasino sili le loia a le malo o Mitzzie Jessop poo a isi faamaumauga ia o loo talosaga atu ai le itu tete’e, na taua e Jessop, o se ata video, ae mafua ona tuai le tuuina atu i le loia a le itu tete’e, ona o loo taumafai e tuu le ata video tuai lenei i se disc ina ia faa faigofie ai ona matamata i ai.

Ua toe tolopo e le faamasinoga le mataupu a le ua molia ma le tuutuuga, o le a mafai e loia ona vaavaai i le ata video e pei ona taua, ae le’i toe valaauina le mataupu i le aso 10 Aokuso.

O le masina o Fepuari 2012 na tulai mai ai le faalavelave lenei, ina ua ripotia le aafia o se teineititi e 4 tausaga le matua i ni gaioiga faafeusuaiga.

O loo teena pea e le ua molia tuuaiga faasaga ia te ia, ma o loo tumau pea poloaiga o loo tatala ai o ia i tua a’o faagasolo ai lana mataupu



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.