Login

Faafetai Togiola ia Faleomavaega ma Amata

ausage@samoanews.com

Na faaleo e le alii kovana ia Togiola Tulafono i lana polokalama i le Aso Toonai na te’a nei, sana tali e tusa ai o ni faamatalaga e faapea ua faapitoa le faafetai a le kovana i Senatoa o le Konekeresi mo le pili e taofi ai siitaga o totogi, ae le o aofia ai suafa o Faleomavaega Eni Hunkin ma Aumua Amata, ae o laua sa pito sili ona taulamua i le unaia o lenei mataupu.

Fai mai Togiola, atonu e ese se finagalo o Faleomavaega ma Aumua i le agaga o lana faafetai, ae o lana faafetai sa tuu sa’o atu lava i tagata na mafua ai ona sao ma pasia le pili, lea ua toe tolopo ai le siitaga o totogi amata i le teritori.

I le mae’a o le saunoaga a Togiola, na ia fa’apea loa ona fa’afetaia Faleomavaega ma  Aumua e tusa ai o le la sao i le taumafaiga o lenei pili, atoa ai foi ma ni galuega sa laua faia e uiga i lenei mataupu.

Ae peitai na faamanino e Togiola, o le faataotoina o galuega i totonu o le konekeresi, e i ai mataupu i totonu o le konekeresi e ta’u i le gagana faaperetania o “riders” po o mataupu e taua o “mataupu faati’eti’e.”

Na ta’ua e Togiola, e mafua lea igoa ona e i ai taimi e taumafai ai faipule ma Senatoa e faasa’osa’o ni isi o mataupu i totonu o isi pili e faaulu i luma o le fono, afai la e i ai ni tamai mataupu e manaomia le faaulu i totonu o le fono, ona saili lea e faipule ma senatoa o isi pili e faatietie i ai a latou mataupu taua ia, ina ia faa faigata ai i faipule po o senatoa ona aveese vaega laiti ia, aua afai e aveese vaega laiti ia, o lona uiga ua le aoga atoa le pili sa fuafuaina.

“O le mafuaaga tonu lena na mafua ai ona pasia le pili lea na aofia ai ma le totogi amata i Amerika Samoa nei, ona sa faaofi i totonu o le pili sa naunau le toatele o faipule e faapasia mo i latou, lona uiga ana aveese le vaega i totogi amata, lona uiga e afaina atoa atu ai ma le pili, o le auala la lena na mafua ai ona ou faafetai faapitoa i alii Senatoa sa ou taua o laua suafa, ona o le galuega fita sa laua faatinoina,” o le saunoaga lea a le alii kovana.

Sa ia taua foi, ana faapea e faaulu lava na o se pili e taofi ai siitaga o totogi i Amerika Samoa, o le mea moni e teena e le pasia.

“Ana faapea foi e faaulu e le tatou faipule sana ia fo’i pili e faatatau i totogi amata ina ia taofia, ou te ta’utino atu, e le taitai foi pasia lena pili, e teena e le konekeresi, o le mafuaaga tonu lena sa ia faafetaia ai alii Senatoa e tusa ai o le galuega fitaituga sa laua feagai ai,” o le saunoaga lea a Togiola.

“Ae afai ua galo atu ai ma se faafetai mo Faleomavaega ma Aumua, ia o lea ua faafofoga le atunuu atoa, ou te faafetai atu ia te oulua ona o galuega lelei ma le lua sao i le unaia o lenei mataupu mo Amerika Samoa, e le faigofie.”

Ina ua pasia e le maota o sui le pili, na tuuina mai ai e le tofa Faleomavaega sana tusi e faalauiloa aloaia mai ai le pili ua pasia, faatasi ai ma lona finagalo e uiga i lea pili.

Saunoa Faleomavaega, na te faafetaia le agaga o le konekeresi ua mafua ai ona latou pasia lenei pili, peitai i lona talitonuga, e lagona ai lona faanoanoa leaga na te le lagolagoina le taofia o le siitia o totogi amata i le teritori.

Ae na taua e Togiola i le vaiaso na te’a nei e faapea, e faanoanoa o ia ona o saunoaga ia a le alii faipule, e foliga mai ai e tu le isi vae i le isi itu ae tu le isi ona vae i le isi itu, peitai o le galuega ma le taitaiina o le malo e le faia e se tagata e tu vaelua, ae tatau lava ona tasi le itu e tu ai le taitai ma lagolago le at unuu.“E le manaia lea ituaiga mea o le eseese o le mea e tu ai le va o le taitai, afai ua tu i fafo tu uma i fafo vae, ae afai foi e fia tu i totonu ia tuu uma outou vae i totonu, ae aua le tu vaelua e le manuia ai se atunuu.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.