Login

FAGOGO: O KATI LE LEOLEO NANA

Vaega #3

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea na fesili atu ai le isi alii o le toalua lea i le tama o Kati, pe i ai se mea e manao ai fua i le alu atu i luga o le counter ae ua le nofo pea i lona nofoa.]

E lei tali Kati i se tala ae sa na o le pupula to’a atu i le alii lea na fesili atu ia te ia mo ni nai sekone, ae o le taimi lea ua tau fai alu le tuli a tagata sa aai i totonu o le faleaiga i fafo ma feei. Na ona tago atu lava o le isi alii lea o loo nofo i lalo o le nofoa, uu mai le lima o lana tama lea sa faalala lana fana ma la savali loa i fafo o le faitoto’a, tulioso i le la taavale ma o ese loa, e le’i umi ae taunuu loa ma leoleo. “O i ai se mea o faaletonu ia te oe tamaitai,?” o le fesili atu lea a Kati i le tamaitai pule o le faleaiga lea na faalala i ai e le alii lea le fana, “Leai, na o lo’u fefe lava na tau oso mai, ae o lea lava e okay mea uma,” o le tali atu lea a le tamaitai pule ia Kati, ma toe momoli atu i ai ma lana faafetai e tusa ai o lona loto fesoasoani. “E le afaina, pau la’u talosaga, pe mafai ona maua mai sa’u kopi o le lipine lea sa pu’e i le tou masini e faatatau i le mea sa tupu ananei i le taeao, se’i fesoasoani ai i a’u suesuega pe a fai,” o le talosaga lea a Kati i le tamaitai pule, lea foi na talia e le tamaitai pule, peitai ua afua mai ai loa ni manatu o le tamaitai pule, e foliga mai o le tagata lea o loo la talanoa o se tagata suesue nana.

E vaiaso atoa e lei toe oo ane Kati i le faleaiga lea peitai e le misi lona faitau i nusipepa i taeao uma ma matamata foi i le TV, i le tele o faalavelave o loo tutupu i totonu o le atunuu o Lusia atoa ai ma nisi o ona aai, lea o loo fasiotia ai le toatele o tagata e aunoa ma le maua o le tagata o loo ia faia lea galuega le alofa. E oo lava foi i tamaitai aoga ma fafine o loo fai i ai uiga mataga ma ave faamalosi, e le o mafai lava ona maua e leoleo ma vaega suesue a le malo. O le isi taeao na toe afea ai e Kati lana fale kofe ae tuu ane ai loa e le tamaitai pule le kopi o le ata sa pu’eina i le latou masini. Sa musu Kati e iloa e nisi e i ai sana fesootaiga i le faleaiga lea. Na ona savali atu lava o le tama o le a totogi lana kofe ma lana sanuisi sa fai ai lana malu taeao ae tuu atu ai loa e le tamaitai pule le afifi ma lana tala, “o le kopi lena o le ata sa e talosaga mai ai, ae fesootai mai ou te manaomia lau fesoasoani.” E na o le lua lava aso na galue ai le tama i le tau sailiina o faamaumauga e uiga i alii e toalua ia sa laua faia ni gaioiga le talafeagai i le faleaiga, ae ona mauaina loa tuatusi ma mea e nonofo ai, ona manatu loa lea o Kati, o lana uluai osofaiga lea o le a faia i totonu o le aai o Lusia lea o loo nofo ai.

E malu ane loa le afiafi o le isi aso lagi lelei lava ae taunuu loa Kati i le tulimanu o le auala lea e agai i le fale e nonofo ai le aualii e toalua ia ua ia taumafai e saili, a’o nofo le tama i luma o se tamai faleaiga ma inu ai lana ipu kofe, ae ona vaaia loa le taavale lea e feoai ai le aualii ia ua aga’i atu ma tu tonu lava i luma o le fale, ona ia vaaia lea o alii ia e toalua ua agai i totonu o le fale.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.