Login

Teva faifeau fafo ma le fono musu toe fo’i i Apia

reporters@samoanews.com

Na teva i fafo ma le fono a se tasi o aulotu le latou faifeau, ina ua musu e talia le fautuaga a tama ma tina matutua o le ekalesia na tuu atu ia te ia, i le tatau lea ona faamavae ma le galuega ae toe fo’i i lona aiga i Apia.

O le fono a se tasi o aulotu sa faia i le vaiaso na te’a nei faatatau i le latou faifeau, na mafua mai ina ua fautuaina e tama ma tina matutua o le ekalesia le tatau lea ona fono matafale uma o le aulotu, mo le faia o sa latou faaiuga i le latou faifeau, i le mae’a ai o lana lauga i le lua aso Sa talu ai i luma o le ekalesia, lea na tuu ai le Tusi Paia ae folafola ana fusuaga i aso a’o laititi i le latou nuu i Savai’i.

Na taua e le molimau i le Samoa News, o le latou aulotu e faafoe mai i le ofisa autu i Samoa, o iina foi e aumai ai faaiuga fai mo soo se mataupu e le mafai ona au i ai le malosi a ekalesia o loo i le teritori nei.

E tusa ai ma le faamatalaga a le molimau, e le o se taimi muamua lea ua lauga faapea ai le latou faifeau i luma o le aulotu.

“Na lauga muamua foi i le isi faatasiga sa faia ma isi aulotu e 4 a le ekalesia ina ua tuu faatasi i se tasi o aso Sa, ma ia lau mai ai le valea o le matou aulotu ma le le foa’i i le galuega a le Ali’i,” o le tala lea a le molimau.

“Ua oo lava i mafutaga tuu faatasi a ekalesia uma e fa i le motu nei (Tutuila) o faamaasiasi ai lava e le matou faifeau le matou aulotu, o le mafuaaga lena ua tasi ai loa le finagalo o le au matutua a le aulotu, ua tatau ona fai se faaiuga i le matou faifeau ae sei toe saili mai se isi faifeau fou e alofa ma ava i le ekalesia,” o le fika lea a le molimau.

Ina ua maea le lauga a le faifeau i le lua aso Sa talu ai, lea na folafola ai ana fusuaga i luma o le aulotu, na talo ai loa se fonotaga a le au matutua o le aulotu mo le tau sailiina o sa latou faaiuga mautu, ao lei fofogaina sa latou faaiuga mautu.

E lei faia le fono i le maota o le ekalesia, ae na faia i le fale o se tasi o tama matua o le ekalesia i Ottoville, peitai e maea loa le faigalotu o le a amata le fonotaga ae vaaia loa e sui o le aulotu sa auai le taavale a le faifeau ua afe atu, e ui na faamalamalama atu i ai e se tasi o tiakono a le aulotu i le faifeau le autu o le feiloaiga faapitoa a le ekalesia, peitai na tali le faifeau, soo se fono lava a le aulotu e faia, e tatau lava ona logo le leoleo mamoe e auai, tusa lava pe fai i le togavao lea feiloaiga, o le tiute lava o le leoleo mamoe ia mautinoa o loo malu puipuia ana mamoe.

Na manatu le aulotu e faaauau pea le latou fonotaga tusa lava pe musu le faifeau e alu ese, ae ina ua oo i le taimi na lalafo ai sui o le aulotu mo se faaiuga tonu mo le faifeau, o iina na vaaia ai uiga le manuia o le faifeau, ina ua vau solo lona tino ma foliga mai ua ia fesiligia le faaiuga, ina ua tasi moemoe le tofa saili a le aulotu, e talosaga i le latou ofisa autu i Samoa, e faate’a le faifeau o loo i ai ae toe saili mai se isi latou faifeau fou.

O le faaiuga la lea na vevesi ai loa le fono ina ua tulai le faifeau ma folafola i le fono, soo se tagata ekalesia na te faate’a se faifeau e aunoa ma se mafuaaga tatau mai le Alii, e le gata e malaia ae o le a faasevasevaloloaina foi lona olaga.

Fai mai le molimau, na matua avaavau le faifeau ma fai atu i le au fono, “Kou ke iloa kou ke malaia uma oga o le kou faaiuga faalekagaka ua fai e faake’a ese ai le leoleo mamoe ga filifilia e le Alii e kausi ma fafaga aga mamoe.”

E lei tali se isi o le au fono peitai sa toe faapea atu le faifeau, “Ou ke le alu ese ma le galuega, e kumau pea oga avea a’u ma leoleo mamoe o le lafu mamoe.” Na ona maea lava o upu ia a le alii faifeau, tuloa i luga ma uu lana ato taitai lanu uliuli na alu atu ma ia, ma savali loa agai i lana taavale, faaola ma faaii solo pa’u ma alu ese loa.

Fai mai le molimau, ua folafola e le faifeau i isi tagata o le aulotu e le’i i ai le fono, o le a latou tutu faatasi e teena le faaiuga ua tasi i ai le fono a le au matutua o le aulotu, peitai na taua e le molimau, tusa lava pe musu le faifeau e alu ese, ua tamau lava le aulotu i lana faaiuga ina ia faatulai ese le latou faifeau o loo i ai, ae saili mai se isi faifeau fou.

O le talitonuga o le lafu mamoe, tusa lava pe fetuu e le taitai mamoe i latou, latou te le solomuli lava i le latou faaiuga ua faia, ae finau pea i le mea ua latou talitonu e tonu ma sao mo le ekalesia, faatasi ai ma le latou tautinoga, alu i ai ae aua le fefe



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.