Login

Fetu’u faifeau le au ai tupe a lana aulotu

reporters@samoanews.com

Ua avea le le manino o tulaga o lo o i ai tupe a se tasi o aulotu i le itu i Sisifo o le atunuu, ma itu na fetu’u ai loa e le alii faifeau le Teutupe ma le isi toeaina matua o le aulotu i le taimi o lana lauga i le aso Sa na te’a nei, ma folafola i ai faafitauli e feagai ma i laua pe afai e tumau pea lo la olegiaina o le aulotu ma le Alii e faatatau i tupe a le aulotu.
 
Mai aulotu e lua ia na ripotia atu i talafou o le vaiaso na te’a nei na fufusu ona o le le manino o le tala o le tupe, ua to’afilemu le isi aulotu i le isi i Sasa’e, sei vagana ai lava le tama’i aulotu i le itu i Sisifo o lo o vevesi pea.
 
Na taua e le molimau i le Samoa News e faapea, na toe faifai tetele le vevesi a le latou aulotu i le fono sa faia i le aso Toona’i na te’a nei, ina ua fai ma mea ula a tagata le faletua o le faifeau lea na vaovao misa, ma faai’u ai i lona fao i luga o le teutupe e tau pupuni ai o ia mai tagata o le aulotu ia na aga’i atu e fai.
 
Na avea le tele o tala ula ma pei o se mea malie i tagata o le aulotu gaioiga a le faletua sa faia i le aso lea ma itu na talo ai loa e le faifeau le fono a le aulotu i le aso Toona’i na te’a nei, ma otegia loa le aulotu i le ula i le tina o le galuega ona o le gaioiga sa ia faia i le taimi o le misa.
 
Ae na atili ona le maua se to’a i le mafaufau o le faifeau ina ia uma ane lava le fono, e tumau pea le nenefu o le aulotu i le tulaga ua oo i ai le tupe sa faatupu a le aulotu. E le gata e leai se ‘bank statement’ ma ni lisiti e faamaonia mai ai i le aulotu tupe sa teu ma le paleni o lo o i ai, ae o taimi uma lava e fesiligia ai le teutupe e faatatau i tupe, e oso faalava ai lava le isi toeaina matua o le aulotu ma lalau le maumausolo o aiga o le aulotu, atoa ai ma tagata mai Upolu ma Savaii o lo o lolotu i le ekalesia ae pei e suesue vale i mea a le lotu.
 
O le lauga a le alii faifeau i le aso Sa na tea nei na faateia ai le aulotu ina ua fetuu e le faifeau le teutupe ma le toeaina matua o le aulotu ma fai i ai, “e tutusa lava le mea na oo ia Anania ma Safaira ina ua la aia tupe o le fanua ma pepelo i le perofeta a le Alii, e faapena fo’i le mea e oo ia te oulua, o le lua iuga fo’i o le oti ona o le pepelo.”
 
Fai mai le molimau, na oo loa le lauga a le faifeau i le fetuuina o le teutupe ma le toeaina matua o le aulotu, amata loa ona gasolosolo taitasi i fafo ma le falesa aiga o le au alii ia e toalua ua le fia faalogologo i le lauga, e fetaui lava le uma ane o le lotu ae ua toe lava o le faletua ma lana fanau o lo o i totonu o le fale, faatasi ai ma le isi ulugalii Savaii ma le la fanau e vaega ma le faifeau.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.