Faamalolo faiaoga tuuaia i se inuga pia ma fanau aoga

Susuga Jason Laumoli [ata: AF]

I lalo o se faatonuga mai i le Faatonu Sili o aoga a le malo ia Vaitinasa Dr. Salu Hunkin-Finau, ua faamalolo nei se alii faiaoga mai i le aoga maualuga a Leone ae maua pea lona totogi, a’o faagasolo ona iloiloga i luma o le faamasinoga, i moliaga na afua mai i se latou inuga pia ma ni fanau aoga.
 
O le taeao ananafi na faatoa tulai ai Jason Laumoli i luma o le Faamasinoga Faaitumalo i lalo o se tusi samania mai le Faamasinoga, e tali i moliaga e valu,e aofia ai moliaga e lima o lona tuuina atu o le ava malosi i fanau talavou, faapea ai ma moliaga e tolu o lona faia o ni gaioiga e ono lamatia ai le saogalemu o fanau talavou.
 
I faamaumauga a le faamasinoga o lo o taua ai e faapea, o le aso 2 o Fepuari na o’o atu ai matua o se teineitiiti e 17 tausaga, i le Ofisa o Leoleo i Fagatogo, mo le failaina o se tagi faasaga ia Laumoli, i lona faainuina o le tamaitai aoga i le uaina.
 
Na taua e le teineitiiti na aafia i leoleo e faapea, e faatele taimi na la inu ai ma le alii faiaoga, na aofia ai ma le taimi o le Faauuga a aoga i le 2012, o le taimi o le koneseti a le aoga i le Kerisimasi o le 2012 i le Lee Auditorium, faapea isi taimi ao le’i tuua aoga ia Tesema 2012.
 
I le taimi mulimuli lava o le Aso Toona’i, aso 2 o Fepuari, lea na ia faainu e le ua molia le teineitiiti na aafia ma isi fanau aoga e to’alua i totonu o lana taavale, e pei ona taua i faamaumauga a le faamasinoga.
 
Ina ua fesiligia e leoleo le alii faiaoga, sa ia faaamaonia lona faainuina o le teineitiiti i le uaina, ae e le’i inu ai isi tamaiti aoga e toalua sa i totonu o le taavale.
 
E toatele ni isi o le atunuu na telefoni mai i le Samoa News ma o latou fesiligia le tulaga e faatatau i lenei mataupu po o fea ua fai i ai suesuega a leoleo.
 
Na faamanino e William Haleck i le Samoa News e faapea, o lo o faagasolo pea i le taimi nei suesuega ma o lo o faatautaia i auala e pei ona faatautaia ai le suesueina o mataupu a soo se tagata e tuuaia i le solia o le tulafono.
 
Saunoa Haleck e faapea, e ui o le alii faiaoga o le alo o le Sui Komesina, peitai e le o i ai se aafiaga o le Sui Komesina i suesuega o lo o faia e uiga i lenei mataupu.
 
Na taua e Haleck e faapea, ina ua tulai mai le mataupu faasaga i le alii faiaoga, na taofia ai loa o ia i le toese i Tafuna mo le 48 itula, ao faatali suesuega a leoleo, peitai ina ua tuana’i itula e 48, na toe tatala ai loa le ua molia i tua.
 
O le aso 21 Fepuari lea ua toe tolopo i ai le mataupu a Laumoli, ma o lo o tumau pea le tatalaina o ia i tua i lalo o poloaiga a le faamasinoga e ao ona usitai i ai e aofia ai le faasa ona toe mafuta ma i latou e tagofia le ava malosi. Ua faasa ona ia toe tagofia le ava malosi poo fualaau faasaina, ua faasa foi ona ia taumafai e sola ese ma le atunuu, a ia avea o ia ma tagatanuu lelei e tausi i tulafono a le malo, ma ia auai i soo se taimi e valaau ai lana mataupu.