Login

Fuafua Ofisa Paka ma Malae Taalo

ausage@samoanews.com
Le Faatonusili o le Ofisa o Paka ma Malaetaalo ia Maeataanoa Pili Gaoteote (itu taumatau) ma ni isi o sui o lona Ofisa ina ua latou asia le malae i Fagatogo i le aso Faraile na te’a nei mo le toe faamautuina o le fuafuaga e pei ona ia faataoto, i le faaaoga lea o se filifili e li’o atoa ai le malae ina ia aua ne’i toe paka ai taavale. [ata: AF]

Ua talia e le Faatonusili o le Ofisa o Paka ma Malaetaalo se talosaga a le Senatoa ma le Faipule o Fagatogo, ina ia saili se auala e taofi ai le toe paka o taavale i luga o le malae i Fagatogo, le malae o le Faautugatagi a Tutuila ma Manu’a, ma le faaleagaina ai o le mutia toe tele ai le palapala.

O se tusi na tuuina atu e le afioga i le alii faipule ia Maugaoalii Leapai Tusipa Anoa’i ma le afioga i le alii Senatoa ia Faagata Mano Jr i le Faatonusili ia Maeataanoa Pili Gaoteote, na mafua ai ona faalauiloa e le alii faatonu sana fuafuaga e taofia ai le toe paka o taavale i luga o le malae.

I se vaega o le tusi a taitai o Fagatogo sa la taua ai e faapea, o le malae i Fagatogo, o lo o fai ma taunuuga o tagata i le taulaga, e tatau ona matagofie le malae i taimi uma ina ia manaia i le maimoa, peitai o ni isi o taimi e pe ai le mutia o le malae ona ua fai ma vaega e paka ai taavale.

Fai mai taitai o le afioaga, o isi taimi pe a paka taavale i luga o le malae ae leaga le tau ma malolosi timuga, e le gata e palapala le malae ae o le a faaleagaina ai foi taavale ma luga o le alatele i le palapala.

“Faamolemole, aua nei toe paka ni taavale i luga o le malae i Fagatogo, o le malae taua o le atunuu e tatau ona tatou naunau uma e puipui ma faaleleia,” o se vaega lea o le tusi a le senatoa ma faipule a Fagatogo i le pule o le Ofisa o Paka ma Malaetaalo.

Na faaiu le tusi a Maugaoalii ma Faagata i lo la faailoa faapea, na pau le auala e mafai ona taofi ai le toe paka o taavale i luga o le malae, o le toso o se pa filifili e poloka ai taavale mai le ulufale atu i totonu.

E le o se taimi muamua lea ua faasea ai le afioaga o Fagatogo i le tele o tagata o lo o paka a latou taavale i luga o le malae, e le gata i taavale a le Ofisa o Leoleo, ae faapea foi i taavale a le Ofisa o le Puipuiga o le Saogalemu Lotoifale, atoa ai ma tagata e aga’i atu i le faletupe o le ANZ Amerika Samoa Bank.

E lei atoa se vaiaso talu ona taunuu le tusi a Maugaoalii ma Faagata ia Maeataanoa, ae tali mai le alii faatonu ma faailoa i ai lana fuafuaga ua maea ona faataoto e foia ai le faafitauli.

I le tusi a Maeataanoa sa ia taua ai e faapea, ua maea ona faia se suesuega a lona ofisa e faatatau i le malae, ma ua i ai le faaiuga o le a li’o atoa le malae i pou u’a maea ta’i 3 futu le maualuluga, ona toso ai lea o le filifili, ina ia aua ai ne’i toe ulufale se taavale i totonu ma paka i luga o le mutia.

Na taua e le alii faatonu e faapea, o le a faailoa lava vaega e fau ai faitotoa mo le ulufale i totonu atoa ai ma le ulufale, e le gata i lea, o le a i ai foi le fuafuaga mo le toe faaolaina o moli o lo o siomia ai le malae, lea ua silia i le 10 tausaga e le’i toe ola lava.

Ina ua fesiligia e faipule Maeataanoa i le vaiaso na tea nei sa ia taua ai e faapea, ua maea ona faia sa laua fesootaiga ma le Komesina o Leoleo e faatatau i lenei mataupu, ma e foliga mai o le isi lea Ofisa o lo o tele a latou taavale o lo o paka i luga o le mutia.

Na taua foi e Maeataanoa e faapea, e le gata i le malae i Fagatogo ae o isi paka faasao uma a le malo o lo o i lalo o le vaavaaiga a lona ofisa, o le a aofia uma ai i le fuafuaga lenei, ina ia mautinoa e le toe soona solia e taavale ma le faaleagaina o le mutia.

Na fesili Maugaoalii ia Maeataanoa pe leai se malosi e mafai ona tuu atu i lona ofisa e faasala ai taavale e paka i luga o le mutia, ae na tali le faatonu e faapea, sa la fesootai ma le alii Komesina o Leoleo ia William Haleck e uiga i le mataupu lea, ma e le’i finagalo i ai le alii Komesina.

Na taua e ni isi o faipule e faapea, o se tasi o itu e lagona ai le faanoanoa, e tiga lava ona vaai atu tagata o lo o i ai le faasilasilaga e faasa ai ona paka taavale i luga o le mutia, ae le mafai lava le atunuu i le le usitai ma le le tausisia o faasilasilaga nei.

Ua i ai le fuafuaga o le a tuu atu i luma o le fono le ata faataoto mo le tau atoa o mea e manaomia e faatino ai le galuega, ma ua talosagaina e le alii faatonu afioga i faipule ina ia alolofa ane i le talosaga a lona ofisa, ina ia pasia ma maua se tupe e faatino ai lea faamoemoe.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.