Login

Toe avanoa le nofoa o le Itumalo o Alataua

ausage@samoanews.com
Le afioga i le alii Senatoa o le itumalo o Alataua ia Faletagoa’i Iati Tuiolemotu (ogatotonu), i le taimi mulimuli na ia nofoia ai le nofoa o le itumalo i le iloiloga a le Senate i le taeao ananafi. [ata: AF]

Ina ua nofoia le Komiti o Galuega Lautele a le maota maualuga i le taeao ananafi, o alala le afioga Faletagoa’i Iati Tuiolemotu i le nofoa o le itumalo o le Itumalo o Alataua, ae peita’i, e o’o mai i le taimi o le iloiloga a le maota, ua avanoa lea nofoa.

Na faamanino e le Peresetene o le Senate, le afioga Gaoteote Palaie Tofau, ua mafua lea tulaga ona o lea ua taunuu i totonu o le maota le fa’ai’uga a le Faamasinoga Maualuga, ia avanoa le nofoa o le itumalo, ona e lei filifilia so latou sui e tusa ai ma ala o le Faavae o Amerika Samoa.

O lea fa’ai’uga mai i le faamasinoga, na afua ona o se tagi na faaulu e le tofa Faletogo Taliloa mai i le afioaga o Fagamalo e faapea, o ia lea na tasi i ai le itumalo e fai mo latou Senatoa, ae le o Faletagoa’i,

Na fa’aalia e Gaoteote i le taeao ananafi, na faato’a ia maua le tusi mai i le faamasinoga, i le taeao ananafi, lea ua aloaia ai i tala faamaumau a le maota, le avanoa o le nofoa e tasi i totonu o le Senate.

Na faamanino e Gaoteote i afioga i Senatoa e faapea, talu ai o le faalavelave a le sui e faatatau i le nofoa o le Itumalo na ui sa’o i le faamasinoga, o le mafuaaga foi lea sa faatuai ai ona fai se faaiuga a le laulau, ae talu ai o lea ua taunuu aloaia atu le faaiuga a le faamasinoga, o le mafuaaga la lea ua aloaia ai loa lana faaiuga e faatatau i lenei mataupu, ae se’i toe taoto atu le mataupu e soalaupule i ai le Itumalo, i se sui e tasi i ai le filiga, ona toe faaoo mai lea i luma o le maota.

Na faamaonia foi e Gaoteote i luma o le Senate ananafi e faapea, o le aso lava foi ananafi i le taimi o le tauaofiaga a le maota maualuga na amata aloaia ai le avanoa o le nofoa o le itumalo o Alataua.

FA’AIUGA A LE FA’AMASINOGA

O le faaiuga a le faamasinoga e faatatau i le avanoa pea o le nofoa o le itumalo o Alataua i le maota maualuga, na faia ina ua maea ona iloilo e alii faamasino mau uma e faatatau i lenei mataupu.

Na taua e le faamasinoga i lana faaiuga e faapea, o le itumalo o Alataua e vaevaeina i vaega e lua, o Samatua ma le Tapuaiga. O Samatua e aofia ai afioaga o Amaluia, Asii, Afao, Nua ma Seetaga, Failolo ma Agugulu, ae o le Tapuaiga e aofia ai se vaega o Agugulu ma Failolo, Amanave, Poloa, Fagaali’i, Maloata ma Fagamalo, ma o le faagasologa lava lea o tofi a le itumalo na faasolo mai ai, a maea le isi itu ona oo atu lea i le isi itu.

I mau ua i luma o le faamasinoga o lo o taua ai e faapea, o fonotaga e lua a le itumalo sa faia i le aso 3 ma le aso 8 Tesema 2012, sa lei atoa uma i ai sui o le itumalo mo le filifiliga o sa latou sui.

O le fonotaga muamua a le Tapuaiga lea sa faia i le aso muamua o Tesema 2012, na toe faaauau, ina ua le maua se tasi i le va o Faletogo ma Faletagoa’i mo le tofi, ae ina ua toe usuia le fono i le aso 3 o Tesema i Amanave, na faalauiloa ai e le tofa a Liua Taifane o Poloa, lona foi naunau e fia alu i le nofoa, ae i le faaiuga o le fonotaga lea, na tasi ai le filiga o Faletagoa’i o le a avea ma senatoa o le itumalo.

O le fonotaga na faia i le aso 8 o Tesema i Fagamalo, na auai ai Faletogo ma ni isi o le itu a Samatua, ae o le toatele o le Tapuaiga e lei auai, ona o lea ua latou iloa ua maea ona faia la latou faaiuga mo Faletagoa’i.

O le fonotaga mulimuli na faia i le aso 18 o Tesema i le Ofisa o Mataupu Tau Samoa, na faamautuina ai le avea o Faletagoa’i ma sui o le itumalo i le Senate.

I le faaiuga la a le faamasinoga, ua taua ai le avanoa pea o le nofoa o le itumalo, ina ua le mafai e le Tapuaiga ma Samatua ona filifili so latou sui i fonotaga ua mavae atu.

E lei manuia taumafaiga a le Samoa News mo le fesiligia o se finagalo mai le afioga i le alii Senatoa ia Faletagoa’i i le taeao ananafi i lona Ofisa e faatatau i lenei faaiuga.

Na taua e le alii senatoa e faapea, na te le’i mauaina se faaiuga a le faamasinoga e faatatau i lenei mataupu, e ui o le taimi lea ua maea ai ona tauaaoina atu ia te ia le kopi o le faaiuga a le faamasinoga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.