Login

Taula’i Faigamalo fou i auala e faaleleia

ausage@samoanews.com
Le fale lea na poloina e le alii kovana le Faatonu filifilia o le Matagaluega o Galuega a le malo, ina ia tala i lalo i se vaitaimi lata mai. Saunoa le alii kovana, o le isi lea auala o lo o faatuai ai le atina’e o turisi i le atunuu, ona o vaaiga le manuia nei o lo o fai ma taulaiga o le vaai a tagata o lo o malaga maimoa mai i le teritori. [ata: AF]

FILIFILIA KENISELI LAFAELE AVEA MA FAATONUSILI FEFAATAUAIGA MA ALAMANUIA

O le faaopoopoina o galuega i le teritori, o le itu lea ua manatu Kovana Lolo Matalasi Moliga ma le Lutena Kovana ia Lemanu Peleti Mauga, o le a ave i ai la laua faamuamua mo le faaleleia o le tamaoaiga, ina ua laua talitonu, o le fatu lea o le manuia o aiga ma pisinisi i le atunuu.

Na taua e le alii kovana e faapea, “E le mafai ona tupu le tamaoaiga pe afai e leai ni tupe e maua e tagata e faatino o latou manaoga,” ma ia taua ai se tasi o a laua faanaunauga, o le galulue faatasi ma pisinisi tumaoti i le atina’eina o avanoa faigaluega mo le atunuu.

O fuafuaga foi ia na taumafai i ai le alii kovana ua maea atu, peitai e lei manuia se isi  vaega o lea fuafuaga ina ua tapuni le kamupani i’a o le Samoa Packing i le 2009, ma faaopoopo ai le aofai o tagata e leai ni galuega i le teritori, e ui na toe suia ina ua maua galuega i polokalama na faatupe mai e le feterale ina ua tuana’i le galulolo i le 2009.

O le faataunuuina o ia moemitiga, ua manatu ai Lolo e toe faatulaga tiute tauave a le Matagaluega o Fefaatauaiga ma Alamanuia, ina ia taula’i i le atina’eina o pisinisi ma le tamaoaiga.

O le vaiaso nei na faalauiloa ai e Lolo lona filifilia o Keniseli Faalupe Lafaele e avea ma Faatonusili o lea Matagaluega.

O ni isi o taumafaiga e unaia ai le tamaoaiga o le atunuu, o le vaavaai lea i atina’e e pei o turisi ma faalelei pisinisi lotoifale, e pei ona manatu i ai ni isi o le aufai pisinisi i le atunuu.

I le faauuga o alii mautofi i le vaiaso na tea nei, na faalauiloa ai e Lolo lona faatonuina o le Faatonusili tofia o le Matagaluega o Galuega Lautele a le malo, ina ia fai se fuafuaga i le fale tuai o lo o i ai nei i Pago Pago, le Chinatown hall, ona o le isi lea auala o lo o taofia ai le toatele o turisi e agai mai e fia maimoa i Amerika Samoa, ona o ituaiga vaaiga faapenei.

I le naunau ai o le Fono Faitulafono latou te fia iloa le tulaga o lo o i ai le tamaoaiga o le atunuu i le taimi nei, ua talosagaina ai e le afioga i le alii faipule ia Larry Sanitoa le komiti o le Paketi a le maota, mo se avanoa e maua mai ai ni ripoti o galuega a le malo mo le kuata fa o le tausaga tupe ua maea atu, atoa ai ma se ripoti i tupe maua a le malo mo le kuata muamua o le tausaga tupe lenei o le a mae’a.

Na taua e Sanitoa e faapea, o le taua o le tulaga lea e mafai ai ona malamalama le tino i le ituaiga malosi o lo o i ai le tamaoaiga o le atunuu.

E toatele ni isi o le atunuu sa o latou talosagaina le alii kovana ua mavae atu Togiola Tulafono i luga o lana polokalame i faaiuga o vaiaso, ina ia fai se fuafuaga e tatala ai i lalo le fale lea, ona ua mataga ma foliga le manaia i totonu o le taulaga.

Sa maitauina e le Samoa News i ni isi o taimi e ulufale mai ai vaa meli e malaga mai ai turisi i le atunuu, le toatele o turisi latou te pu’eina ata o le fale.

Saunoa Lolo, o le atina’e o turisi, o le isi lea alagatupe malosi mo le tamaoaiga o le teritori, pe afai e lelei ona atina’e ma fuafua lelei.

O le masina nei lea ua amata faagasolo ai le faatutumuina o pepa mo avanoa faigaluega i le kamupani i’a o le StarKist Samoa, ma ua toatele le atunuu ua lolofi atu i ai mo le sailia o ni a latou galuega.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.