Login

Op-Ed: Manu’atele: Mavaega a le Tui Manu’a, Talofae!

Ua atoa nei le 108 tausaga talu ona avea Manu’a ma teritori o Amerika; ua tu’u fa’atasia ma Tutuila ma Aunu’u, ma ua fa’aigoaina le teritori atoa o Amerika Samoa, e pei ona lau silafia.  Sa fa’amanatuina le Aso o le Fu’a o Manu’a i le vaiaso ua tuana’i i se sauniga lotu I le Falelaumei i Tutuila nei; ae sisi a’e le fu’a i Ta’u Manu’a e le Ofisa o Leoleo i Manu’a.

O lenei fa’atinoga ua faitioina e ni isi o tagata Manu’a ona o le taofi e tatau lava ona fa’ataunu’uina  lenei fa’amoemoe fa’aleamalo i Malaetele Ta’u Manu’a.  Atonu o le faigata o auala, utiuti o seleni a le malo, poo le lava o tagata o nonofo I Manu’a ua mafua ai ona faia e pei ona iai.  Atonu o iai foi se finagalo fa’alemalo o le Aso o le Fu’a o Amerika Samoa e pei ona fa’amanatuina ia Aperila se’i mavae atu nei, o le aso lava lena o Manu’a, aua o Manu’a ua aofa’i fa’atasi I totonu o le faigamalo fa’a teritori o Amerika Samoa.

Atonu foi e manino le mata o le vai o lenei mataupu i le loaloa o tagata Manu’a- o le Aso o le Fu’a a Amerika Samoa ua aofia ai ma Manu’a.  Ae e tatau lava ona faia se polokalame fa’apitoa fa’alemalo atoa ai ma le sauniga lotu i Malaetele e fa’amanatu ai le tu’uina atu aloa’ia e le Tui Manu’a lona malo ma ona tagata nu’u I le tausiga fa’amatua a le malo tele o le Unaite Setete o Amerika.  E iai se manatu afai na ofoofogia le masi’i atu o Amerika Samoa i le fa’amanatuina o le Iupeli Auro o le Malo o Samoa, afai foi o foufou atu Amerika Samoa e masi’i fa’apitoa mo le fa’amanatuina o le Samoa Heritage Week I Hawaii i le masina fou; aisea la ua fa’atuatuana’i ai e Amerika Samoa le fa’amanatuina o le mavaega o le Tui Manu’a mo le Manu’atele?

Atonu o nei faiga ua atagia ai le tulaga tau le atina’e o le Manu’atele mai tausaga e tele ua mavae e o’o mai I le aso- ua fa’ailo mai ai le fa’aletauaina o Manu’a ma ona tagata e Amerika Samoa.  O le tulaga tau le femalagaina i le ea ma le sami i le va o Manu’a ma Tutuila, o le ala vai po’o le ala toto lea e fa’asusu ma fa’aola ai le atina’eina o le tamaoaiga ma le soifua laulelei o le Manu’atele.  Paga lea, ua loa tausaga o fa’ataliga tutuli pea Amerika Samoa i fa’atagitu’i mai o Manu’a mo sina ipu vai- i le fia ola.

Ua avea le ogaoga o lenei tulaga i tausaga e fia ua mafua ai ona ta’ai fala o le fanauga a Isaraelu ma su’e so’o se vaipanoa o Tutuila ma isi atunu’u i fafo e ola ai le initia.  E iai se manatu a toe asiasi mai le Tui Manu’a ae maua mai ua su’e i ala se manuia o tagata Manu’a, e fa’aaunu’ua uma ta’ita’i o Manu’a o iai nei i se motu-le-aina; atoa ai ma ta’ita’i o Amerika Samoa na ioeina le fa’atupeina o le Foisia, Segaula, ma le Matasaua (ma le fa’a-fa’atauva’aina o igoa o measina a le Motu e Sa).

O le fesisli pe aisea ua tupu ai lenei mala ia Manu’a?  O si o’u manatu ma o se tali vave ma le lata mai- e le o se mala, ae “o si ota lima lava ua pa’ia ai si ota mata”.  E amata mai le taimi na fili ai e Amerika Samoa ona ta’ita’i- kovana ma le Fono- e o’o mai i le aso, e numera tasi Manu’a i le tele o ana tama fanau e umia tulaga maualuluga o le malo.  Aisea la ua tupu ai lenei mea?  Oute le mautinoa, ae atonu o le avea o Tutuila ma nofoaga tumau o nei ta’ita’I- ua fanananau ai fanau ma fanau a fanau; ua avea ai Manu’a ua na o “se ata ou foliga I lo’u nei mafaufau”, pei o upu a le fatu pese.  Tu’u la i le gagana fa’a kaupoe- ua sosola chiefs e su’e le mea ola lelei ai lava i latou, ae tia’i nai initia e su’e le mea e ola ai. 

Talofae ia Tui Manu’a ma lana mavaega fa’atupu mo nai ona tagata, Talofae!

Se’i tu’utu’u atu la le tatou upega i le loloto atonu e maua ai uiga lilo o le mavaega a le Tui Manu’a, aua se manuia o tagata Manu’a mo a taeao.  O le upu moni, e oge fanua Tutuila, ma e tupu a’e foi le faitau aofa’i o tagata nu’u o Amerika Samoa i le lumana’i- e iai le taimi e toe foi ai le Isaraelu i lona nu’u moni. 

O le mea moni foi ua iloaina nei, e le fa’atuatuaina le puleaga a Amerika Samoa o le Manuatele e pei ona ta’atia ai nei.  O le mea lea e tatau ai ona toe afua le taeeao e tagata Manu’a ma ona ta’ita’i- ua tatau ona toe asia le feagaiga na sainia mo  outou e le Tui Manu’a, po’o iai i lenei fegaiga ni faiga fa’amalo e agava’a ai le Manu’atele mo le manuia o ona tagata, ma sili atu nai le pologa o tau’alaga ai nei le Manu’atele mo sina ipu vai se’i inu ane ai.

Ua ou tusia lenei tusi, atoa ai ma le tusi fa’aperetania na lomia e le Samoa News i le Aso Faraile ua tuana’i, ma lo’u fa’aaloalo e tatau ai.  A iai se upu ua le logo malie i lau fa’afofoga mamalu oe le Manu’atele, lafo i nu’u le aina.  O le o’otia o le loto ma le fatu nutia ua ala ai ona fa’aleoina  ni manatu ou te fa’amoemoe e aoga mo le alualu I luma o le Manu’atele ma ona tagata.

Alofa le Atua e fa’amanuia ia oe le Manu’atele- fa’asino ala lona Mana a’o e saili malo i le fa’atinoina o le mavaega a le Tui Manu’a mo ona tagata.  Soifua.

  



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.