Login

Talosaga nisi atunuu pulega ASPA

ausage@samoanews.com
Se vaaiga i sui o le Pulega a le ASPA faapea ai sui o le komiti faafoe, i se tasi o iloiloga sa faia i luma o le maota o sui i le masina o Fepuari na te’a nei. (ata AF)

... ia taofi a latou siitaga fou

Ua talosagaina e nisi o le atunuu le Pulega a le Faalapotopotoga o le Eletise ma le Suavai (ASPA), ina ia alofagia le tulaga pagatia ua i ai le tamaoiga ma le oi o le atunuu, ma ia talia le talosaga lea ua tuuina atu e le afioga i le alii faipule ia Larry Sanitoa, e toe tolopo ai a latou siitaga ua fuafuaina mo Oketopa seia i ai se aso.

Na taua e nisi o le atunuu na mafai ona fesiligia e le Samoa News, afai e moni le alofa o le pulega a le ASPA i le atunuu, e tatau ona latou taliaina le talosaga a le alii faipule ia Sanitoa ua tuuina atu i ai, ina ia faateletelegese le isi a latou siitaga ua fuafuaina nei.

“Afai o le a toe sii nei i luga pili o le eletise ma le suavai, ae o lea foi ua sii pili a le falemai, faaopoopo atu loa i ai ma le maualuga o le tau o le soifuaga, ua le iloa la e le atunuu poo fea o le a sulu i ai,” o le saunoaga lea a le tina o Mareta Amituana’i, o se tina ua litaea mai i le galuega faa faiaoga, ae o loo faia sana pisinisi i lona aiga.

Na lulu le ulu o se tasi o tama e galue o se kamuta i se tasi o konekarate faufale i le atunuu, ina ua faailoa atu i ai e le Samoa News, o le aso 1 Oketopa lea ua fuafua le ASPA e toe faaopoopo ai le isi siitaga o totogi o ana tautua.

“A faafefea ona toe sii i luga a latou pili uila ma le vai, o lea foi e lei mamao atu le isi a latou siitaga, aemaise ai foi o lea ua pagatia le atunuu i pili a le falema’i, o ai tonu e sulu i ai le atunuu i taimi o faafitauli faapenei,?” o le saunoaga lea a Finau Mavaega.

O le vaiaso na te’a nei na tuuina atu ai e le alii faipule ia Sanitoa sana tusi i le taitaifono o le komiti faafoe a le ASPA ia Rev. Asaua Fuimaono, e talosagaina ai se avanoa e toe tolopo ai a latou siitaga ua fuafuaina mo Oketopa, ina ia mafai ai ona maua se isi fesoasonai ma se faamama avega mo le atunuu, i le taimi pagatia ua i ai le tamaoaiga i le taimi nei.

Fai mai le molimau a le alii o Apelu Fuataga, lea e galue i le kamupani a le StarKist Samoa, o le taimi tonu lenei e tatau ai ona galulue taitai o le atunuu aemaise ai sui tauva o le palota, e saili ni auala e maua ai e le atunuu le fesoasoani.

“Ou te manatu afai e mafai e se paga o loo tauva i le palota, poo nisi foi o faipule o le a tauva mo tofi o latou itumalo, ona taofi siitaga a le ASPA, ou te fai atu o le paga lena ma le faipule foi lena o le a manumalo i le palota, o le taimi lenei ua matua manaomia lava e le atunuu se fesoasoani i le tele o pili o loo totogi, e fai o le pili a le ASPA, ae o pili foi a le falemai, ae le faagaloina ai le tautuaina o aiga, lotu ma mea fai a le nu’u,” o le faamatalaga lea a le alii o Fuataga.

Ae na taua e se alii faipisinisi mai Asia e pulea se tasi o faleoloa i le taulaga, ua ia faalogo e faitau miliona le aitalafu a le malo i le eletise ma le suavai, peitai o lea e tulituli lava e le ASPA tagata taitoatasi ma pisinisi tau amata, ae o loo taatia le malo o loo tele lana aitalafu.

I le ripoti mulimuli na tuuina atu e le malo i luma o le Fono ao le’i tapunia ana galuega i le masina o Aperila na te’a nei, na taua ai le lata i le $7 miliona le aitalafu a le malo i le ASPA, mo le pili o le eletise ma le suavai



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.