Login

Tala o Faamasinoga

ausage@samoanews.com

LT. STEVEN CASKEY

E ono masina lea ua faanofovaavaaia ai e le Faamasinoga Faaitumalo le Pule o le Ofisa o le U.S Coast Guard i le teritori, ia Lt. Steven Caskey, ina ua ta’usala o ia i le moliaga o le ave taavale faatautala, le moliaga na toe suia e le malo ae solofua ai le moliaga o le ave taavale ‘ona.

O nisi o poloaiga o le faanofovaavaaia a le alii o Lt. Caskey e aofia ai le faasa ona ia toe tagofia se ava malosi po o fualaau faasaina, o le a mafai foi ona faia ni suesuega i lona tino ina ia faamaonia ai, na te le o toe faaaogaina fualaau faasaina.

E 45 aso ua se’i ai lana laisene ave ta’avale, ma ua poloaina foi o ia na te totogia le salatupe e $100.

LOKENI NUUSOLIA

O le aso ananafi na faamoemoe e faia ai le faamasinoga autu a Lokeni Nuusolia i luma o le faamasinoga faaitumalo, peitai e le’i faataunuuina lea iloiloga, ina ua manatu le ua molia e faaagafua ona aia tatau, ae tuu sa’o atu loa i le faamasinoga maualuga e faataunuu ai lana iloiloga.

O lo o tuuaia Nuusolia i le moliaga mamafa e tasi o le taliaina o ni oloa sa ave faagaoi, o se solitulafono e mafai ona faasala ai se tasi i le toese mo le umi e le sili atu i le 7 tausaga, pe faasala foi i le salatupe e le sili atu i le $5,000.

O le moliaga ua tuuaia ai Nuusolia, na afua mai lea ina ua talepe e ni alii se toalua le faleoloa o le FJ & P Kruse i Leone ia Setema 2009, ma la gaoia ai se pusa tupe u’amea sa i totonu o le faleoloa.

Fai mai le malo, na ave e le aualii gaoi le pusa tupe u’amea ia Nuusolia, ma tuu ai e le ua molia i se tasi o fale tuufua e tu i le latou fanua.

E leai ma se tupe sa i totonu o le pusa tupe u’amea na aveesea, sei vagana ai le pito i luma o le pusa tupe sa faaleagaina. O tupe sa i totonu o le pusa e aofia ai le tinoitupe e $24,129.95; tupe siaki e $1,828 ma le $5,492 o food stamp.

MOSE TIMOTEO

Ua faamalieina le faamasinoga i le ripoti a le Ofisa Faanofovaavaaia, faatatau i le tulaga ua i ai le faanofovaavaaia a le alii mai Pago Pago lea sa ta’usala i le faalavelave na maliu ai lona tuaa i le masina o Aokuso 2008.

O le alii o Mose Timoteo Jr na faasala mo le 28 masina i le toese i Tafuna i le 2009, ina ua faamaonia e le faamasinoga maualuga le moliaga o le fasioti tagata pa’ivalea na toe suia e le malo.

O le faasalaga faafalepuipui a Timoteo Jr e 28 masina, o le isi lea tuutuuga o lana faanofovaavaaia e 7 tausaga na tuu atu i ai e le faamasinoga. Sa faapea foi ona poloaina o ia ina ia aua ne’i misi lona alu e vaai lana foma’i, ma ia faamaoni i le inuina o ana fualaau ma vailaau o le mafaufau, faasa lea ona ia toe soli se tulafono, ma ia alu e vaai le ofisa faanofovaavaaia faalua i le masina.

I lana iloiloga i le vaiaso na te’a nei, na faailoa ai e le Ofisa Faanofovaavaaia i le faamasinoga e faapea, o loo usitaia uma e Timoteo Jr poloaiga uma sa tuuina atu i ai e le faamasinoga, ma ua maitauina foi se suiga tele i lona olaga.

Ona o lea tulaga, sa talosagaina ai loa e le Ofisa Faanofovaavaaia le faamasinoga, ia aveese le poloaiga sa faalua ai ona alu atu Timoteo Jr e vaai le latou ofisa i le masina, ae ua lava le faatasi.

O se tasi lenei o faalavelave na faateia ai le toatele o le atunuu, ina ua faaoo e le ua molia le maliu i lona lava tuaa i le latou fale i Pago Pago, ae ina ua fesiligia o ia e leoleo i le mafuaaga o le faalavelave, sa ia faailoa i ai e faapea, o ia e aafia i le gasegase o le mafaufau, ae a oo loa ina oso ma faatetele lona ma’i, ona oso ai loa lea o lona ita i lona tama



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.