Login

Fautuaina Kruse alii Tonga solitulafono matuia umia fualaau faasaina

ausage@samoanews.com

Na fautuaina e le alii faamasino sili ia Michael Kruse le alii fai faiva mai Tonga lea e galue i se tasi o kamupani fai vaa fagota i le teritori, o le umia o fualaau faasaina o se tasi lea o solitulafono e sili atu ona matuia i totonu o Amerika Samoa.

“Tusa lava pe na o se muli sikaleti mariuana ete umia, o se sikaleti atoa poo se taga lapo’a fo’i, e matua matuia lava lena gaioiga i lalo o tulafono tau i fualaau faasaina i le teritori nei, e le tatau lava ona e toe a’afia ai,” o saunoaga ia a le alii faamasino na tuuina atu i le alii o Hefa Pahe ina ua lau lona faasalaga i le vaiaso na te’a nei, ina ua ta’usalaina o ia i le moliaga o le umia faasolitulafono o fualaau faasaina o le mariuana.

O le amataga o le vaiaso na te’a nei na fuafua e lau ai le faasalaga a Pahe, peitai na toe tolopo ona sa faatali se ripoti mai le Ofisa o Femalagaaiga, e pei ona poloaina ai e le Faamasinoga le Pule o lea Ofisa ia Ufuti Faafetai Ieremia, ma faataunuuina ai loa le lauina o le faasalaga a Pahe i le Aso Faraile na te’a nei.

Na faatoese Ufuti i le faamasinoga, ina ua le mafai ona maua mai le ripoti e pei ona talosagaina e le Ofisa Faanofovaavaaia.

Na faailoa e le sui o le Ofisa Faanofovaavaaia i le Faamasinoga, e faalua ona tuuina atu sa latou talosaga i le Ofisa o Femalagaaiga, e talosagaina faamaumauga e faatatau ia Pahe, peitai e faila lava lana ripoti, e leai se ripoti ua tuuina atu, ae na taua e Ufuti, o le aso 28 Iuni na faatoa ia mauaina ai le ripoti sa talosagaina a le Ofisa Faanofovaavaaia.

Na faailoa e Ufuti i le faamasinoga, o Pahe na ulufale mai i le teritori i le 2008 o se tagata fagota i luga o vaa fagota, ma fai mai le tulafono tau femalagaaiga, soo se tasi lava e ulufale mai i le teritori o se tagata fagota, o lona uiga o loo tulaga lelei lo latou aumau ai i le teritori, ae na faailoa e Kruse ia Ufuti, fai mai le ripoti a le Ofisa Faanofovaavaaia, o Pahe na ulufale mai i le teritori i le 2004.

E tusa ai ma faamaumauga a le ofisa o femalagaaiga, o le kamupani a le KS Company o loo sponsor ina le ua molia.

Na fesili Kruse ia Ufuti pe faataga ona nonofo tagata fagogota i luga o le eleele, na tali Ufuti, “e leai, e nonofo lava latou i luga o le va’a fagota.”

O Pahe e to’atolu i ai i latou na loka mai e leoleo i le nofoaga o loo i ai le uafu o vaa faila i Malaloa, le Marina Dock, ma tuuaia i le umia o vaega o fualaau faasaina o le mariuana i le masina o Fepuari na te’a nei.

O se vevesi na tulai mai i luga o le Marina Dock na agai atu i ai leoleo e faatoa filemu, ae maua ai ma le sikaleti mariuana e tasi i le taga o le ofu a Pahe sa fai, ina ua sailia lona tino i le ofisa o leoleo.

Na faatoese Pahe i le faamasinoga e tusa ai o le solitulafono sa ia faia, sa ia faatoese foi i le malo o Amerika Samoa i lona soliina o le tulafono. O lana tautinoga, afai ae maua se isi avanoa mo ia, na te le toe soliina se tulafono a le malo i le lumanai.

Na talosagaina uma e loia le faamasinoga ina ia faanofovaavaaia Pahe, ae aua ne’i toe i ai se isi faasalaga faafalepuipui mo ia. Sa talosaga foi lana loia o Ruth Risch-Fuatagavi i le faamasinoga ina ia aua ne’i faia sana poloaiga e faasa ai Pahe ona toe nofo i le teritori, ae ia faaauau pea ona galue o ia o se fai faiva.

E 5 tausaga na manatu le faamasinoga e faasala ai le ua molia i le toese, peitai ua faamalumalu le tuliina o lea faasalaga, ae ua faanofovaavaaia o ia mo le 5 tausaga i lalo o poloaiga e ao ona usitai i ai.

O nisi o poloaiga e aofia ai le faasa lea ona ia toe tagofia ni fualaau faasaina, o le a suesueina foi lona tino ina ia faamaonia ai, na te le o toe tagofia fualaau faasaina. E $2,000 le salatupe ua poloaina o ia  e le faamasinoga e totogi, atoa ai ma le faasa lea ona ia toe soli se isi tulafono a le malo.

O le isi alii ma le tamaitai lea na loka faatasi ma Pahe i le mataupu lenei, ua maea ona lau a laua faasalaga, ma o loo faanofovaavaaia foi i laua mo le tai 5 tausaga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.