Login

FAAOPOOPO FAASALAGA O PAGOTA NA SOSOLA

ausage@samoanews.com

Ua faaopoopo e le Faamasinoga Maualuga faasalaga o alii pagota e to’alua mai le to’afa na sosola i tua mai le toese i le 2010, ma fasi faamo’amo’a se alii leoleopo o le faletupe o le ANZ Bank i Tafuna a’o moe, ina ua lau a laua faasalaga i le taeao ananafi.

O le alii o David Maea lea o loo tuli sona faasalaga faafalepuipui ina ua faamaonia e le faamasinoga moliaga o le talepe i ni tausaga ua mavae, ua poloaina na te tuliina isi tausaga e 7 e faaopoopo i lana faasalaga o loo tuliina nei, ina ua faamaonia e le faamasinoga le moliaga o le faaoolima i le tulaga muamua faasaga ia te ia.

Ae o Gasona Mafiti lea foi o loo tuli sona faasalaga ina ua faamaonia le moliaga o le talepe fale i le tulaga muamua faasaga ia te ia, ua poloaina e le faamasinoga lona tuliina o tausaga e 5 i le toese i Tafuna, e faaopoopo i lana faasalaga o loo tuliina nei.

A’o lei tuina atu le faasalaga a le faamasinoga maualuga i le taeao ananafi mo Maea ma Mafiti, na tau fai faatoese le aualii i le faamasinoga ma le malo e tusa ai o le solitulafono sa laua faia, sa la faatoese foi i le leoleopo na aafia ona o le gaioiga sa laua faia.

Na faatoese foi Maea i le pulega a le falepuipui e tusa ai o lona sola ese mai le toese ao taofia ai o ia. Na faailoa e Maea i le faamasinoga, o le taimi na tupu ai le faalavelave e pei ona molia ai o ia, sa laititi lona mafaufau, e le’i iloa foi fai se faaiuga mautu mo ia, peitai o le taimi nei, ua avea o ia ma tagata matua, ua iloa foi fai faaiuga lelei ma talafeagai.

Na finau loia i le faamasinoga ina ia faanofovaavaaia Maea ma Mafiti, ina ia mafai ai ona toe maua se isi avanoa mo i laua e toe faasa’o ai mea ua sese i o laua olaga.

Fai mai le loia a Maea o Ruth Risch-Fuatagavi, o Maea o se alii talavou e tele se lumanai lelei e ono maua mo ia i le lumanai, ae na talosaga le loia a Mafiti o Mike White i le faamasinoga ina ia tuu se isi avanoa mo le ua molia e toe fuatai ai lona olaga.

Ae i le faafinauga a le loia mo le malo o Cecilia Reyna, sa ia talosaga ai i le faamasinoga ina ia faasala Maea i le 10 tausaga, ae faasala Mafiti i le 5 tausaga. Fai mai lana faafinauga, e matuia tele le gaioiga na faia e i laua nei ina ua sosola i tua mai le toese, ma mafua ai ona manu’a le alii leoleopo sa tiute i le faletupe.

Ina ua maea ona iloilo e le faamasinoga faafinauga ma talosaga a itu uma o lenei mataupu, na tuuina mai ai loa lana faasalaga mo Maea ina ia ona tuliina tausaga e 7 i le toese i Tafuna, e faaopoopo i lona faasalaga o loo tuliina nei, ae o Mafiti e 5 tausaga e faaopoopo i lona faasalaga o loo tuli.

O le masina o Ianauri 2010 na tulai mai ai le faalavelave lenei, ina ua sosola i tua mai le toese ni pagota se toafa, ma o latou osofaia ai le leoleopo sa tiute i le faletupe o le ANZ Bank.

O pagota e toafa e aofia ai Maea ma Mafiti ua maea ona lau a laua faasalaga, ma le isi toalua o Sefo Lemalu ma Pati Lepou.

O Lemalu ua maea ona ia ioeina le moliaga o le sola ese mai le toese, ma ua faamoemoe o le aso Gafua o le vaiaso fou e lau ai lona faasalaga, ae o Lepou, sa ta’usala o ia e se vaega iloilo iuga ma ua faamoemoe o le masina fou e lau ai lona faasalaga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.