FAGOGO: O KATI LE LEOLEO NANA

vaega #2

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua toe saofai ai le tama o Kati i totonu o le faleaiga lea na alu muamua i ai ananafi, ma ia maitauina ai loa alii e toalua ia sa latou aai faatasi, ua toe o atu foi i totonu o le faleaiga.]

Na ona savavali atu lava o le aualii e toalua ia e tifatifa atu le la o atu, saofafa’i loa i le isi laulau ma faafesaga’i to’alua ai, ona talo lea i le teine faigaluega e alu atu. “Aumai ni ma steak se lua ma ni ma ipu kofe se lua faamolemole,” o le tala lea a le isi alii sa fai i le tamaitai faigaluega, ae o le isi ana tama, ua aapa atu i totonu o lana ato o loo faafafa ma aumai i fafo le pepa sikaleti o loo i ai, ua tatala ona tuu lea i loga gutu, ua aumai ma le afi ona tutu lea ma faapusa. “Se faamolemole alii, e le faatagaina le ulaula tapa’a i totonu o le faleaiga, e i ai le nofoaga faapitoa i fafo mo i latou e ulaula tapa’a,” o le augani atu lea a le tamaitai faigaluega i le alii lea peitai sa le’i ano lava i ai ae ua atili ai ona faapupusa lana sikaleti. Pe a ma le toa 5 tagata o loo i totonu o le faleaiga i le taeao lea, ma, e leai lava ma se isi o amanaiaina mai amioga a le to’alua lea, sei vagana ai Kati lea o loo faasaga sa’o mai ai lava le laulau o loo gofo ai, o loo faitau lana nusipepa. ma toe tau ai foi i le faasalalauga a le vaega faapitoa a le FBI, lea o loo faasalalau ai ni tagata se toalua e i ai le tomai faapitoa i le suesueina o mataupu tau solitulafono mamafa, atoa ai ma le tau sailia o tino o nisi ua leiloloa mai o latou aiga.

Ao faitau le nusipepa a Kati, na ia vaaia ai ua amata ona fai fai tetele i luga amioga faaletonu a le aualii e toalua ia o loo nonofo mai i le isi laulau, a alu atu le tamaitai faigaluega serve atu le la meaai, ae fetagofi ua fai i ai uiga mataga ma taumafai e toso i lalo lona ofuvae uluulu vae uumi o loo fai. “Soia ete lua amio valea, afai ete lua toe faia le mea lena, o le a ou viliina loa leoleo, “ o le tala lea a le tamaitai faigaluega i le aualii ia, peitai na oso atu le isi o le to’alua lea, “Se vili, kago e vili leoleo, e leai se isi o i maua e fefe igi leoleo, faapea ga o leoleo e i ai gi a lakou faga,” e fai lava tala a le alii lea ma tu i luga ua se’i le fana o loo i le taga o lona ofu o loo fai, ona faalala lea i le tamaitai faigaluega ma fai atu i ai, o lou iuga lea pe a e viliina leoleo,” ma ua avea ma itu ua fefe ai le tamaitai faigaluega, ma alu atu ai loa ua talanoa i lona pule tamaitai, peitai ina ua alu atu i ai le pule i le au ula ia, na taufai fetagofi uma le aualii i a la fana ma faalala i le pule ma fai atu i ai, “E ke fai mai loa i se kala gofo ma le pulufaga i lou fakafaka.” Na vaaia e Kati e foliga mai e matuia gaioiga ia o le a fai e le aualii ia, o le mea lea na tu ai loa i luga ma savali agai atu i le counter mo le toe okaina mai o se isi ana ipu kofe, ae na avea ma itu na fika sese ai loa o ia e le isi o le to’alua lea ma fai atu i ai, “E i ai se mea eke maga’o i ai uso fua i lou la’a mai i luma ii ae le gofo pea i lou gofoa,?”