Login

FAGOGO: O LE TAMA O LE CIA

Na toe valaau faatopetope le isi fono a le komiti faafoe a le Banking Cooperation ina ua maua atu le tusi faamavae a le tama o Eteuati, e pei ona tuu atu i le pule aoao o le faalapotopotoga, le toeaina o Selefuti. O le tusi o loo faaauau i lona agaga faafetai ona o le avanoa sa tuuina atu, na te vaaia ai se tasi o vaega tele o le lala o le faletupe. Sa ia faafetaia foi le komiti faafoe i lo latou talitonugaina o ia i le galuega.

“Ou te talitonu e seasea oo se tagata i lenei tulaga, ona o se tulaga faigata ma manaomia ai se tagata faamaoni, ae ou te faafetai atu i le filifilia o au ma le avanoa sa ou maua ou te galue ai i le galuega, ae o lea o le a tuu atu le masina atoa lenei tatou te galulue faatasi ai pea, ona outou le toe vaai mai loa lea ia te a’u, ae mafai lava ona ou galue mo outou pe afai e manaomia la’u tautua,” o le tusi lea a Eteuati.

Na faailoa foi e Eteuati i lana tusi, afai e i ai se isi taimi e manatu o le a toe manaomia ai lana tautua, ua ofo mai lona taimi e tautua ai mo le faalapotopotoga i soo se taimi e manaomia ai o ia.

O le fono faatopetope la lea ua talo nei a le komiti faafoe, o le a talanoaina ai na o le mataupu e uiga i le tusi a le tama o Eteuati, ma o se tusi foi na faateia ai le toatele o le kamupani atoa ai ma le komiti faafoe.

Na faailoa e le pule aoao o le faalapotopotoga ia Selefuti, o ia e le o malamalama i le mafuaaga ua ala ai ona faamavae Eteuati ma le galuega, e le o manino foi i lona mafaufau le autu o lana tusi faamavae. O vaega na manaomia e le tamaloa o Selefuti e ao ona matua manino, ia iloa poo fea lea o le a alu Eteuati e faigaluega ai pe afai e maea lana tautua i le latou kamupani, ae o fea foi le atunuu e tu ai le kamupani lea o le a galue ai o ia.

Sa ia fia iloaina foi pe fia se totogi ua ofa atu e le kamupani fou lea ua latou mauaina Eteuati e galue ai o ia i lana galuega fou. Na taua e Selefuti, o le atamai lea o loo maua e Eteuati na mafua ai ona latou manaomiaina o ia, e le o se atamai faatauvaa, aua o ia o se tagata e i ai le atamai e faatino ai le galuega, e lei uma le fono ae faia le faaiuga o le a tolopo mo le isi vaiaso, sei ao uma mai faamatalaga e uiga i faamaumauga ua manaomia e le komiti, poo fea tonu lea o le a see atu le alii faapitoa lenei e faigaluega ai.

E faia pea



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.