Login

Tete’e ni isi i le toe tolopo o si’itaga mo totogi amata

ausage@samoanews.com
Se vaaiga atu lena i nisi o tagata faigaluega a le kamupani i’a a le StarKist Samoa, i le taimi o le malologa i le taeao ananafi. (ata AF)

E eseese uma finagalo o nisi o tagata faigaluega o le atunuu na faaalia, ina ua fesiligia e le Samoa News e faatatau i le mataupu e uiga i le tulafono taufaaofi lea ua pasia e le Konekeresi a le malo tele, e aofia ai se vaega e faatelegese ai le toe siitia o totogi amata i le teritori.

O nisi na faafetaia le malo tele ona o le tulaga ua i ai totogi amata i Amerika Samoa i le taimi nei, peitai o le latou talitonuga, ua lava lea ma totoe mo i latou, ae o nisi sa matua faaalia lo latou tete’e i le vaega o le tulafono lea ua toe tolopo ai le siitaga o totogi amata seia aulia le 2015.

“O se taimi umi le 3 tausaga lea ua toe tolopo i ai le siitaga o totogi amata i le teritori, ou te iloa e oo atu i le taimi lea ua maualuga le tau o le soifuaga ua i ai, ae ua le gafatia foi e totogi o loo maua e tagata ona faafetaui le taugata o oloa,” o le saunoaga lea a le susuga Vitale Tufuga mai Aua, o se alii kamuta i se tasi o konekarate faufale ma fai auala i le atunuu.

Ae na taua e Aliitasi Fepulea’i, o se tamaitai faatauoloa i se tasi o faleaiga i le taulaga, sa le tatau lava i le faipule i Uosigitone ona ia talosagaina lenei mataupu, ona e atili ai ona pagatia aiga o lo o maualalo le tamaoaiga i Amerika Samoa.

“Ou te le lagolagoina le tulafono taufaaofi lea ua pasia e le konekeresi, ona o lea ua taofia le toe sii o totogi amata mo le tolu tausaga, ae o loo tumau pea ma agai fo’i i luga le tau o le soifuaga, aemaise ai o lea foi ua sii pili a le falema’i, ua taugata foi le eletise ma le suavai, e faapefea la ona gafatia e tagata le tau o le soifuaga pe afai o lea ua taofi le siitaga o totogi ae alu pea i luga le tau o le soifuaga,?” o le finagalo faaalia lea a Fepulea’i.

Ae i le molimau a Fegauia’i ma Alesana Afamasaga, o se ulugalii e galulue i le kamupani tuuapa o le StarKist Samoa, o le a lava le tulaga e oo i ai gaioiga a le malo ma le faipule i Uosgitione, e uiga i le mataupu o totogi amata, ua sili atu ia i laua le tulaga lea ua i ai totogi amata i le taimi nei.

“Ta te musu e soona fai se tala ina ne’i aafia ai la ma galuega ma si o’u to’alua o loo tausi ai lo ma aiga, ae mo a’u lava ia, ua lava ma totoe totogi ua maua i lenei taimi, e sili atu le mea lea ua i ai nai lo le toe sii o se isi .50sene, ae emo ane le ata ua toe vaea atu ai ma galuega,” o le molimau lea a Alesana, lea fo’i na lagolagoina e lona faletua.

E to’afa isi tagata e galulue i le StarKist Samoa na fesiligia e le Samoa News e uiga i le matuapu lava lenei, ma o latou faaalia ai lo latou lagolagoina o le tulafono taufaaofi ua pasia e le konekeresi.

“Ua lelei foi lea, atonu o le a mafai ai ona toe faamautu tamaoaiga ma tupe maua a kamupani eseese i le atunuu, ina ia oo atu i le isi taimi e toe faaopoopo ai le isi .50sene ua gafatia e tupe maua a kamupani ona totogi matou nei o loo faatinoina galuega,” o le saunoaga lea a le isi alii e galue i le StarKist e le’i finagalo e faailoa lona suafa.

O le vaiaso nei na faalauiloa mai ai le pasia e le maota o sui o le pili taufaaofi a le Senate o le konekeresi, lea o loo aofia ai se vaega e faatelegese ai le siitia o totogi amata i Amerika Samoa seia aulia le 2015.

E ui na matua viia ma faafetaia e le alii faipule ia Faleomavaega Eni sui faipule i lo latou pasiaina o lenei tulafono taufaaofi, peitai i se vaega o lana tusi na aumai, o loo ia taua ai le leai o sona fiafia i le pasiaina o le pili, ona o loo tumau pea lona lagolagoina o le tatau lea ona maua e tagata faigaluega i Amerika Samoa totogi talafeagai, e tusa ai o galuega o loo latou faatinoina.

Ua i luma nei o le ofisa o le peresetene o Amerika ia Barack Obama le pili mo sana faaiuga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.