Login

Maea ona tofia sui o ‘Komiti o Suiga’

ausage@samoanews.com
Se vaaiga i ni isi o sui o le komiti a Lolo ma Lemanu i sa latou fonotaga sa faia i le Aso Lulu na te’a nei i Matu’u, mo le faalauiloaina o Komiti mo Suiga lea ua faamoemoe e amata galulue i le vaiaso fou. (ata AF)

Na fa’aalia e ni isi o le komiti sa lagolagoina le paga a Lolo Matalasi Moliga ma Lemanu Peleti Sialega Mauga, lo latou le manana’o e tuuina suafa o tagata sa i le isi itu, i totonu o a latou komiti.  E pei ona fa’aleo e se tasi o tina, afai o le manulauti a Lolo ma Lemanu e faamuamua tagata, e tatau foi la ona ave le la faamuamua i tagata sa gapatia i le la faamoemoe.

Na faafetaia e Lolo finagalo ma atugaluga o sui o le komiti i lenei mataupu, peitai i lona talitonuga, o faaiuga faapea e na o taitai lava e faia, o le mafuaaga foi lena na tofia ai taitai, o i latou na e faia faaiuga i mataupu faapea.

“O le ma talitonuga ma le afioga i le alii Senatoa ia Lemanu, tatou aapa atu i tua i fanau a le atunuu o lo o i ai le atamai ma le poto, ina ia mafai ona tatou galulue faatasi e fau ai se malo manuia ma se malo lelei,” o le saunoaga lea a Lolo.

“Ta’u mai e oe se tagata o lo o i tua ete silafia o lo o i ai le atamai ma le agavaa e talafeagai ai ona galue i ofisa taitasi nei, ona ma aveese lea o igoa o tagata ua ma tuuina i ai ae tuu i ai le tagata lena, ina ia mafai ai ona manuia le sologa lelei la tatou galuega,” o le isi lea saunoaga a Lolo.

O le aso 6-14 o Tesema ua faatulaga e amata galulue ai le Komiti mo Suiga a le paga a Lolo Matalasi Moliga ma Lemanu Peleti Sialega Mauga, mo le iloiloina o tulaga uma o lo o i ai galuega a le malo i le taimi nei, a’o le’i se’e atu le nofoaiga fou mo le taitaiga o le malo mo le isi fa tausaga, e pei ona fa’alauiloa mai e le Ta’ita’ifono o le Komiti mo Suiga a Lolo ma Lemanu, le afioga Afoa Moega Lutu, i se fonotaga sa faia i le afiafi o le Aso Lulu, i Matu’u.

Na faatumulia le fonotaga i sui o le komiti ma e na lolofi atu latou te fia molimauina ulua’i tofiga ua amata ona agai atu i ai le nofoaiga fou.

E 44 Ofisa eseese o le malo ua maea ona tofia i ai komiti taitasi latou te asia ma vaavaaia, i le lalo o le faatautaiga a taitai komiti ma ona fesoasoani e toalua faapea ai ma totino o komiti taitasi.

O ni isi o Ofisa iloga o le malo e pei o le Ofisa o le Kovana, ua tofia i ai Dr. Oreta Crichton ma Muagututia Leapai Faaola; Matagaluega Tupe ua tofia i ai Falema’o Pili ma Fala Sualevai; Matagaluega o leoleo ua tofia i ai Peseta Dennis Lutu, Saitia Maui’a ma Papalii Marion Fitisemanu.

O le Ofisa o le loia sili ua tofia i ai Ameko Pato ma Faga Fualaau; Matagaluega Tagata Faigaluega ua tofia i ai Le’i Sonny Thompson ma Eseneiaso Liu; Matagaluega Soifua Maloloina ua tofia i ai Dr. Victor Tofaeono ma Tuileama Nua; Ofisa Su’etusi ua tofia i ai Tuika Tuika, ma le Matagaluega Puipuiga Lotoifale ua tofia i ai CMS Iuni Savusa ma Vaito’a Hans Langkilde.

I Ofisa tumaoti e pei o le ASPA ua tofia i ai Utu Abe Malae ma John Utu; O le LBJ ua tofia i ai Dr. Fuata I’atala ma Rep. Faimealelei Anothy Allen.

Na saunoa isi sui o le komiti, afai o se tagata sa galue muamua i se Ofisa o le malo i tausaga ua mavae, e le tatau ona toe tuuina i ai lona igoa i le komiti o suiga lea ua tofia latou te asia lea ofisa, aua o le a atili ai lava ona tulai mai faaletonu i lena ofisa.

Na faamanino e Lolo i le la komiti e faapea, “E le faapea ua tofi oe e te taitai i le komiti o suiga poo se totino foi o le komiti i ofisa eseese a le malo, ona e manatu lea o oe o le a e taitaia le Ofisa lena pe ete galue ai foi, e leai, e leai lava se fesootaiga o a tatou komiti o suiga ma le filifiliga o taitai o ofisa ma matagaluega a le malo, o le faaiuga lena e patino ia maua ma Lemanu”.

O le tiute a komiti o suiga e pei ona faamanino e Lolo i komiti taitasi, e le o le o e sailiili ni faaletonu pe vaavaai po o i ai ni faiga pi’opi’o i totonu o Ofisa ma Matagaluega a le malo, ae o le taumafai e saili le tulaga o lo o i ai le malo e fuafua i ai galuega pe a oo i le taimi e tutulai mai ai mo leisi fa tausaga.

“Ia fai la outou galuega i le loto maualalo, aua ne’i aafia ai isi uso a tagata o lo o galulue ai i totonu o Ofisa a ia fai i auala lelei, aua ne’i faia i ni auala e tupu ai ni vevesi a ia fai i le poto ma fai fiafia a outou galuega, ia maua e outou le galulue faatasi i komiti ma taitai komiti, ma fai a outou galuega ma le faamaoni,” o le saunoaga lea a Lolo.

Saunoa Lolo e faapea, pe ova atu lava ma le ta’i 20 sui o komiti taitasi e le afaina lea i lona manatu, pau lona lagona ia maua uma e tagata le avanoa e fai ai i latou ma sui o le Komiti o Suiga, aua e le o tagata uma sa galulue i le la faamoemoe ma Lemanu e maua avanoa e galulue ai i le malo, peitai afai e maua le avanoa e tautua ai i le Komiti o Suiga, o se tulaga lelei lea mo tagata uma.

Ae na saunoa Afoa e faapea, pau tiute a komiti e fai o le vaavaai o le tulaga o lo o i ai le malo ae le tatau ona vaavaai masei.

“E le o tatou o ni leoleo suesue poo ni FBI, pau la tatou galuega e fai o le sailiili ma vaavaai,” o le saunoaga lea a Afoa.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.