Tofia e Lolo ia Afoa ta’ita’i i lana “komiti o suiga”

Le taimi na faafeiloa’i ai e le Kovana Sili filifilia a le atunuu ia Lolo Matalasi Moliga le afioga i le Aloalii ia Afoa Moega Lutu, ina ua faalauiloa le faaiuga o le ‘run off’ i le aso Lua na te’a nei e manumalo le paga a Lolo ma le afioga ia Lemanu Peleti Sialega Mauga i le tofi kovana ma le lutena kovana. (ata AF)

Ua tofia e le afioga i le Kovana Sili filifilia a le atunuu ia Lolo Matalasi Moliga le afioga i le Aloalii ia Afoa Moega Lutu, e taitai i lana vaega ua taua o le ‘Transition team’, poo le vaega lea o le a sauni atu mo le suiga o tofi o le malo pe a maea le nofoaiga o lo o i ai nei i le faaiuga o le masina fou o Tesema.

I se faatalatalanoaga ma le tofa i le tootoo ia Lolo i luga o le telefoni i le aoauli ananafi, sa ia faamaonia mai ai lea tulaga i le Samoa News.

Saunoa le tofa Lolo, o le fonotaga a lana vaega i le aso Faraile na te’a nei na faamautuina ai lea tulaga.

Sa ia taua foi e faapea, e ese mai i le tofiaina o le afioga Afoa e taitai i le Transition team, ua ia tofia foi le tofa ia Fiu Saelua e taitai i le vaega o le ‘Inauguration team’, poo le vaega lea e talanoaina fuafuaga mo le faauuina o le kovana fou ma le lutena kovana i le tausaga fou.

Ae ui o suiga ua amata ona vavala mai mo le faigamalo fou lea ua olioli latou te taitaia le malo mo le isi fa tausaga, o le ulua’i lu’itau lea ua feagai nei ma le paga a Lolo ma Lemanu, o le leai lea o se tupe e faatupe ai le faamoemoe mo le la faauuga.

Na taua e le tofa Lolo e faapea, ua maea ona faailoa atu e le alii kovana ia te ia, e leai se tupe e maua mai i le malo e fesoasoani ai i le la faauuga.

“Ua uma ona ma feiloai ma le alii kovana (afioga Togiola Tulafono) e uiga i le mataupu lenei, ma ua ia faailoa mai e leai se tupe mo le faamoemoe, o le ala lena ua ou tofia ai loa ai loa le tofa Fiu e faauluulu i le komiti latou te tapenaina fuafuaga mo le faauuga o tofi, ina ia mautinoa e i ai se auala e mafai ai ona faatino lenei faamoemoe,” o le saunoaga lea a le tofa Lolo.

Saunoa Lolo, o le komiti lea ua tofia i lalo o le taitaiga a le tofa Fiu, o le a latou vaavaai i se auala e foia ai le faafitauli ua tulai mai, ma ua i ai le faamoemoe e tatau ona oo atu i le aso Lulu o le vaiaso nei, ua mautu se fuafuaga e faia mo le faamoemoe e pei ona taoto.

Sa ia taua foi e faapea, e le o i ai se faamoemoe e faatele le tapenaga.

O le toatele o le atunuu ua nonofo ma faatalitali poo a suiga fou ia ua sauni atu Lolo ma Lemanu e amata ai le la taitaiga, peitai ua vavala mai i tofiga e lua a le alii kovana filifilia ni isi o suiga o lo o tulimata’i i ai le silasila a le atunuu e fia vaai i ai.

O le aso 3 Ianuari i le itula e 12:00 i le aoauli e pei ona faataoto mai i le Faavae, o le taimi lea e suia ai le faigamalo fou ma faauuina ai loa tofi e pei ona i ai i le taimi nei, ae o le aso 31 o Tesema o le tausaga nei e tatau ona oo atu i ai ua faamavae uma sui o le faigamalo o lo o taitaia le malo i le taimi nei.