Login

Faiaina Manu Samoa ia Farani i se ta’aloga finau

ausage@samoanews.com

Na faai’u le ta’amilosaga a le Manu Samoa i le aso To’ona’i na te’a nei i le atu Europa ina ua faiaina i le au malosi a Farani i se taaloga finau, i ‘ai e 22-14. E lua sikoa a le Manu Samoa i le tasi a Farani, peitai o  ‘ai na maua i sala na vaaia ai le eseesega o le taaloga.

O ‘ai a Samoa na maua i le sikoa a le kapeteni o le Manu, David Lemi le uigi #14, ma le sikoa a le loka o Joe Tekori, a’o ‘ai a Farani na maua i le sikoa e tasi a le alii o Frederic Michalak, lea na kikiina uma sala ma manumalo Farani.

E ui i le manumalo a Farani ia Samoa, ae i tusitusiga na mafai ona faasalalau i luga o initaneti mai Farani faapea ai atunuu eseese o le lalolagi e faatatau i lenei taaloga, sa taua ai le faaletonu o Farani i le amataga o le taaloga e tau saili ona avanoa e faato’ilalo ai le malosi ma le lelei o le au a le Manu Samoa.

I se faatalatalanoaga ma le au faasalalau i totonu o Farani, na taua ai e le faiaoga a le Manu Samoa o Stephen Betham le faiaina o lana au ona o le tele o a latou faaiuga sese sa faia i le taimi o le taaloga.

Fai mai Betham, “o se taaloga finau, sa lelei le taaalo a le Manu Samoa, lelei le faatulagaina o sikalamu, sa i ai foi lo latou avanoa e manumalo ai ia Farani ae na misi ona o le sese o a latou faaiuga sa faia.”

Ae na taua e le alii kapeteni a Farani o Michalak e faapea, “i le mae’a ai o le matou taaloga ma Samoa ua manino mai ai le tele o galuega e tatau ona toe faia i le matou au, ma matou faaletonu mai lava i le amataga o le taaloga ona o le malosi o le pu’e ma le faatautino a Samoa, peitai nai avanoa sa matou maua lea ua matou manumalo ai.”

O le faatolu ai lea ona taaalo o Samoa ma Farani, ua faatolu foi ona faiaina Samoa. O le taaloga muamua i le 1999 i le Apia Park, na faiaina ai Samoa i ‘ai e 39-22, sosoo ai ma le taaloga i le 2009 i le malae lea na taaalo ai i le aso Toona’i na te’a nei, ma toe faiaina ai i ‘ai e 43-5.

O le taua o taamilosaga a au lakapi a le lalolagi o lo o faagasolo i le taimi nei, o le a mafai ai ona maua tulaga lelei o au a’o lumana’i ai le faatulagaina o le lisi (draw) mo ‘pool’ e ta’aalo ai au mo le Ipu o le Lalolagi i Enelagi i le 2015.

O nei lea ua faamoemoe le Faalapotopotoga o Taaloga Lakapi a le Lalolagi, le IRB e tatau ona toe tuu mai ai se isi suiga i le faatulagaina o au a le lalolagi i luga o le latou lisi o lo o i ai.

O lo o tumau pea Samoa i le tulaga 9 i le taimi nei, ae o Farani i le tulaga 4.

O le Aso Lulu lea ua faamoemoe e taunuu ai i Samoa le au a le atunuu ma le pulega, sei vagana ai lava isi sui o lo o i ai i a latou konekarate na toe foi lava i kalapu o lo o taaalo ai ina ua maea le taaloga i le faaiuga o le vaiaso na te’a nei.

E toalua sui o le Manu Samoa o lo o aofia o la igoa i le lisi o le au Taito’a 7 lea ua faamoemoe e tausinio i le taamilosaga taito’a 7 a Dubai ma Georgia i le vaiaso nei ma le vaiaso fou, o i laua ia o Reupena Levasa ma Paul Perez.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.