Login

Manu’a Flag Day Church Service

reporters@samoanews.com
[photo: Leua Aiono Frost]

I le sauniga fa’apitoa e fa’amanatuina ai le Tu’uina aloa’ia mai le Manu’atele i le pulega a le Malo tele o Amerika, ma ua latou talia ai fo’i e sisia i o latou laueleele le fu’a a Meleke, auai uma Ta’ita’i o vaega e tolu o le Malo Fa’ateritori o Amerika Samoa: Fono Faitulafono, Vaega o Fa’amasinoga ma le Faigamalo i lona Taiulu. Na autova’a uma mai fo’i le Manu’atele i ana Fa’afeagaiga Taulagi e to’atolu sa tofu sao i le fa’atautaiga o le Saunia, Rev. Fa’avae Fa’ata’ita’i o Fitiuta ma Rev. Iosefa Autele o Faleasao ae na ta’ita’ia e le susuga le Faifeau Toea’ina Dr. Fa’ata’ape Lavata’i.

O aufaipese uma sa latou peseina vi’iga o le Atua i lenei sauniga e sa pa’au mamao mai ai le Aufaipese EFKAS i Ta’u, Manu’a, Aufaipese EFKAS i Faga’a’alu, Aufaipese CCJS i Kokoland ma le Aufaipese EFKAS i Atu’u. Matagofie lea sauniga ae sa fa’ai’u i se upu fa’amanuia mai le Faigamalo i lona Sui Kovana Faoa Ipulasi Sunia lea na ia fa’apea ai: “E ui ina tatou finagalo eseese i le fa’atautaiga o le tatou Malo ua tautuaina fa’atasi i tatou, ma ua to manatu nisi e ao ina tuto’atasi Manu’a i lalo o le Iunaite Setete o Amerika, o nisi o manatu ina ia faia pea e pei ona i ai, ae a aumai le tupe ona vaelua tutusa lea ma Tutuila, ae o nisi o lo ua manatu, ia alu ai pea e pei ona i ai nei. Po’o le a lava le faiga e fa’atautaia ai le tatou Malo, e le ‘asa lava so’o se faiga ma ni fa’afitauli. O mea e tutupu lava i lenei olaga.”

Na ia fa’ailoa le tele o mea o lo’o tatau pea ona fa’aleleia atili mo le Manu’atele, ae ona o le tulaga fa’aititia pea o tagata e alaalata’i mai i le Manu’atele, ua atili ona fa’atuai ai ona fa’atino e le Malo. O mea e ao ina fa’aleleia atili: “O falema’i, fausia falea’oga tetele, alatele ia lelei mo feoa’iga, o le feoa’iga i le va o Manu’a ma Tutuila e ala i va’alele ma va’a alalo, ua tatau lava ona fa’aleleia atili, ae o le sa’iliili pea lava le afioga le Kovana Sili i lenei tautua ia fa’aleleia vave nei tautua mo le Manu’atele.”

“Po’o le a lava le tautua o mafai ona fa’atino i le taimi nei, ae o Tutuila ma Manu’a ua tasi lava lo la’ua faigamalo, ma ia le motusia lea so’otaga, ae ia fa’amalosia pea, ina ia ala mai ai pea fa’amanuiaga a le Atua ia i tatou uma lava. Tatou tau fai tatalo mo le manuia o le Manu’atele!”



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.