Login

Tala o Faamasinoga

ausage@samoanews.com

SILOMA SIOTALIMA

Ua fa’amaonia e le ali’i na tu’ua’ia i lona fa’amalosia o se teineititi e 16 tausaga le matua, e ala i lona aveina o ia i luga o le ma’umaga ma la nonofo ai mo ni masina, ia tuuaiga a le malo faasaga ia te ia.

Na fiu le aiga o se teineititi e 16 tausaga e tau saili o ia, ae na maua mulimuli ane ona maua le tala, o lo o nonofo ma le ula lenei o Siloma Siotalima i luga o le ma’umaga, i le va o le masina o Iulai ma Novema o le tausaga na tea nei.

E 8 moliaga na uluai tuuaia ai e le malo ia Siotalima, na aofia ai moliaga e 5 o le faiaiga ma se teineititi e laititi i lalo o le tulafono, tasi le moliaga o le faia o amioga mataga, tasi le moliaga o le tagofia o itutinosa o se tamaitai, ma le moliaga mama e tasi o le faia o gaioiga e ono lamatia ai le saogalemu o se fanau.

Ae i lalo o se maliliega  ua saini e Siotalima ma le malo, ua ia ioeina ai le moliaga o lona faia o ni uiga mataga faafeusuaiga i se tamaitai e laititi i lalo o le tulafono, ae ua solofua ai isi moliaga e 7.

O lo o taofia pea Siotalima i le toese i Tafuna a e faatali ai le aso e lau ai lona faasalaga.

FAAMANU AOKUSO

O le aso 3 Aokuso lea ua faatulaga e lau ai le faasalaga a le alii o Faamanu Aokuso i luma o le Faamasinoga Maualuga, ina ua ia ioeina le moliaga o le faia o ni uiga mataga faafeusuaiga faasaga i se tamaitai e 16 tausaga le matua.

Na uluai tuuaia Aokuso e le malo i moliaga o le faiaiga faamalosi, tagofia o itutinosa o se tamaitai, faiga o uiga mataga faafeusuaiga, atoa ai ma lona faia o gaioiga e ono lamatia ai le saogalemu o se fanau e laititi i lalo o le tulafono, ae i lalo o le maliliega sa ia sainia ma le malo ma ua talia foi e le faamasinoga, ua ia tali ioe ai i le moliaga e tasi ae solofua isi moliaga e tolu.

Na tuuaia faatasi Faamanu ma le faiaoga o le au fusu na malaga mai i Samoa, susuga Lautapaa Wong King, peitai ina ua maea le uluai iloiloga sa faia, na toe faaui ai i tua moliaga mamafa faasaga i le alii faiaoga, sei vagana ai le moliaga mama o le faaoolima na ta’usala ai o ia, i lona pa’i lea i le tino o le tamaitai na aafia.

Ua toe foi atu nei i Apia le faiaoga o le aufusu a Samoa ma le tuutuuga a le faamasinoga, e lua tausaga ua faasa ai o ia ona toe ulufale mai i le teritori, o le umi foi lea ua faanofovaavaaia ai o ia e le faamasinoga faaitumalo.

O lo o taofia pea i le toese Aokuso e faatali ai le aso 3 Aokuso e lau ai lona faasalaga.

TOLOPO MATAUPU A LE GRAND FATHER TUUAIA FAIA UIGA MATAGA

Ua talia e le Faamasinoga Maualuga le talosaga a le malo ina ia toe tolopo le uluai iloiloga o le mataupu o lo o tuuaia ai se tama matua e 75 tausaga lona matua, ona e le’i mae’a ona tauaao e le malo mau faamaonia o le mataupu e pei ona tuuaia ai o ia.

O le vaiaso na te’a nei na faatulaga ai le uluai iloiloga o lenei mataupu peitai na faailoa e le loia a le malo o Mitzie Jessop i le faamasinoga, e leai ma se mea molimau ua tuuina atu e le malo i le itu tete’e, ma e manaomia le toe tolopo o lenei mataupu.

O le aso 20 Iulai lea ua toe tolopo i ai lenei mataupu ma le faamoemoe, e tatau ona oo atu i ai ua maea ona faatino manaoga e pei ona talosaga ia i loia.

E le o faalauiloaina le suafa o le tama matua o lo o tuuaia, ona o puipuiga i le ono mafai lea ona iloa ai ma le tamaitai o loo aafia.

O lo o tuuaia o ia i moliaga e fa e aofia ai le faia o uiga faasotoma, faia o gaioiga mataga faafeusuaiga, tagofia o itutinosa o se tamaitai, faapea ai ma le faia o gaioiga e lamatia ai le saogalemu o fanau laiti.

O lo o taofia pea o ia i le toese i le taimi nei sei vagana ua ia totogiina le $30,000 na faatulaga e le faamasinoga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.