Login

FA’ATAUA ARTS COUNCIL GALUEGA TAULIMA A LE ATUNUU

ausage@samoanews.com
Ni isi o tina matutua ua maea ona lesitalaina o la suafa i le tauvaga a le Ofisa o le Arts Council mo le Faaaliga o Galuega Taulima, lea e pei ona faagasolo mo le tolu aso i le nofoaga o le Arts Council i Fagatogo. (ata AF)

E tolu aso o lo o faagasolo ai le faaaliga o galuega taulima o lo o gaosi i totonu o le atunuu, lea e pei ona faatautaia e le Ofisa o le Arts Council i Fagatogo.

O lenei polokalame e le gata e faalauiloa ai galuega taulima o lo o mafai ona lalaga pe vaneina fo’i i le atunuu, ae o le a faataua ai foi ma lenei ituaiga tautua i le atunuu, e pei ona faia i tausaga taitasi i lalo o se polokalame o lo o faatupe mai e le Feterale.

Na taua e se sui o le Ofisa o le Arts Council e faapea, o lenei polokalame e faia i le masina o Oketopa o tausaga taitasi, ae talu ai le toatele o i na pisi i tapenaga o le palota atoa ai ma polokalame mo le Lotu a Tamaiti na mae’a atu nei, na manatu ai loa le Ofisa e tolopo lenei fuafuaga e faia i le vaiaso nei.

O lo o aofia ai i lenei faamoemoe se tauvaga i galuega taulima lalaga e pei o pulou, ili faapea ai ma ula pule.

O le aso ananafi na amata faalauiloa ai galuega taulima a ni isi o tina matutua i le atunuu, ma faaauau mai ai i le aso ma le aso e taeao.

E ese ai i faaaliga o galuega taulima, o le a maua foi le avanoa e faafofoga ai i faafiafiaga o pese faa Samoa, ma ni isi o tagata pese lauiloa i le atunuu, lea ua faamoemoe e faia i se taimi o le aso, ma faaiu ai loa i le tauvaga pese taitoatasi i le aso a taeao i le malae i Fagatogo.

O le autu o lenei faamoemoe e pei ona faia i tausaga uma, o le taumafai e fesoasoani i le atina’eina lea ma le faaleleia o taleni i le lalagaina lea o galuega taulima, atoa ai ma le vaneina o galuega taulima i laau.

O lenei polokalame o lo o faapitoa mo tagata o lo o i ai lenei taleni i le atunuu, ae le o aofia ai fanau aoga.

O ni isi o au faafiafia o le a maimoa i ai le atunuu i le po o le aso Faraile e aofia ai Faalapotopotoga o tagata Fiti, Filipaina, Tonga, Kolea ma Samoa nei.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.