Login

Fa’aititia So’ona Puputa o Fanauiti

reporters@samoanews.com
O se va’aiga i le fuaina o le umi ma le mamafa o le tama’ita’i o Diana lea o lo’o avea lona tina ma sui e fa’atonutonu ma fa’atulaga le tamaitiiti i lalo o le fua o le umi. O Ursula Te’o Martin lea o lo’o fesoasoani ina ia fa’amaumau a la’ua faitauga mo Diana. [ata: Leua Aiono Frost]

Polokalama “Olaga Maloloina o le Fanauiti”

Na amatalia i le aso Faraile le Semina e feutaga’i ai i latou o fa’aautu i ai a’oa’oga tau le tausiga lelei o fanau, ina ia le so’ona puputa pe mamafa pauna a’o itiiti, ma ono o’o po’ia ai i latou i fa’ama’i tumau e aofia ai le ma’i suka ma le totomaualuga, kanesa ma tele o le ga’o i le toto.

O sui iloga i ituaiga A’oa’oga Amata a le fanau, o sui mai le Polokalama o Mea’ai Paleni mai le Land Grant, o sui fo’i mai fafo sa o’o atu ina ia fa’ataoto se alafua e mafai ona usita’ia i a’oa’oga nei, ia le toe so’ona fagaina le fanau, ma so’ona puputa ai a’o laiti i latou i le va o le 2-7 tausaga.

O sui iloga mai fafo, sa o’o mai ai le tama’ita’i sa ia fa’atula’ia Dr. Rachael Novotny, lea sa la’ua va’ava’alua ma se tasi o ana soa Dr. Marie Kainoa Fialkowski mai le UH Manoa,  e fa’atulaga le polokalama “Olaga Maloloina o Fanauiti,” lea ua tatou sauni e mulimulita’ia, e toe fa’afo’ia ai le mamafa tele o tatou fanau ua i ai i le taimi nei.

Ina ua amata fofola mai lea polokalama, ua iloga ai, e maua sina seleni mo fanau e fa’ata’ita’ia ai ona ao mai fa’amaumauga, e tau fa’atulaga ai, po’o le a le tele o le afaina o i ai i tamaiti Amerika Samoa i le taimi nei, ma fa’aaoga loa i ai le fomula fa’ataoto lea ua o mai ma le “Children’s Healthy Living,” ona toe mataituina lea o se suiga o i ai i lea fa’afitauli.

Ua a’otau nei le vasega o e fa’atinoa le tiute o le amata fa’ailoa atu i Matua o fanauiti ia fa’amaumau mai mea’ai ma vaiinu po’o le vai o lo’o inumia e latou fanau, ua i ai le tama’i tusi e faia ai lea faiva. A uma, ona fa’ao’o mai lea o le api o fa’amaumauga lea, ma se uati sa fa’amau i le iloa o lana tama, e iloa ai lea aso ma lea aso, ma lea itula ma lea itula i mea sa faia e le tamaititi. I le api, e ao fo’i ina fa’amau i ai taimi moe, taimi ta’alo, po’o a ta’aloga, po’o taimi faitau tusi, mea uma lava sa faia e lau tama mo le lua vaiaso lea e taulima ai le uati.

Pe afai e mae’a ona fa’ao’o mai lea o le uati ma le api o fa’amaumauga, e toe maua sina seleni fo’i mo le matua ma lona alo. Ua taumafai nei e fa’aofi i totonu o a’oga fa’ata’ita’i ma nofoaga o Day Care lea faiga aoga, e mafai fo’i ona i ai se vaega o le api e fa’amaumau mai e le Faia’oga, po’o le Tausitama i le Day Care, ma le matua fo’i i taimi o lo ua i ai lana tama i le fale.

Afai ae fa’afaigata ona fa’aofi lea su’esu’ega ma fa’amaumauga mai totonu o le Matagaluega o A’oga, e mafai ona tu’usa’o lava i le vasega o Ekalesia ma Nu’u ona o aiaiga fa’aletulafono.

Peita’i, e aoga tele lea taumafaiga ua amata mai e le Land Grant ma ua o gatasi lelei lea fomula ma le mau sa tausisia mai e le Fonotaga tele a le Governor’s Early Childhood Education mo le lua aso o le vaiaso ua te’a. O le tima’i lea ua amata mai i le lua tausaga, ae pei ona fa’aalia i manatu o le au usufono sa auai i le tatalaina o lea a’oa’oga i le aso Faraile, “E leai, o le vave e tatau ona tima’i ai matua, ia le so’ona puputa na’ua le fanau, o le amata mai i le fanau mai, ma e ao ina faia ai se sao o le DHSS ma lana polokalama mo fanauiti, WIC ma le Child Services.”
Manatua o le ki atoa i nei taumafaiga uma, o le galulue fa’atasi, po’o le so’o tau’au o nei auaunaga uma, ma aga’i ai i luma ona soloia se fa’afitauli ua mataituina e le atunu’u, ua loa ona feagai ma o tatou tagata e afua mai lava i lo latou avea ma fanauiti se’ia o’o ina matutua, ua matua faigata lava ona toe soloia ma fa’afo’ia.

Na i ai le vasega o fanau na o’o atu i le Land Grant ina ia fuaina ma taulima o latou uati, e fa’ata’ita’ia ai lea fo’i galuega amata, a mae’a ona fa’ato’a fa’aulu mai lea i nu’u ma fa’alapotopotoga e pei o Ekalesia pe afai e faigata ona fa’aulu vave i A’oga ma Day Care a le Malo.

O i latou nei ua faia ai fa’ata’ita’iga o le fuaina o le mamafa, fua fo’i le maualuga, va’aia lelei meafaigaluega ia sa’o lelei ona fa’atulaga ma ia levo, na fa’apipi’i loa ma uati nei e fuaina ai so’o se mea lava e fa’atino e le tamaitiiti i taimi uma mo le vaiaso atoa.

Pe afai e fa’amau i le lima o le tamaitiiti lea mita, o se meafaigaluega taugata, ma e aoga lea mo fa’amaumauga mo’omia, e o’o fo’i i le tele o mea na fua muamua e sui o le polokalama ma matua. O nei fa’amaumauga, e mafai ona fa’ailo ai se suiga lelei, o le a o’o i le tamaititi ina ia masani i le ola paleni o lona tino ma lana tausiga lelei.

O le isi mea sili ona aoga, ona ua mafai ai ona mua’i va’aia ni fa’ailo, o se alo ua amata ona maua i le ma’i suka, ma taumafai loa e togafitiga e ala i tausami paleni ma le fa’amalositino a’o le’i o’o ina afaina tele pe afai ua matua.

O le a fa’aauau lea semina aoga tele mo le aso i le Potu Fono o le Land Grant i le Kolisi Tu’ufa’atasi o Amerika Samoa.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.