Ads by Google Ads by Google

AISEA TO’ATELE AI TAGATA PALOTA MO FAIPULE AE ITIITI MO LE KOVANA?

O le faaiuga o le palota lautele a le atunuu lea na faatoa mae’a atu nei, ua lagalaga ai ni manatu ma fesili a le toatele o le au palota, i le mafuaaga e ala ai ona toatele atu tagata e palota i tofi faipule a ni isi o itumalo, nai lo tagata e palota i le tofi kovana poo le sui foi i Uosigitone.

O lea fesili na alia’e mai ina ua vaaia se tulaga ese i le palota a le Itumalo #15 a Tualauta, i le silia lea ma le 2,000 tagata palota e lei palota i le tofi kovana, ae na palota i le tofi faipule.

E tusa ai ma faaiuga o le palota mo le itumalo o Tualauta i le sailia o ni a latou tofi faipule mo le maota o sui i le Fono Faitulafono, o lo o taua ai le aofai e 4,734 o tagata sa palota mo le tofi faipule, ae na o le toa 2,411 na palota mo le kovana ma le lutena kovana, ona tulai mai ai lea o le eseesega tele e 2,323.

O le afioga i le alii faipule ia Larry Sanitoa lea ua toe manumalo mai i le isi nofoa o le itumalo, ae o Florance Saulo lea ua manumalo i le nofoia o lo o nofoia e le afioga Tapumanaia Galu Satele Jr.

O le isi eseesega sa maitauina lea i le palota a le Itumalo #14 o Alataua, e pei ona taua ai le toa 498 na palota mo le tofi faipule, ae toa 452 na palota mo le tofi kovana, tusa lea e 46 e toatele atu ai tagata sa palota mo le tofi faipule nai lo le tofi kovana ma le lutena kovana.

E le na o le pau lea o itumalo o lo o tulai mai ai lea tulaga, e pei ona maitauina i faamaumauga sa tuuina mai i le Ofisa o Palotaga i le po na mae’a ai le palota.

Na taua e ni isi o le au palota e faapea, o le mea lenei e tupu soo lava i tausaga palota uma, ae le iloa poo fea e mafua mai ai.

E le’i manuia taumafaiga a le Samoa News mo se avanoa i le Komesina o Palotaga, le afioga i le Maopu ia Soliai Tuipine Fuimaono, i sona finagalo e faamanino ai lenei mataupu, peitai na taua e se tasi o tamalii o le atunuu ua tele o tausaga o aafia i tulaga faatosina ma komiti a ni isi o sui tauva i tausaga ua mavae, o le isi mafuaga o le faafitauli lea, o ni isi o tagata e fiafia e palota mo le tofi faipule o le itumalo, ae a oo atu loa i le tofi kovana ma le lutena kovana e lei mautu sana faaiuga poo ai e palota i ai, ona te’i a lea ua musu e palota.

“O se faiga letatau lea faiga, e atagia ai atu le le manatu mamafa o tagatanuu i le aia tatau o lo o ia te i latou,” o le saunoaga lea a lea tamalii o le atunuu e lei finagalo e faailoa lona suafa.