Login

TALA MAI SAMOA

MALIU INA UA TOFU TAAVALE TOFE I TIAVI
O lo o faaauau pea suesuega a leoleo i le faalavelave na tulai mai i le aso Tofi o le vaiaso nei, lea na maliu ai se alii mai Amerika ina ua tofu lana taavale i se tofe i Tiavi, i le vaega tonu lea e i ai le mata’aga o le afu i Tiavi. Na faaalia e faapea, sa alu atu lea alii Amerika i lana taavale, ae i tua o le auala pasi mai le pa uamea lea e masani ona tumutumu i ai maimoaga ma puega ata, ma faasasao loa i le tofe.

Na faamautu mai e le komesina lagolago, le susuga Leaupepe Fatu Pula e faapea, ua maliu lea alii ma o lo o masalomia sa pule lea alii i lona ola. Sa faigaluega ai sui o le vaega o le Tinei Mu ma Faalavelave Faafuasei i le tau sailia o le tino o lea alii i le tofe na pa’u i ai lana taavale ma faatoa maua i le te’a o le 12 i le vaeluaga o le po.
 

MOLI TAUMAFAI NANA MAFUAAGA MALIU LONA TOALUA

O le aso 19 o le masina nei o le a tulai ai i luma o le faamasinoga le tama mai Toamua lea sa ia lipotia i leoleo e faapea na maliu lona toalua ina ua pule i lona ola. Peitai ina ua suesueina e leoleo le tino maliu o lea tina, sa latou maua ai ni mailoga o ni tulaga lima o se tagata ma e foliga mai sa titina e se isi lea tina. Na logoina leoleo i lea faalavelave e faapea, o se tina mai Toamua ua pule i lona soifua.

Sa suesue e leoleo lea mataupu ma iloa ai sa i ai se feeseeseaiga i le va o lea tina ma lona toalua ma sa faaoolima ai lea tama i lona toalua. Ua molia nei lea tama i le fasioti tagata faamoemoeina ma e ono molia foi o ia i le tala pepelo ma le taumafai e nana le mafuaaga tonu o le maliu o lona toalua. O le tina ua maliu e 29 tausaga o lona soifua mai le afioaga o Vailoa, Aleipata ma sa nonofo ma lona toalua i le aiga o lona toalua i Toamua.
 

LE FIAFIA TOATELE I LE LEAI O NI FAIGAMALAGA I TUTUILA

O le aso Faraile ananafi na atoa i ai le tolu o aso sosoo e lei toe malaga se vaalele a le Polenisia mai le malae vaalele i Fagalii mo Pago Pago, Amerika Samoa ma o lea faaletonu ua le fiafia ai le faitau selau o tagata sa fuafua e malaga i le teritori i faigamalaga masani a le Polenisia. Na faaalia e le alii pule o le Polenisia, le susuga Taua Fatu Tielu e faapea, na taofia a latou faigamalaga i le aso Lua ona o se faaletonu i se tasi o afi o le vaalele.

Na faamalamalama mai e Taua, o le afi o lo o faaletonu e tatau ona suesueina auiliili ma faataitai faatele, faatoa mafai ai ona toe malaga ma se pasese. Na toe saunoa Taua, e le mafai foi ona faaaoga le isi a latou vaalele ona o lo o toe vali. E lei mafai ona ia faamautuina mai po o afea o le a toe faaauau ai faigamalaga i Amerika Samoa ma sa ia faamalulu i le toatele o le pasese sa totogi o latou pepa malaga i faigamalaga a le Polenisia mo le teritori. Ae le na o le Polenisia o lo o faaletonu ana faigamalaga i le taimi nei.
 

FAAVAE SE AULOTU EFKS FOU I NU’U

Ua faatuina nei se aulotu fou a le Ekalesia Faapotopotoga Kerisiano i Samoa i le afioaga o Nu’u lea sa faia ai se sauniga lotu faapitoa i le aso Sa ona sei mavae atu nei. O le faafeagaiga ua galulue ai nei o le susuga ia Letaulau Pesaleli ma le faletua ia Tina ma nai o la alo e toalua. I le sauniga i le aso Sa na tea nei lea na taitaia e le susuga i le Toeaina o le pulega a Faleata, le susuga Faauuga Matautia, ae o le lauga na fofogaina e le susuga i le Toeaina Faatonu o le matagaluega a Faleata, le susuga i le Toeaina ia Tavita Anesone.

Na saunoa le susuga i le faafeagaiga ia Letaulau Pesaleli, o lana aulotu EFKS ua i ai nei i Nu’u, o lo o i le faamalumaluga a le pulega a Faleata, i le polokalama faamisiona a le ekalesia ma o le uluai taimi lenei ua faatuina ai se aulotu i lalo o lea polokalama, e pei ona ua faatauina ai e le ekalesia le lua eka o fanua aua lea faamoemoe, ma o se taimi o muamua o lo o fuafua e faatuina ai se malumalu a le ekalesia pe a agai atu i se tulaga mautu ma le maopopo mulimuli ane
 

FAAILOA PULE N.U.S MAFUAAGA LE SU’E AI ISI TAMAITI AOGA

Ua tali mai le alii pule o le Iunivesete Aoao o Samoa, le susuga Fui Leapai Asofou Soo e tusa ma le mataupu lea ua matua vevesi ai le toatele o tamaiti aoga o le iunivesete faapea o latou matua, ona ua le mafai ona sue a latou fanau ina ua le maea ona totogi a latou pili aoga, i le aso Faraile o le vaiaso na tea nei lea na faagata ai le totogiina o pili aoga.

Na saunoa le alii pule, e le toe i ai lava se avanoa mo i latou e toa 327 e lei maea ona totogi o latou pili, e toa sue ai a latou suega mo lenei tausaga. Peitai, e mafai ona faatali seia aulia le tausaga fou ona toe aooga lea, ae e ao lava ona totogi maea a latou pili tuua faatoa mafai ona toe resitala e aooga. Na taua e Fui, o le lisi o i latou e lei maea ona totogi a latou pili, e oo lava i le tausaga e 2007 o lo o i ai i latou o lo o nonofo aitalafu i a latou pili aoga ma e silia ma le $300,000 le tinoitupe lea o lo o i tua mai pili aoga. Fai mai a ia, o se tupe tele lea tupe ma e faamoemoe i ai le iunivesete i lona faagaioiga.

Saunia: L.A.F./Naenae Productions



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.