Ads by Google Ads by Google

Tala o le Vaifanua

TAPUNIA OFISA AMEPASA O SAMOA?

Ua lua aso atoatoa o gasolo mai le mamalu o le atunu’u, laulaututu ma fesilisili solo po’o fea tagata faigaluega i le Ofisa o le Emepasa o Samoa i luga o le Fale Fogafalelua o le Iupeli Siliva - Ekalesia Metotisi i Fagatogo.

O le tali, o lo’o i ai le pepa o fa’apipi’i ai, ae le fa’atalia ai le tele o mataupu e fia fa’atautaia mo nai tagata femalaga’i, o le afuaga fo’i na ala ai ona tatala lea lava ofisa mai lona amataga.

Ua fesiligia nei, po’o fea la o i ai tagata faigaluega? Ua fa’ailoa mai e nisi o Kamupani va’alele, ua mae’a fesiligia e i latou le Ofisa autu o Femalaga’iga i Samoa, po’o fea o i ai le susuga Mata’afa Tomasi ma lona faletua fa’atasi ai ma se tasi o tama’ita’i e masani ona tautuaina tagata lautele i’inei?

Ua fa’ailoa mai, “O lo’o si’ima’i mai Mata’afa Tomasi ma le faletua, ona o le tama lea e i ai sona mana’oga tupito tau le soifua maloloina, ae e tatau lava ona tatala le Ofisa e le tasi o le aufaigaluega i’ina!” Ona saili lea, ae ua fa’ailoa mai e le Ofisa i autafa ane o lea Ofisa o le Emepasa, “Ua fa’ailoa mai e si tama’ita’i lena e latou te to’atolu, ua lavea le ta’avale ma ua le pa’au mai ai i le ulua’i aso, le Aso Gafua lea.”

Peita’i, o lea ua alu atu ai ma le aso Lua, ua atili ona fa’ateleina fa’aletonu i feoa’iga o tagata lautele, ae maise ai i tulaga o pemita mo tagatanu’u o Tutuila ma Manu’a e ulufale ai i Samoa.

O le faiga lenei ua i ai nei! Ua mafai ona e o’o atu i le Ofisa va’alele e te fia malaga i Samoa ma e fa’asaga ane tama’ita’i tautua lelei o le Kamupani a le Polenisia lisi i lalo lou suafa ma fa’ao’o atu i fax i Samoa i le latou Ofisa i Fagali’i, ma o i’ina la e fa’asau ai le kilia e te alu atu ai lava i Samoa fa’ato’a totogia ai lau $10US i Fagali’i ma e ulufafo atu ai i o latou laufanua mo au fuafuaga fa’agasolo o lau malaga.

Ua o gatusa lava lea faiga a le Polenisia ma le Kamupani Va’alele fo’i a le Inter Island Vacations, ma o le a le taofia ai lou tu’uva’a atu i Samoa ona ua tau fai leai le aufaigaluega mamalu a le Ofisa o le Emepasa o Samoa.

Ua faia fo’i galuega alofa a nai Ofisa tulata ane i lea ofisa o le taulogologo i nai tagata fesuia’iga o lo ua i ai nei sia ofisa, ma ala ua fesoasoani ane ai Kamupani Va’alele mo femalaga’iga, peita’i, afai o sou avanoa e fia fa’afou ai lou Tusi Folau ma isi mea fa’apena mo tagata nu’u o le Malo Tuto’atasi o Samoa, ia e tatalia na galuega uma, se’i toe tatala tumau le Ofisa o le tatou Emepasa.

Tau ina ia talosia le fa’atafa gasegase o le Emepasa ma lana aufaigaluega fo’i, ia vave ae toe tatala le tautua mo i tatou uma o lo’o mo’omia le latou fesoasoani malosi mai!

SAUNIGA LOTU O LE FU’A A MANU’A I LE FALE LAUMEI

O lenei tausaga ua fa’aauau ai ona tatou fa’ailogaina le aso patino na fa’ato’a tu’u aloa’ia atu ai e le afioga le Tuimanu’a ona eleele ma ona tagata e pulea e le Malo Tele o Amerika talu mai le tausaga e 1904 ia Iulai 16.

O lenei ua atoa lelei le 108 tausaga talu ona osia lea feagaiga tau pulega o malo, ma ua fa’amanatuina fo’i e le Malo o Amerika Samoa, ua avea ma aso Malolo mai galuega a le Malo, Iulai 16, 2012 o le aso Gafua lea o le vaiaso a sau.

Peita’i, ua fa’atulaga e Ta’ita’i ma le faigamalo le Sauniga Lotu tele i le Fale Laumei i Utulei, e vala’aulia fa’apitoa uma ai tagata uma o le atunu’u ae maise o tagatanu’u uma e afua ma tupuga mai le pa’ia o le Manu’atele, ina ia auai i lea sauniga fa’afetai i le Atua Soifua, i lona alofa ma le agalelei ua aulia ai e i tatou lea fo’i aso i lenei tausaga.

“O se fa’amanatuga o le agalelei o le Atua, o le aso e fa’afetai ai ona o le tele o manuia o lo ua sasa’a pea e le Atua i le Manu’atele, e afua mai fua o fa’aeleeleaga ma le gataifale, ae tainane o manuia e ala i alo ma fanau ua a’oa’oina i tomai ma taleni, ae maise lava o le soifua ma le malosi o lo’o maua pea e tagata uma e o’o mai i lenei aso atofa na tutupu ai nei mea tetele i le 108 tausaga ua tuana’i.”

Ua fa’ailoa mai, o le a leai se fa’amanatuga o le Fu’a a Manu’a i le lotoifale o Manu’atele i lenei tausaga, ua le o i ai le afioga le Kovana Sili i lo tatou malo i le taimi nei, aua ua tele na’ua mea e ao ina fa’atasi atu i ai o ia, o le aso To’ona’i nei fo’i, ua fa’ato’a mae’a ai le Fa’aaliga o Tu ma Aganu’u a le Atuvasa i Solomona, ma o lo’o i ai fo’i le tatou aumalaga tele i lea fa’amoemoe.

Peita’i, ua faliu le faigamalo ina ia fa’amanatuina pea lea aso tele i le sauniga i lo tatou Atua e matau i ai mea uma i lenei lalolagi.

O le sauniga fa’apitoa lea e amatalia i le itula e 3:00 i le afiafi o le aso Sa, 15 Iulai, 2012. Tatou auai fa’atasi i lea fo’i aso iloga.

‘AU MALOLOSI SOKA 15-17 TAUSAGA

Ua tula’i mai nei ‘au soka e lua a le fanau e i le va o le 15-17 tausaga le matutua, e le’i i ai ma ni faia’ina talu mai ona amatalia le liki. O ‘au nei o le Utulei Numera 1 ma le Lione Heart Numera 2. Peita’i, pe afai ae tu’u a’e i ‘ai ona iloa ai lea e na’o le tolu lava ‘ai o lo’o muamua ai Utulei #1 ia Lione Heart #2.

I le tulaga lua o le ta’amilosaga talu mai ona mae’a ta’aloga o le aso Lua Iulai 10, 2012, ua tula’i mai ai le Atu’u Broncos e iva o latou ‘ai ae soso’o mai ai ma le Black Rose ma le Jets i le ta’i fitu o latou ‘ai.

I le tulaga ono ua tula’i mai ai le Pago Youth i le ono ‘ai, ae soso’o mai ai ma le Green Bay i le tulaga fitu e na’o le 4 ‘ai, Vaitogi United ua tulaga valu i le 4 ma le Ilaoa & To’omata i le tulaga 9 e le’i tau ‘ai.

O le a’u soka  a Utulei i le taimi nei ua mae’a ona ta’alo ana ta’aloga e ono ae o le Lion Heart ua na’o le 5 ana ta’aloga peita’i, o le la’ua fetauiga o le a sailia ai le auro i le afi, o lo ua fa’atulaga mo le aso 14 Iulai, 2012.

Ua iloga mai o le Lion Heart e matua lelei lava ana tamaiti ta’a’alo o i ai, o nisi o tama ta’a’alo o tamaiti ta’a’alo sa manumalo fo’i na auai i ‘au manumalo o tausaga e lua ua tuana’i i lea lava fa’agatama o le Soka, a’o fa’atautaia le liki soka mo le fanau e afua i le 12 tausaga se’i o’o i le 14 tausaga le matutua.

O ‘au uma nei e lua, Utulei ma le Black Roses, ua fa’ailoa mai e tau fai lelei na’ua latou tamaiti ta’a’alo, sa auai le to’atele o la’ua tamaiti ta’a’alo i ta’amilosaga a le OFC i le Under 17 ma le Under 20 i tausaga ua mavae.

Manatua o lea ta’aloga mata’utia ma e saili ai po’o ai o nei itu e malolo, ae o ai e manumalo e fa’atautaia lea i le malae soka i Pago Pago i le aso To’ona’i 14 Iulai, 2012.