Tala o Fa’amasinoga

DAVE TUPUA

Ua talia e le Faamasinoga Faaitumalo le talosaga a le alii faiaoga o Dave Tupua, ina ia toe tolopo lana faamasinoga autu lea sa fuafua e faia i le Aso Faraile o le vaiaso fou, ona o lo o fuafua o ia e malaga i fafo i se taimi o le masina nei.

O le talosaga a Tupua na faila e lana loia o Fiti Sunia ma talia e le ali’i fa’amasino ia Elvis Patea, lea ua toe fa’atulaga ai lenei mataupu mo le aso 3 o Aokuso.

O Tupua o lo o tuuaia i moliaga mama e tolu e aofia ai lona taofia faapagota o se tagata i se auala faasolitulafono, faapea ai ma moliaga e lua o le faaoolima i le tulaga tolu.

Na faamatala e le teineititi e 13 tausaga le matua o loo aafia e faapea, i le aso 17 Ianuari 2012, na taumafai ai Tupua e toso atu lona tino faapipii atu i lona tino, ona ia kisi atu lea i lona alafau.

Sa ia faia foi le gaioiga lava foi lea e tasi i le  masina o Tesema 2011, ina ua ia taumafai foi e toso faapipii atu lona tino ia te ia, ma ina ua latalata atu foliga o Tupua i ona foliga, sa ia tago i le tusi Science o loo ia uuina ma tuu i le va o la foliga.

PENIAMINA OPETAIA

O le alii talavou lea o loo tuuaia faatasi i laua ma se tama matua i lo la faia lea o ni uiga mataga i se teineititi e 16 tausaga le matua, ua ia sauni e tuuina atu lana tali ioe i luma o le faamasinoga maualuga, e tusa ai o tuuaiga faasaga ia te ia.

O le taeao ananafi na toe valaauina ai le mataupu a le alii o Peniamina Opetaia, peitai sa faailoa e lana loia fautua o Mike White i le faamasinoga, ua maea ona sainia e Opetaia se maliliega ma le malo, pau le itu o loo faatali i ai o le failaina lea o le maliliega i le faamasinoga.

Na faatonu e le alii faamasino sili lagolago ia Lyle L. Richmond le loia a Opetaia o White e vave faila le maliliega, ina ia maua ai se avanoa e vaavaai muamua i ai alii faamasinoga, a’o le’i fofogaina le mataupu i le vaiaso fou.

O Opetaia o loo tuuaia faatasi ma uncle o le teineititi o loo aafia e 62 tausaga le matua i moliaga o le faiaiga ma se teineititi, tagofia o itutinosa o se tamaitai atoa ai ma le faia o gaioiga e lamatia ai le saogalemu o se fanau e laititi i le tulafono.

Na ta’utino Opetaia i leoleo sa la faiaiga ma le teineititi peitai sa le’i mana’o le uncle o le teineititi e fai sana faamatalaga i leoleo.

O loo tatala i tua Opetaia ina ua ia totogiina le $15,000 sa faatulaga e le faamasinoga, e faatalitali ai le aso lea o le a toe fofogaina ai lenei mataupu. A’o tatala ai o ia i tua, ua poloaina o ia e aua nei ona toe taumafai e faafesootai le teineititi sa aafia i lenei mataupu, pe na te toe soliina foi se isi tulafono a le malo.

MATTHEW YANDALL

O le alii lea na tuuaia i lona faaoo o ni manu’a i lana uo teine i le masina o Tesema na te’a nei, ua ia faailoa i le faamasinoga maualuga, e faamaonia tuuaiga faasaga ia te ia.

E lua moliaga mamafa o le taofia faapagota o se tagata ma le faaoolima i le tulaga lua, atoa ai ma le moliaga mama e tasi o le faatupu vevesi na ulua’i tuuaia ai e le malo le alii o Matthew Yandall, ona o le faalavelave lea na ia faaoolima ai i lana uo teine i le aso 19 Tesema 2011 i le fale o lana uo teine i Pago Pago, ae i lalo o le maliliega sa ia sainia ma le malo ma talia e le faamasinoga, ua suia ai e le malo moliaga mamafa e lua i moliaga mama.

O moliaga ua tali ioe ai Yandall e aofia ai le faaoolima i le tulaga tolu, taofia faapagota o se tagata, faapea ai ma le faatupu vevesi i totonu o le aiga.

O le tali ioe ai o Yandall i moliaga nei e tolu sa ia tautino ai e faapea, i le aso 19 Tesema 2011, ao i ai o ia i le aiga o lana uo teine, sa ia faia ai ni gaioiga e ono faatupu ai le vevesi i totonu o le aiga, ina ua ia faatonu lana uo teine e nofo i luga o le nofoa e ui sa musu.

Ae ina ua taumafai lana uo e tu i luga, sa ia tago atu ua toso i lalo lona ulu ma ia faia ai isi gaioiga na mafua ai ona oo manu’a i ona foliga.

Na ta’utino Yandall i le faamasinoga, o gaioiga sa ia faia sa le tusa ai ma ala o le tulafono.

Ua malilie loia o le a fautua i le faamasinoga mo se faasalaga faanofovaavaaia mo Yandall, ae ua lava le umi lea ua oo mai i le taimi nei ua maea ona ia tuliina i le toese, e fai ma ona faasalaga i lenei mataupu, peitai ua malamalama foi le ua molia, tusa lava pe finau loia i le faamasinoga mo se faasalaga mama mo ia, e pule le faamasinoga pe talia pe teena ia faafinauga.

Ua malamalama foi Yandall, e le mafai ona toe suia lana tali ioe ua tuuina atu i le faamasinoga, pe afai e tuuina mai se faasalaga mo ia e le tau ai lona loto.

O loo taofia pea le ua molia i le toese e faatali ai le aso lea ua faatulaga e lau ai lana faasalaga.