Tala o Faamasinoga

ARTHUR ‘AFA’ BLAKE

E 20 masina ua faasala ai e le Faamasinoga Maualuga le alii o Arthur ‘Afa’ Blake i le toese i Tafuna, ina ua tausala o ia i le moliaga o le faaoolima i le tulaga lua, ona o se faalavelave na ia taumafai ai e faaoo ni manu’a i se isi alii, i se agaese.

Ao lei tuuina atu le faasalaga a le faamasinoga ia Blake, na faatoese le ua molia i le faamasinoga e tusa ai o le solitulafono sa ia faia, ma ia talosagaina ai se isi avanoa mo ia. Sa finau foi loia ina ia faanofovaavaaia le ua molia, ma ia poloaina ni polokalame e faatasi i ai ina ia mafai ai ona fesoasoani i le faafitauli o le mafaufau o loo aafia ai o ia.

Na talia e le faamasinoga faafinauga a loia ma ua faanofovaavaaia ai Blake mo le lima tausaga i lalo o poloaiga a le faamasinoga e ao ona ia usitai i ai, e aofia ai le faasa ona ia toe faafesootaia le alii na aafia i lenei mataupu, ma ia le toe solia se tulafono.

O le masina o Setema lea ua faamoemoe e atoa i ai masina e 20 talu ona loka Blake i le falepuipui, ma ua manatu foi le faamasinoga, o le a faaauau pea ona taofia o ia seia oo atu ia Setema, ina ia oo atu i ai ua maea isi togafitiga o lo o fuafua e faia mo ia.

Ua poloaina foi e le faamasinoga Blake e aua nei ona toe tagofia le ava malosi poo fualaau faasaina, ona o le isi lea mafuaaga na ala ai ona aafia o ia i le mataupu lea o loo loka ai se alii leoleo, ina ua faaoolima ia te ia.

Ua fautuaina foi o ia ina ia auai i ni aoaoga e fesoasoani ai i le ita, ma ia auai foi i polokalame o loo faagasolo e ofisa o le malo e fesoasoani ai i lona mafaufau.

FAAMANU AOKUSO

O le Aso Faraile nei lea ua faamoemoe le malo e fofogaina ai i luma o le Faamasinoga Maualuga sa latou maliliega, ua maea ona sainia ma le alii fusu mai Samoa, lea o lo o loka i le toese i Tafuna, ona o tuuaiga i lona faiaiga i se teineititi talavou.

O le alii o Faamanu Aokuso o lo o taofia ina ua le mafai ona ia totogia le $100,000 sa faatulaga e le faamasinoga e tatala ai o ia i tua.

O lo o tuuaia o ia i lona tagofia o itutinosa o se teineititi e 15 tausaga le matua, faapea ai ma lona faiaiga i le teineititi.

O tuuaiga faasaga ia Faamanu na afua mai i le masina o Oketope o le tausaga na tea nei, ina ua maea le taamilosaga o fusuaga a le Mosooi na malaga mai ai Aokuso e fai ma sui a Samoa i lana aufusu.

FAATUPULAIA TALEPE FALE MA LE GAOI

Na taua e le loia a le malo o Blake Hanley le faatupulaia o le solitulafono o le talepe fale ma le gaoi i le taimi nei, ma ua tuuina atu foi sana talosaga i le Ofisa o Leoleo ina ia faagasolo sa latou suesuega i le mataupu na osofaia ma talepe ai e ni tagata ni fale se tolu i Tafuna i le lua vaiaso talu ai.

Na taua e le alii loia e faapea, e tolu fale na osofaia ma talepe e le au gaoi i le lua vaiaso talu ai, ma latou gaoia ai ni mea aoga e pei o telefoni ma laptop.

O le atugaluga o le alii loia i le faatupulaia o faafitauli nei, ona o lo o masalomia le aafia ai o fanau e laiti i lalo o le tulafono.