Login

FAGOGO: O OE NA FILIFILIA E O’U MATUA

[E toe faatalofa atu i uo ma paaga masani a  le tatou polokalame i lenei vaiaso, ae alo maia o le toe faaauauina lenei o le tatou polokalame mai le vaiaso na te’a nei, lea na gata mai i le taimi lea ua faailoa atu ai e le toeaina o Gogolo lona le fiafia i taulele’a ia na tuliina maia Pegi, faatasi ai ma lana faamatalaga, o le a toe logo le nuu e uiga i le mataupu lea.]

E leai ma se taule’ale’a na toe gagana ina ua uma le malelega a le tuua o le nu’u, ae ua na o le punonou ua le gagana. O Gogolo i le taimi lea, ua oo i le lagi lona ita, ina ua ia vaaia o lo o manu’a foliga o le toalua a si ona afafine i faiga a taulele’a o le nuu. O lea na toe oso atu ai loa ma le isi ana tala, “o le kala lega, ae o ese loa, alu le kagaka e fai saga feau aoga e faaaoga ai legei aso.” Ua tau fai tutu i luga le au alii ia na saofafa’i i le pito i tua o le fale o le toeaina, ona taitasi lea ma alu i lona fale, ae ua totoe ai na o Gogolo, o lona afafine ma Pegi. O le momomo o le loto o le toeaina i le vaaiga lea ua i ai le tamaloa o Pegi, na faatoa mafai ai loa ona maua se avanoa o le toeaina e talatalanoa atu ai i le tamaloa, talu mai lava faafitauli ma uiga le mafaufau na faaali e le tamaloa ia i laua ma le olomatua.

“Alii Pegi, e leai se isi kaimi e mafai ai oga koe avaku sa’u faamakalaga ia ke oe sei vagaga ai le kaimi legei, e ui lava foi i faafikauli ua kukupu mai, ae o la’u faukuaga ia ke oe le akalii, ia sui lou mafaufau ma faaaoga faukuaga o lo o avaku e i maua gei o makua o lau ava, iga ia avea lo kakou aiga o se aiga fiafia, ae le o le femisa a’i e pei oga i ai gi gai vaiaso ua kuaga’i aku...” o le lauga faaumiumi lea a le toeaina o Gogolo, peitai o Pegi i le taimi lea, e le o atoatoa lona fiafia i le mea sa tupu, o le ala foi lea e fiu ai lava si toeaina e talanoa atu, e ese lava le itu e faasaga i ai le tamaloa.

O isi taimi ua faasaga i fafo, a le o lena ua faaloloa vae ma lima ma ua avea gaioiga o lo o ia faia ma itu ua tau le mau ai le afa a le olomatua lea o lo o nofo mai i le isi tulimanu o le fale. “Sole Pegi, e ke le faaaloalo lava o lega e kaukala atu le koeaiga ia ke oe, e ke iloa ea o maua e faia upu a le guu ae se’i vaai i amioga e ke fai mai ia maua, ua ma salamo aga ma iloaiga e faapea gi ou uiga e faaali mai, ma ke le kaliaiga lau oo mai eke fia gofo i le ma kama lele, aga gogofo lava  la’u kama ma Aperaamo, le kamaikiiki o le guu ga la aooga akogu o maua ai soga lumaga’i ma le maua ai se safa o ma mafaufau, le iloa poo se faasalaga legei mea mai le Alii, eh kaigoigo e .......” o le ote faaumiumi lea a le olomatua i le tiga o lona loto, ae pei lava o le timu e pau i le tua o le pato upu ia o lo o avatu i le tamaloa o Pegi, e itga lava ona feita atu le ulugalii, ae atili ai lava ona fai ona uiga o lo o faaali.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.