Login

Ulua’i Fogafale 4-$5.7Miliona

reporters@samoanews.com
O se va’aiga i le taua’oina atu o le Tusi Pasi o le Maota fou o le ASTCA i Tafuna e le Fa’atonu o Galuega Lautele a le Malo Punaofo Tilei i le susuga le Fa’atonu o le ASTCA Aleki Sene. [ata: Leua Aiono Frost]

I le tula e10:00 i le taeao ananafi, sa matua fa’atumulia fale’ie tetele i luma maota o le Falefou o ituaiga o fausaga fou i le tatou atunu’u, ma ua tu matilatila fo’i o se ulua’u fale fogafalefa ua fausia e le tatou malo i le atunu’u.

O se mea e sili ona taua, ona ua fa’ailoa mai e le Fa’atonu o le ASTCA, Aleki Sene, “So’o se kamupani po’o se matagaluega o le Malo e fia fa’aaogaina le ata o lenei fale e taua’ao fua atu e le matou matagaluega, ae tasi lona aiaiga, ia na’o le fa lava fogafale e fausia!”

O le tau o le galuega lenei i lona aotelega e aofia au ma suiga uma na toe faia i le fale e ese mai lona ata na mua’i pasia ai i le amataga, e $5.7miliona. O le tala o le galuega i lona amatalia mai se’ia o’o ina mae’a nei ma tatalaina, sa otootoina mai lea e le susuga le Fa’atonu mo le silafia a le to’atele na auai, fa’atasi ai ma le afioga le Kovana Sili ma le mamalu o tafa e tolu o le faigamalo a Amerika Samoa.

O le tele o le fale i lona aofa’i o le avanoa mo ofisa o i ai nei e 20,000sikuea futu, ma ua fa’asoaina i le vaega o ofisa e tautuaina le mamalu lautele e ala i tautua ua ofoina mai e le ASTCA i telefoni i le mamalu o le atunu’u, ua tu’uina lava i le fogafale aupito i lalo.

O lenei ulua’i fuafuaga i se fale sa tu’uina mai e le Malo le fa’atausi’usi’uga o le Malae va’alele, peita’i, ua toe feutaga’i le Komiti Fa’afoe o le ASTCA ma ua latou manatu ai, e sili pe a fausia i lea eleele patino ia i latou ona o tulaga tau le pisi o va’alele sese’e ma toe tu’uva’a ese atu, fa’atasi ai ma le tele o le asu e ono lamatia ai le soifua maloloina o tagata faigaluega, fa’apea ma le mamalu lautele e fa’aaogaina fo’i lea Ofisa i le totogia o latou pili ma fefa’ataua’iga fo’i i aso ta’itasi.

I le tautalaga a le tama fa’atonu o le ASTCA sa ia fa’aalia ai, “O lenei tinoitupe atoa na fausia ai le fale lenei, ua maua mai lava i a tatou tupe mai le lotoifale, i a outou pili totogi mo tautua a le ASTCA, ma afai la o oe o le tagatao lo’o i ai lau telefoni mai le ASTCA, fa’afetai ia te outou uma lava, lea ua tula’i la outou galuega!”

Na ia fa’ailoa o se fonotaga a le SPIN [South Pacific International Network] sa auai i ai i latou ma le Kovana Sili, Magalei ma Lelei Peau  na mafua ai ona a’e se tofa mai le 2008 ina ia fausia lenei galuega, fa’afetai o tausaga lava ma tu’u se vaega o le tau o le fale i luga o le latou tupe fa’asoa i le tausaga, ma e o’o mai i le 2010, ua mae’a lelei le $5miliona ona fa’ao’o i le paketi a le ASTCA.

I le fale ua tutula’i nei, e ui ina tetele pesega ae ua matua i le oo! Lele ua mafai ona tu’ua le fogafale lona tolu mo le Ofisa o le susuga le Faipule i Uosigitone, i lona tasi o vaetolu o lea avanoa mo ofisa, ua fa’atulaga le fogafale lona lua mo Ofisa o Pisinisi a le ASTCA, Fogafale lona fa ua fa’atulaga mo Ofisa o le Fa’atonu, Ofisa tapena mo nisi e masi’i mai mo le fa’aleleia atili o feso’ota’igama atunu’u i fafo, Potu fono ma isi Ofisa Autu mo le Komiti Fa’afoe.

Ina ua fa’ai’ui’u lana tala o le galuega, sa ia fa’afetaia le galulue fa’atasi o i latou ma isi matagaluega o le malo e aofia ai le Matagaluega o Galuega lautele, EPA, ASPA, DOC fa’apea le Kamupani sa fa’akonekarate mo le galuega tele ua tula’i nei.

I se tautalaga a le Kovana Sili sa mafai ona ia fa’afetaia le galuega, ma ua fa’afiafiaina fo’i lona sui e matauina le aga’i pea i luma o ala o feso’ota’iga ma fale e fa’atautaia ai. Peita’i, sa ia fa’amamafa mulimuli lava, ia alofagia, e galulue fa’atasi le ASTCA ma isi Kamupani tu maoti i nei tautua, ina ia lelei le tautuaina le atunu’u lautele, o le sini lena o le fa’amoemoe o le Malo e fa’aleleia atili ai ala o auaunaga lautele.

Sa fa’afetaia muamua lava e le Kovana, le mataisau ma le tomai fa’apitoa o le susuga Dean Hudson ma le Kamupani a le Fletcher lea lava e tu’u i ai le fa’amoemoga atoa o Amerika Samoa e avea lo latou tomai fa’akamuta, e fausia ai fausaga fou e aoga mo le atunu’u i le taimi nei ma le lumana’i.

O le lipine ole fale sa o’otia lea e le faletua Maryann Tulafono, ae o le susuga le Fa’atonu Aleki Sene sa taua’aoina i ai le Tusi Pasi e fa’aaoga ai le fale tele, ma lona ki e le susuga le Fa’atonu o Galuega, Punaofo Tilei ma le fale o Dean Hudson o le Fletcher. O tatalo sa si’itia lea e Rev Fa’atui Laolagi, ma o ia fo’i lea sa ia mua’i tatalo e tatalaina ai le galuega i le amataga mai.

O se ‘aiga fiafia na saunia lelei ina ua mae’a asia le maota atoa e le mamalu sa auva’a potopoto, ma sa tofusia fo’i i latou i nai meaalofa, ma le auvala’aulia fa’apitoa na faia i ai fa’aaloaloga maualuga a le Matagaluega o Feso’ota’iga a le tatou Malo po’o le ASTCA.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.