Login

Tatala tua mai le toese se tina ona lana fanau

ausage@samoanews.com

E tasi lava le mafuaaga na ala ai ona tatala i tua mai le toese i Tafuna ia le tina talavou o Keihana Talaese, ona o le manatu alofa o le faamasinoga maualuga i lana fanau.

“A tatala atu loa oe i tua mai le toese, ona e alu lea e fusi ma opo lau fanau, ma e faafetai i ai ona o le avanoa ua mafai ai ona toe tatala oe i tua,” o le saunoaga lea a le alii faamasino sili o Michael Kruse ia Talaese ina ua lau lana faasalaga i le vaiaso na te’a nei.

O Talaese na tuuaia e le malo i lona umia faasolitulafono o vaega o le laau faasaina o le mariuana, ina ua agai atu leoleo e faato’a filemu se vevesi na tulai mai i le uafu o vaa faila i Malaloa i le masina o Fepuari, ae maua ai mariuana i se tasi o alii ma Talaese.

A’o taofia Talaese i le ofisa o leoleo mo suesuega, na taumafai e sola ese, peitai na tuli o ia e leoleo ma toe maua ai, ma molia ai loa foi o ia i le sola ese mai leoleo.

I se maliliega na sainia e Talaese ma le malo, na talosaga ai le malo i le faamasinoga ina ia tali ioe le ua molia i le moliaga o le sola ese mai leoleo, ae solofua le moliaga mamafa o le umia lea o mariuana, lea foi na talia e le faamasinoga.

I le tali ioe ai o Talaese i le moliaga o le sole ese ma leoleo, sa ia tautino ai e faapea, ao i ai o ia i lalo o le vaavaaiga a leoleo, sa sola ese ai ona o lona le mana’o e loka o ia, peita’i sa toe maua o ia e leoleo ina ua tuli o ia ma taofia ai loa i le falepuipui.

A’o le’i tuuina atu le faasalaga a le faamasinoga, na faatoese Talaese e tusa ai o lana solitulafono sa fai, ma ia talosagaina ai se isi avanoa mo ia. Sa ia tautino i le faamasinoga, o lona le usitai i tulafono a le malo ua mafua ai ona oo puapuaga ia te ia, ma ua ia manaomia lona toe fia fo’i atu i lona aiga  e tausi si ana fanau ma faatino ona tiute faatina.

Na talosaga lana loia o Mike White ina ia faanofovaavaaia o ia, ae ua lava le umi lea ua uma ona ia tuliina i le toese e fai ma ana faasalaga i lenei mataupu, lea foi na lagolago i ai le loia a le malo o Kimberly Hyde.

Saunoa Kruse, o Talaese na loka e leoleo ina ua maua i ai se vaega itiiti o mariuana, peitai ao i ai o ia i le ofisa o leoleo, sa ia maua le avanoa ma sola ese mai ai i leoleo peitai na toe maua o ia.

A’o i ai Talaese i le ofisa o leoleo i Fagatogo, sa alu i le atoa ma fai ai latou tuliga ma leoleo, ma toe pu’e atu ai o ia i luma tonu o le faletupe o le ANZ Bank i Fagatogo lava.

E 5 tausaga sa manatu le faamasinoga e loka ai Talaese i le toese i Tafuna, peitai o le a faamalumalu lona faatuanuuina o lea faasalaga, ae ua poloaina o ia e nofovaavaaia mo le 5 tausaga i lalo o poloaiga a le faamasinoga.

O nisi o ia poloaiga e aofia ai lona tuliina o masina e 12 i le falepuipui, peitai o le a taofi le faataunuuina o lea poloaiga, fuafua lea i lona usitai i faatonuga uma o le a tuuina atu ia te ia.

Ua poloaina o ia na te totogiina le salatupe e $1,000, ma ia aua nei ona toe tagofia fualaau faasaina poo le ava malosi i soo se taimi.

“O le a suesueina lou tino e leoleo poo sui o le ofisa faanofovaavaaia, ina ia iloa ai e te le o toe tagofia fualaau faasaina poo le ava malosi fo’i, afai ae faamaonia o loo e tagofia mea ia, o le a loka oe i le falepuipui mo le 5 tausaga,” o le fautuaga lea a le faamasinoga ia Talaese.

O isi poloaiga a le faamasinoga mo Talaese e aofia ai le faasa lea ona toe alu i nofoaga o loo faatau ai le ava malosi, pe toe faatasi foi ma tagata o loo tagofia le ava malosi, e oo foi ia i laua e toalua lea na taofia faatasi i latou i lenei mataupu, ua faasa ona toe fesootai i ai.

O i laua na loka faatasi ma Talese i le mataupu lenei e aofia ai Vaoeli Lafoia ma Hefa Vahe. Ua maea ona tali ioe Lafoia ma Vahe i moliaga sa tuuaia ai i laua, ma ua faatali foi le aso e lau ai a laua faasalaga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.