Login

Mana’omia se suiga tulafono sauaga faasaga fanau laiti

ausage@samoanews.com

E talitonu le alii kovana ia Togiola Tulafono, e tatau ona i ai se suiga i le tulafono lea e faia ai sauaga faasaga i tamaitai, ina ia mautinoa e le gata e faasala le alii sa faia le solitulafono i le tamaitai, ae tatau foi ona i ai se vaega o le tulafono e aafia ai le tamaitai pe afai sa malie i ai lona loto e faiaiga ma le alii ua molia.

“E foliga mai e faatutu lava le mata o le tulafono i le alii ae leai lava se mea e lape ai le tamaitai o loo fai ma le loto malie le faiaiga a’o laititi o ia, ma ou te iloa o le isi lea itu o loo matou taumafai lava e tau saili se fofo ina ia o gatasi ai itu e lua ae le o le pagatia na o alii ae faasaoloto tamaitai,” o le saunoaga lea a le alii kovana.

O lea mataupu na faatula’i e se tina i le taimi o le polokalame a le alii kovana, ona o le mataupu e uiga i le tautua a pasi aoga ma le la’uina o fanau aoga i taimi e a’e ai aoga.

Na taua e le tina lea i luga o le polokalame a le alii kovana, o le isi faafitauli ua ia maitauina i le tautua a pasi aoga, o le vave momoli lea o fanau aoga i faleaoga ae le’i taitai malamalama le taeao, ona tia’i ai lea o fanau i faleaoga ae toe nanati mai le ave pasi ma lana pasi e toe piki atu isi tamaiti aoga.

Fai mai le molimau, o isi ia auala e mafua ai ona aafia fanau teine laiti i faiga faasolitulafono ma faiga le alofa mai isi tagata, ona o lea ua maua le avanoa e tuua ai na o i latou i le faleaoga e aunoa ma se tagata matua poo se faiaoga e vaavaaia i latou.

Peitai na saunoa Togiola, tusa lava pe o le a le vave momoli o fanau i le faleaoga i le taeao e le’i malamalama, tusa lava foi pe tuua na o fanau aoga e aunoa ma se faiaoga poo se tagata matua, afai lava o le teineititi ua mautu ma maua’a aoaoga a ona matua i lona loto, e le mafai ona toilalo lona loto i faaosoosoga a le fili e lu’itauina ai o ia.

Na faamanino e le alii kovana e faapea, o le tulafono o loo i ai, soo se taimi lava e aafia ai fanau teine laiti i gaioiga tau feusuaiga, e faasala lava na o alii, peitai e tatau foi ona i ai se vaega o le tulafono e saisaitia ai ma tamaitai pe afai sa faia ma le loto malie feusuaiga.

Saunoa Togiola e faapea, o loo latou taumafai pea ma loia e saili se fofo o le mataupu lea, ina ia taofia ai le aafia itutasi na o alii ae tatau foi ona i ai se vaega o le tulafono e aafia ai tamaitai pe afai sa faia ma le loto malie le solitulafono.

Ae i le malu puipuia o fanau teine laiti mai solitulafono, o le matafaioi lena a matua uma lava, aua o i latou e afua mai ai le ola mautu ma le saogalemu o fanau.

I le mataupu e pei ona faasea ai matua i le vave momoli lea o fanau i le taeao i le aoga, vaai le lomiga o le To’asavili i le Aso Toana’i ua fano mo le tali a le kovana.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.