Login

Fa’aauau pea suesueg Fa’amasinoga le isi sui kalapu lakapi Nuuuli

ausage@samoanews.com

E le o malolo le faamasinoga maualuga i le suesueina o le mataupu faasaga i le alii mai Samoa, lea na aumai e faa taalo i le au lakapi a Nuuuli, mulimuli ane tu’uaia i le fasiga o le alii laufali mai Samoa i le tausaga na te’a nei.

E ui o lea ua maea ona lau le faasalaga a le alii o Tautiaga Uili ma ua poloaina o ia ina ia tuua le teritori ae toe fo’i atu i Samoa, peita’i na taua e le alii faamasino sili ia Michael Kruse, o le a suesueina pea e le faamasinoga lenei mataupu ona o loo fia malamalama atili le faamasinoga i faamaumauga mai le Ofisa o Femalagaaiga e uiga i le alii lenei.

E tusa ai ma faamaumauga mai le Ofisa o Femalagaaiga o loo taua ai, o Uili e tolu ona igoa o loo i ai i a latou faamaumauga, ma o ia igoa e aofia ai lona igoa o loo i lona tusi folau o Tautiaga Uili, Pelenato Fuaautolu ma Barry.

O le aso 21 Iulai 2006 na ulufale mai ai Uili i le pemita 30 aso i Amerika Samoa, ae toe foi i Samoa i le aso 10 Iuni 2008. O le aso 16 Novema 2009 na toe ulufale mai ai o ia i le teritori i le isi pemita 30 aso, ae toe foi atu i Samoa i le aso 7 Setema 2010, ae o le isi ana toe malaga mulimuli mai i le tausaga e 2011, na aumau ai lava i le teritori seia oo ina loka o ia i le faalavelave lea na latou fasia ai ma isi alii e toafa mai le au lakapi a Nuuuli le laufali mai Samoa, ma manu’a tigaina ai.

O loo fia maua e le faamasinoga maualuga, pe na faapefea ona fai e le au lakapi a Nuuuli le gaioiga lea, o le aumai o Uili mai Samoa i le pemita 30 aso ma taalo i le latou au lakapi.

Fai mai le faamasinoga, o Uili e foliga mai o se tama aami a Nuuuli mai Samoa, e aumai e taalo mo le latou au lakapi pe a oo i taimi o le taamilosaga lakapi i le teritori.

O Uili ma isi alii e toafa mai le au lakapi a Nuuuli, ua ta’usala i latou i lo latou fasiga o le alii laufali o Ponifasio Vasa i le masina o Iulai 2011, o le vaiaso na te’a nei na faatoa lau ai le faasalaga a Uili ae o isi aualii ua maea ona lau a latou faasalaga, ma ua toe tatala i tua i latou.

E 5 tausaga na manatu le faamasinoga e loka ai Uili i le falepuipui, ina ua ta’usala o ia i le solitulafono o le faaoolima i le tulaga lua, peitai ua faamalumalu lona tuliina o le faasalaga, ae ua faanofovaavaaia o ia mo le 5 tausaga i lalo o tuutuuga a le faamasinoga e tatau ona usita’i i ai.

O nisi o tuutuuga o lana faanofovaavaaia e aofia ai lona tuliina o masina e 20 i le falepuipui i Tafuna, peitai ua manatu le faamasinoga, ua lava masina e 11 lea ua uma ona tuli e Uili e fai ma ana faasalaga i lenei mataupu, ae ua poloaina o ia na te tuua le teritori, aua ne’i toe taumafai e ulufale mai i le atunuu i totonu o le 5 tausaga lea ua faanofovaavaaia ai o ia.

E $2,000 lana salatupe ua poloaina o ia e le faamasinoga na te totogiina, atoa ai ma le $1,000 na te toe totogi i le alii laufali mo manu’a sa aafia ai lona tino, ma ua poloaina le itu a le malo ina ia faafesootai le sponsor mo le totogiina o tupe ua poloaina Uili na te totogiina, pe afai e le mafai e le ua molia ona totogi tupe ia.

O isi poloaiga ua laugatasia ai Uili ma isi alii e toatolu ua maea ona lau a latou faasalaga, e aofia ai le faasa lea ona o latou toe auai i soo se faagaioiga tau lakapi i le teritori, pe toe o foi i le paka e matamata i ni taaloga lakapi, ua faasa foi i latou ona o latou toe taumafai e faafesootai pe talanoa i le alii laufali na aafia.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.