Login

Tala o Fa'amasinoga

ausage@samoanews.com

IOE SA IA GAOIA LE $1,000 MAI LANA KAMUPANI

O le alii lea na tuuaia e le malo i lona suia fuainumera sa aumai i lana siaki mulimuli mai le kamupani sa galue ai, ua ia ta'utino i le faamasinoga, e faamaonia sa ia faia lea gaioiga, ma ia gaoia ai le tupe e $1,000 mai lea kamupani.

O le alii o Mamoe Vaoga na uluai tuuaia e le malo i moliaga mamafa e aofia ai le gaoi, faia o faamaumauga sese, faapea ai ma lona sainia faamalosia o le saini a se isi tagata, ae i lalo o se maliliega sa ia sainia ma le malo ma talia e le faamasinoga, sa ia tali ioe ai i moliaga mamafa e lua o le gaoi ma le faia o faamaumauga sese, ae solofua le isi moliaga mamafa o lona sainia faamalosi o le igoa o le isi tagata.

I le tali ioe ai o Vaoga i moliaga ia e lua sa ia tautino ai i le faamasinoga e faapea, i le masina o Novema 2011, na maua mai ai lana siaki mulimuli mai le kamupani a le Atlas Construction lea sa galue ai i le aofai e $151.74, peitai sa ia faaopoopo le numera tasi ma le koma i le siaki ina ia maua ai le aofa'i e $1,151.75, faatasi ai ma lona toe faaopoopo o faaupuga ina ia faailoa ai le aofaiga e 'tasi le afe tala', ma alu ai loa ua tala lana siaki i le faletupe o le ANZ Bank.

Na tautino Vaoga, o lona faia o lea gaioiga ua ia gaoia ai le tupe e $1,000 mai lana kamupani sa galue muamua ai.

Ua manatu loia o le a faatali ni a laua faafinauga mo se faasalaga o Vaoga, sei maea on a tapena e le ofisa faanofovaavaaia sa latou ripoti, peitai ua malamalama le ua molia, tusa lava pe finau loia i le faamasinoga mo se faasalaga mama mo ia, e pule le faamasinoga pe talia pe teena ia talosaga.

Ua ia iloa foi, e le mafai ona toe suia lana tali ioe ua tuuina atu i le faamasinoga, pe afai e tuuina mai lana faasalaga ae le tau ai lona mana'o.

O loo taofia pea Vaoga i le toese i Tafuna e faatali ai le aso 19 Iulai lea ua faatulaga e lau ai lana faasalaga, ina ua le mafai ona ia totogi le tupe e $1,000 sa faatulaga e tatala ai o ia i tua.

FALEPUIPUI VILI ONEY MO LE 12 MASINA

O le alii talavou lea na maua i ai e leoleo ni mariuana ina ua osofaia lona fale i le masina o Mati o le tausaga nei, ua faasala i le toese mo le umi e 12 masina, o se tasi lea o tuutuuga o lana faanofovaavaaia e 5 tausaga ua tuuina atu i ai e le Faamasinoga Maualuga.

O Vili Oney na ulua'i tu'uaia e le malo i le moliaga mamafa o lona umia faasolitulafono lea o mariuana, peitai i lalo o le maliliega lea sa ia sainia ma le malo ma talia e le faamasinoga, na ta'usalaina ai o ia i le moliaga mamafa feololo ane ai o le umia faasolitulafono lea o mariuana.

A'o lei tuina atu le faasalaga a le faamasinoga mo Oney i le vaiaso na te'a nei, na talosaga lana loia fautua o Sharron Rancourt i le faamasinoga, ina ia faamalumalu le tuuina atu o sana faasalaga mo Oney mo le 6 masina, ae se'i tulimata'i e le faamasinoga pe i ai se suiga i le olaga o lenei alii, peitai ina ua tuuina mai le faaiuga, sa faaauau pea ona faasala e le faamasinoga Oney i le falepuipui.

Na finau lana loia, o Oney o se alii e tele sona lumanai lelei i le aoga, e atamai toe sogasoga i le aoga, peitai o le filifiliga sese sa ia faia ua mafua ai ona a'afia o ia i lenei solitulafono matuia.

Na faatoese le ua molia i le faamasinoga e tusa ai o lana solitulafono, ma ia talosagaina ai le isi avanoa se tasi mo ia. Sa ia faatoese foi i ona matua ona o le solitulafono ua ta'uleagaina ai le igoa o le aiga.

Na taua e le loia a le malo Cabel Poag, afai e talia e le faamasinoga le talosaga a le itu tetee ina faamalumalu se faasalaga seia maea le 6 masina, o le a leai se faafinauga a le malo.

Saunoa le alii faamasino ia Lyle L. Richmond, o Oney o se alii atamai ma lelei i le aoga, sa lelei foi togi sa ia maua i le aoga, peitai ina ua faauu o ia mai le aoga maualuga, sa vaaia ai loa le ese o le ala na ui ai o ia, ma i'u ai ina ia faatauina atu mariuana ona o le sese o tagata sa ia faauo atu i ai.

E 5 tausaga na manatu le faamasinoga e faasala ai Oney, peitai ua faamalumalu le tuliina o lea faasalaga, ae ua faanofovaavaaia ai o ia i lalo o poloaiga mai le faamasinoga, ma o nisi o ia poloaiga e aofia ai lona tuliina o masina e 12 i le toese, afai foi e talia o ia i le Kolisi Tuufaatasi i le toe a'e ai o aoga, o le a tatala o ia i tua e alu e aoga mai le 8 i le taeao e oo atu i le 4 i le afiafi, mai le aso Gafua e oo atu i le aso Faraile.

E $3,000 le salatupe ua poloaina o ia na te totogiina, ae afai e vave totogi le tupe lea, o le a na o le 6 masina e loka ai o ia i le falepuipui.

O isi poloaiga e aofia ai le faasa lea ona ia toe tagofia le ava malosi, faasa ona toe pipii i tagata o loo latou inuina le pia pe tagofia fualaau faasaina, o le a faia foi ni suega i lona tino ina ia iloa ai na te le o toe tagofia le ava malosi poo fualaau faasaina.

TETE'E LAMAFA MOLIAGA FAASAGA IA TE IA

O le alii lea na ia sasaina foliga o se tamaitai i se atigi fagupia e mafua mai i se losalio, ua ia teena le moliaga faasaga ia te ia ina ua tulai i luma o le faamasinoga maualuga i le vaiaso na te'a nei.

I le teena ai e Mareko Malaefono Lemafa o le moliaga o le faaoolima i le tulaga lua, ua faatulaga ai loa lana uluai iloiloga i le aso 30 Iulai.

I faamaumauga a le faamasinoga o loo taua ai e faapea, o le faalavelave na tulai mai ina ua fai atu le tamaitai na aafia ia Lemafa e avatu lana losalio, peitai na avea ma itu na ita ai le ua molia, ma ia tago ai loa i le fagupia ua sasa ai foliga o le tamaitai na aafia ma manu'a ai.

Na togafitia le tamaitai na aafia i le falema'i ma toe te'a ai i tua.

E $5,000 le tupe ua faatulaga e le faamasinoga e totogi ona faatoa mafai lea ona tatala Lemafa i tua mai le toese.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.