Login

Fagogo: Salu Vale le Lau Ta’amu a A’opo

[Malo le faitau, malo foi le onosai, ae alo mai loa o le toe sosooina lenei o la tatou tala faasolo, lea na gata mai i le vaiaso na tea nei i le taimi lea na fai atu ai le tamaitai lea ofisa ia Fatu, a maua sona avanoa ona alu atu lea la te fai ‘aiga i le aoauli o le aso e sosoo ai.]

E le’i alu le tama e tapena mai sana faleaiga niu e pei ona masani ai mo le isi aso e soso’o ai, ona o lea ua maua lana galuega i le faleaiga, ma ua sauni ai foi lona mafaufau e galue i le vaiaso fou, ae o le aoauli o le aso na soso’o ai, na laei mama ai loa Fatu ma agai atu i le ofisa o le tamaitai lea ua la masani talu ai lana pisinisi o niu faatau. Na ona tu lava o le tama i luma o le faitoto’a, tu’itu’i loa ma le faitoto’a ona ia ulufale lea i totonu, ma ia vaaia ai le tamaitai lea o loo nofo mai i luga o lana laulau. “Se malo alii i lau susuga a le alii faipisinisi, faafetai ua e sau,” o le tala ata atu lea a le teine ia Fatu, ae o le tama i le taimi lea, ua meia ona o le upu ua faalagilagi atu ai o ia, o ia o le tagata faipisinisi. “Malo fo’i le soifua i lau susuga i le faletua,” o le tali atu lea a Fatu ae ata le teine ma faapea atu, “Oka, ua e nofo lava ma faafaletua a’u e le’i taitai oo i ai lota olaga, a ea?”

Na uma vave lava galuega a le tamaitai i le taimi lea, ae ua pisi loa e tapena luga o le laulau i le potu o loo pito i tua o le Ofisa, ma ia valaauliaina ai loa Fatu la te fai aiga i le aoauli. “O a’u o Tamara, ou te faigaluega lava iinei i la’u tama’i pisinisi lea,” o le tala lea a le teine i le tama, “O lo’u igoa Fatu, o la’u tama’i pisinisi foi lea sa mafua ai ona ta feiloa’i o le faatauina lea o a’u niu e fesoasoani ai i le totogiina o pili aoga o nei o’u tei o loo faamuli mai i lo matou aiga i Amouta.” O le ulua’i aso na mafua ai Fatu ma Tamara na malamalama ai le isi i le tasi, ma ua iloa ai foi e Fatu, o Tamara o se tamaitai loia o loo fai lava lana pisinisi i le taulaga, ma e to’alua ana tagata faigaluega o loo i ai. Ua iloa foi e Tamara o Fatu o se tamaititi matua oti, ua le uma lana aoga i le kolisi i Avele ona ua leai se tupe e totogi ai lana aoga, le mafuaaga lea ua alu ai e faatau lana pisinisi niu ona o le tau sailiina o se tupe e totogi ai pili aoga a nai ona tei o loo faamuli mai i lo latou aiga i Amouta. O se tala fiafia foi i le faalogo a le tamaitai, o lea ua maua le avanoa o Fatu e faigaluega ai i le faleaiga a Pinati, ona o lona loto fesoasoani i soo se taimi e faatau ai ana niu i luma o le faleoloa, na te tapenaina ai luga o laulau ma faamama le otaota, la’u ipu i tua ma fesoasoani i tagata faigaluega i soo se mea latou te manaomia.

A’o le’i tuua e le tama le ofisa o Tamara, sa ia faafetai i le tamaitai mo lona agalelei aemaise ai o le avanoa ua la talisua ai i lea aoauli, peitai i lona talitonuga, o le a le toe faalavelave mai foi ia te ia ona o lea ua ia iloa, o ia o se tagata e pisi tele i ana galuega aemaise ai o le failaina o ana mataupu i le faamasinoga, atoa ai ma le talatalanoa ma i latou o loo ia tauaveina a latou mataupu i luma o le faamasinoga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.